Read Waray Samarenyo Meaning Based Sirac 45 Bible Online

Sirac 45 - Waray Samarenyo Meaning Based bible

Sirac 45

¹Hi Moises Tikang han mga tulin ni Jacob nagpatubo an GINOO hin usa ka tawo nga dyosnon nga naruyagan han ngatanan, nga ginhigugma han Dyos ngan han mga tawo. Ini nga tawo amo hi Moises, kanay hinumdoman amo in usa nga bendisyon.

²Ginhimo hiya han GINOO nga mahimayaon sugad han mga anghel ngan ginkahadlokan hiya han iya mga kaaway.

³Didto ha Ehipto ha iya pagsugo, inmabot[143] an maraot nga hinabo. Ginpatahod ha iya han GINOO in kahadian. Iginhatag ha iya han GINOO an iya mga sugo para han iya katawhan ngan iginpakita ha iya an mabislaw nga kapawa han iya pagkadyos.

⁴Ginpili hi Moises han GINOO tikang han ngatanan nga katawhan ngan iginhalad hiya tungod han iya pagkamaunongon ngan pagkamapainubsanon.

⁵Iya ginpabati ha iya an iya tingog ngan gindara hiya ngadto han maitom nga dampog, diin han nag-aatubang hira, iya iginhatag ha iya an mga sugo, an Balaod nga naghahatag hin kinabuhi ug hibaro, basi igtutdo ni Moises an mga sugo han Ginsaaran ngadto han mga Israelita. Hi Aaron

⁶Ginpatubo han GINOO hi Aaron nga usa nga tawo nga sugad kan Moises nga iya bugto, tikang han tribo ni Levi.

⁷Naghimo hiya hin dayon nga ginsaaran ha iya ngan iginhatag ha iya an katungdanan hin pag-alagad sugad nga padi ngadto han katawhan han GINOO. Iya ginpasidunggan hiya pinaagi hin pagbadoi ha iya hin magtahom nga mga panapton nga higlawig ngan mahusay nga mga rayandayan,

⁸nga hingpit dida han pagkamatahom. Iginhatag ha iya an mga tigaman han pagburot-an; an halipot nga saruwal, an kamisadentro ngan an panapton nga hilawig nga may mga granada palibot han sidsid.

⁹May-ada liwat mga kampanilya nga bulawan palibot han sidsid hini; sanglit kon naglalakat hiya binabati didto ha Templo an ira tinagingting ngan nahinunumdom an GINOO han iya katawhan.

¹⁰Iginhatag han GINOO kan Aaron an baraan nga panapton nga hilawig nga sinamay hin bulawan, asul, ngan granate: an tahob ha dughan nga may Urim ug Tummim;[144]

¹¹an tingkal nga pula nga ginhimo hin batid nga magharablon, an mahal nga mga bato nga may mga ngaran nga gin-uhit dida hini, nga iginbutang hin platero dida hin pudong nga bulawan, ngan igintaod dida han tahob ha dughan ha pagpahinumdom han GINOO han dose nga mga tribo han Israel.

¹²Iya iginhatag ha iya an turban nga may bulawan nga sabong nga ginuhitan han mga pulong, “Iginhalad ngadto han GINOO.” Mahusay gud ini nga kabuhat, usa nga matahom nga arte, ngan dako nga dungog an pagsul-ot hini.

¹³Waray pa gud hikit-i in sugad ka magtahom nga mga butang han waray pa hi Aaron. Waray pa gud tawo nga nakagsul-ot hini labot kan Aaron ngan an iya mga tulin.

¹⁴Iginhalad in mga pagkaon hin makaduha ha usa ka adlaw ngan pagtutuboron gud ini hin maupay.

¹⁵Gin-ordenan ni Moises hi Aaron ha iya katungdanan pinaagi hin pagdihogi hin lana nga baraan an iya ulo. Ginhimo in usa nga dayon nga Ginsaaran ha iya ngan han iya mga tulin nga mag-aalagad hira han GINOO sugad nga iya kapadian ngan magbebendisyon han mga tawo ha ngaran han GINOO.

¹⁶Ginpili han GINOO hi Aaron tikang han ngatanan nga katawhan hin paghalad hin mga hayop nga tinubod, pagtubod hin insyenso nga mahamot ha pagpahinumdom han GINOO han iya katawhan ngan pagkuha han ira mga sala.

¹⁷Igintapod niya kan Aaron an mga sugo ngan iginhatag ha iya an gahom hin pagtuhay hin mga kalipongan ngan pagtutdo han Balaod ngadto han Israel.

¹⁸Nakausa, samtang nakadto ha kamingawan an mga tawo, may-ada nasisina nga hugpo hin mga awaanon nga mga taga gawas nga tawo nga nagsarabot kontra kan Moises. Amo ini hira Datan, Abiram, ug Core kaupod an ira mga kabulig.

¹⁹Hinkit-an han GINOO kon ano an ira binubuhat ngan nasina hiya, duro an iya kapungot nga ginbuhat niya in usa nga milagro ngan ginpuo hira pinaagi hin naglalahinggab nga kalayo.

²⁰Niyan ginbalos liwat niya hi Aaron, nga gintagan niya hin talagsaon nga pasidungog: an katungod hin paghalad han syahan nga mga abot, basi magkamay-ada igo nga pagkaon an kapadian.

²¹An ira pagkaon amo an mga halad nga iginhalad ngadto han GINOO; iginhatag ini han GINOO ngadto kan Aaron ngan han iya mga tulin.

²²Kundi hi Aaron, diri sugad han iba nga mga tawo, diri manununod hin tuna, waray niya linain nga bahin han iya kalugaringon. An GINOO gud la amo an iya malon. Hi Pinehas

²³Hira Moises ug Aaron la an labaw ka bantogan kay kan Pinehas nga anak ni Eleazar tungod han ira dako nga kasindak ha pag-alagad han GINOO. Ginbuhat ni Pinehas an pagpasaylo han sala ni Israel pinaagi hin pagtindog nga madig-on upod an maisog nga pagtalinguha samtang may-ada karibok an mga tawo.

²⁴Sanglit naghimo an GINOO hin ginsaaran ha iya para han ngatanan nga panahon nga tiarabot nga hiya magigin tinaporan han balay han Dyos ngan han iya katawhan, nga kakaptan niya ngan han iya mga tulin ha kadayonan an katungdanan han Labaw nga Padi.

²⁵Diri sugad han ginsaaran nga ginhimo kan David nga anak ni Isai, nga tikang han tribo ni Juda, nga an pagkahadi pagsusundon la han anak tikang han amay, an pagkapadi magpapadayon tikang kan Aaron ngadto han ngatanan niya nga mga tulin.

²⁶Yana pagdayawa an GINOO kay maupay hiya nga nagkorona ha imo hin himaya![145] Hatagan ka unta niya hin kinaadman basi magkaghukom ka hin matadong han iya katawhan ngan tungod hini an ira kamainuswagon ngan an imo pagburot-an[146] magpadayon unta ha mga panahon nga tiarabot.