Read Waray Samarenyo Meaning Based Sirac 46 Bible Online

Sirac 46 - Waray Samarenyo Meaning Based bible

Sirac 46

¹Hi Josue Hi Josue[147] nga anak ni Nun usa nga makarit nga sondalo ngan nagsunod hiya kan Moises hin pagkamanaragna. Ginpamatud-an niya an kahulogan han iya ngaran sugad nga dako nga magtaralwas ha kanan GINOO ginpili nga mga tawo. Ginpirde niya an mga kaaway nga sinmulong ha ira basi makaangkon na liwat an Israel han iya kalugaringon nga tuna.

²Hin kamakatarag-ob pagkit-on han pag-alsaha niya han iya kamot ngan nangulo hiya han mga pagsulong ngadto han mga syudad!

³Waray gud nailob hin pag-ato ha iya;[148] nakig-away hiya hin baraan nga araway para han GINOO.

⁴Panumdoma kon gin-unan-o niya hin pagpugong nga diri makalakat an adlaw, sanglit an usa ka adlaw nagin sugad ka hilaba hin duha ka adlaw?

⁵Han sinusulong hiya paluyoluyo han iya mga kaaway, nag-ampo hiya ngadto han gamhanan nga Gilalabawi nga GINOO, ngan ginbaton an iya pag-ampo pinaagi hin makusog hin duro nga uranos hin yelo.

⁶Ipinusdak han GINOO an mga bato nga yelo ngada han kaaway[149] ngan ginbungkag hira didto han kapig-otan ha Betoron, basi makakilala an mga nasod kon naunan-o kakusog hi Josue, tungod nga nakig-away hiya sugad nga usa nga maunongon nga sumusunod han GINOO. Hi Caleb

⁷Maunongon hi Josue samtang buhi pa hi Moises, hiya ngan hi Caleb nga anak ni Jefune. Inatohan nira an bug-os nga bungto, ginpahunong nira an ira waray haros nga pagnginurutob ngan ginpudngan hira hin pagpakasala.

⁸Tikang han 600,000 nga mga Israelita nga naglatas han kamingawan, amo la ini nga duha an natalwas ngan gintugotan hin pagsulod han hura ngan magtambok nga tuna nga pagtatag-iyahon nira.

⁹Ginpakusog hi Caleb han GINOO, ngan han tigurang na hiya, makusog la hiya gihapon hin pagsagka ngadto han sagkahon nga tuna nga aangkonon niya ini para ha iya ngan han iya mga tulin.

¹⁰Niyan makikita han bug-os nga Israel kon ano hin kamaupay an pag-alagad han GINOO. Mga Maghurukom

¹¹Niyan nakada liwat an mga maghurukom, kada usa bantogan han iya kalugaringon nga panahon, mga tawo nga waray gud mahulog ngadto hin pagsingba hin mga diyosdiyos ngan waray gud magsalikway han GINOO.

¹²Pagpasidunggan unta an hinumdoman ha ira! Mabuhi unta liwat dida han ira mga anak ini nga aton mga ginpapasidunggan! Hi Samuel

¹³Ginhigugma han GINOO hi Samuel. Sugad nga manaragna han GINOO, gintukod niya an ginhadian ngan nagtudlok hiya hin mga punoan para han mga tawo.

¹⁴Ginhukman niya an nasod sumala han Balaod han GINOO, ngan ginpanalipdan han GINOO an Israel.

¹⁵Tungod nga matinumanon hi Samuel, ginkarawat hiya sugad nga usa nga matuod nga manaragna. Ginsarigan hiya han mga tawo sugad nga usa nga manaragna tungod han iya mga pulong.

¹⁶Han gintatarhog hiya paluyoluyo han iya mga kaaway, nagtawag hiya han gamhanan nga GINOO ngan naghalad hiya hin nati nga karnero sugad nga usa nga halad nga tinubod.

¹⁷Niyan dinmalugdog an GINOO tikang ha langit upod in dako nga tingog

¹⁸ngan pinamatay niya an ngatanan nga kaaway[150] nga mga punoan han Filistia.

¹⁹Han tikamaratay na hi Samuel, nagsumpa hiya ha atubangan han GINOO ngan han gindihogan nga hadi nga waray gud hiya kumuha hin hiagi tikang hin bisan hin-o bisan na man la usa ka padis nga sandalyas ngan waray usa ka tawo nga rinmiwa ha iya.

²⁰Bisan han katapos niya mamatay, igintagna niya ngadto kan Hadi Saul an iya kamatayon. Tikang han lubnganan naghimangraw hiya sugad nga manaragna hin pagpara han pagkamaraot han iya mga tawo.