Read Waray Samarenyo Meaning Based Sirac 47 Bible Online

Sirac 47 - Waray Samarenyo Meaning Based bible

Sirac 47

¹Hi Natan Sinmunod ha iya hi Natan, usa nga manaragna ha panahon ni David. Hi David

²Sugad nga iginggahin para han GINOO an gitatamboki nga bahin han halad han pagkaurosa, sanglit ginpili hi David tikang han mga Israelita.

³Nakig-uyag hiya hin mga liyon ngan mga uso nga daw sugad la hin nati nga mga karnero o nati nga mga kanding.

⁴Han bata pa hiya, ginpatay niya in usa nga higante basi matalwas an iya mga tawo. Ginbutang niya in usa nga bato dida han iya labyog, itinadong niya ngadto han higante ngan gintapos niya an paghinambog ni Goliat.

⁵Nag-ampo hiya han GINOO nga Gihahataasi, ngan gintagan hiya han kusog hin pagpatay hadto nga bantogan nga sondalo, basi magkamay-ada pagtahod an mga nasod para han gahom han iya mga tawo.

⁶Ginpasidunggan hiya han mga tawo tungod hin pagpatay niya han tag 10,000 nga mga sondalo han kaaway ngan han pagkoronahi na ha iya nga hadi, gindayaw hiya nira tungod nga ginpili hiya han GINOO.

⁷Ginpuo niya an ngatanan nga iya mga kaaway, ngan gindugmok niya ha kadayonan an mga Filisteo, sanglit waray na gud hira mahimo nga tarhog.

⁸Han ngatanan nga iya nabuhat, nagpapasalamat hi David ngadto han Baraan nga GINOO, an Gihahataasi. Ginhigugma niya an iya Magburuhat ngan nagkanta hiya hin mga pagdayaw ngadto ha iya ha bug-os niya nga kasingkasing.

⁹Nagbutang hiya hin mga magkaranta didto han altar hin paghatag hin matahom nga mga kanta.

¹⁰Ginpahimutang niya an panahon han mga pyesta ha bug-os nga tuig ngan ginhimo ini nga makaruruyag nga mga higayon; nag-aningal an Templo han mga pagdayaw han GINOO ha bug-os nga adlaw.

¹¹Ginpasaylo han GINOO an sala ni David ngan ginparig-on ha kadayonan an iya gahom. Naghimo hiya hin ginsaaran ha iya nga maghahadi nga mahimayaon hiya ngan an iya mga tulin ha Israel. Hi Solomon

¹²Nag-andam hin maupay hi David para han iya anak nga usa nga makinaadmananon nga tawo, nga maghahadi sunod ha iya.

¹³Waray gud araway samtang nga hadi hi Solomon. Gintagan hiya han Dyos hin kalinaw ha ngatanan niya nga mga pag-ultan, basi makagtindog hiya para han GINOO hin usa nga Templo nga magpapadayon ha kagihaponan.

¹⁴Hin pagkamakinaadmananon nimo, Solomon, han batan-on ka pa! An imo hibaro sugad han Nilo[151] kon nabaha.

¹⁵An gahom han imo kinaadman nagsarang ha bug-os nga kalibutan; hinbaroan ha ngatanan nga mga dapit an imo mga darahonon ngan mga tirigohon.

¹⁶Bantogan ka ha ngatanan nga dapit, ngan ginhigugma ka han ngatanan nga mga tawo tungod han imo pagdara hin kalinaw.

¹⁷Gindayaw ka han mga nasod ha bug-os nga kalibutan tungod han imo mga karantahon, mga darahonon, mga pananglitan ngan manamit nga mga puplonganon.

¹⁸Ha ngaran han GINOO nga Dyos han Israel nagtirok ka hin salapi ug bulawan nga daw sugad la ini hin timga o lata.

¹⁹Kundi an imo pagkaipa hin kababayen-an amo an imo pagkapukan.

²⁰Ginhugawan mo an imo kabantogan ngan han imo mga anak. Nag-antos hira hin kastigo tungod hini nga imo kalurongan ngan nakahatag ha ira hin dako nga kabidoan.

²¹Nakagbahin ini han nasod, ngan pinmakita in usa nga ribal nga ginhadian ha amihan nga dapit han Israel.

²²Kundi dayuday magmamaloloy-on an GINOO ngan magtutuman hiya han ngatanan nga iya mga saad.[152] Diri gud hiya magpupuo han mga anak ni David nga iya ginpili ngan nahigugma ha iya. Sanglit tungod han Israel tinugotan niya nga magpabilin nga buhi an panimalay ni David. Hira Roboam ug Jeroboam

²³Namatay hi Solomon sugad han iya mga ginikanan ngan nagbilin hin usa han iya mga anak nga sumunod ha iya hin pagkahadi. Amo ini hi Roboam nga usa ka tawo nga gutiay la in hibaro ngan dako in kalurongan[153] kanay paagi nakapasupil han mga tawo. Nakada liwat an uraura hin kawaray haros[154] nga Jeroboam, nga nagmando han amihan nga dapit han Israel dida hin makasasala nga mga paagi.

²⁴Nagin makasasala hin duro an iya mga tawo sanglit iginhalin hira tikang han ira tuna.

²⁵Ginsarihan nira an ngatanan nga pagkamaraot tubtob nga inmabot ha ira an pagbulos han GINOO.