Read Waray Samarenyo Meaning Based Sirac 48 Bible Online

Sirac 48 - Waray Samarenyo Meaning Based bible

Sirac 48

¹Hi Elias Pinmakita liwat an maisog nga manaragna nga hi Elias, kanay mga pulong naglalaga sugad hin sulo.

²Gindad-an niya hin gutom an mga tawo ngan damo ha ira an nagkamatay tungod han iya tinguha nga magpadayon ini nga gutom.

³Ha pagyakan niya ha ngaran han GINOO, ginpudngan niya an uran ngan hin tulo ka higayon ginpauran niya hin kalayo.

⁴Elias, makaaramdok an imo mga milagro! Waray na gud iba nga makakapanhambog hin sugad nga mga binuhatan!

⁵Ha ngaran han Gihahataasi, ginbanhaw mo liwat in mga patay nga tawo.

⁶Imo gintagan an bantogan nga hadi hin sakit ngan namatay hiya.

⁷Didto ha Sinai hinbatian mo an GINOO nga nagsaway ha imo ngan nagpahayag han iya tinguha hin pagkastigo han iya mga kaaway.

⁸Gindihogan mo in usa nga hadi nga magin garamiton hito nga pagkastigo ngan hin usa nga manaragna nga masaliwan ha imo.

⁹Gindara ka ngadto ha langit dida hin kalayo nga buhawe, usa nga karuwahe nga ginsasaog hin nagkakalayo nga mga kabayo.

¹⁰Nasiring an kasuratan nga andam ka hin pagpakita dida han igintalaan nga panahon,[155] basi hugpoyon mo an kasina han Dyos ha diri pa ini maulyab ha kapungot; nga imo pagtitirokon liwat an mga amay ngan mga anak, ngan ibabalik mo an mga tribo han Israel.

¹¹Palaran adton mga buhi pa hin pagkita ha imo kon makanhi ka, sugad man adton mga nagkamatay na ha paghigugma, kay mabubuhi man liwat kami.[156] Hi Eliseo

¹²Han katahobi kan Elias han buhawe, napuno hi Eliseo han iya espiritu. Samtang buhi pa hiya, waray hiya kahadlok hin mga punoan, ngan waray gud ha ira may nakagarong ha iya.

¹³Waray gud bisan ano nga makuri para ha iya. Bisan han patay na hiya, nagpakita pa hin milagro an iya lawas.

¹⁴Han buhi pa ngan han patay na hiya, nagbuhat hiya hin mga urosahon nga mga milagro.

¹⁵Kundi bisan pa hini ngatanan, waray gud bayai han mga tawo an ira mga sala, tubtob han pagdad-a ha ira sugad nga mga priso tikang han ira tuna ngan ginpasarang hira ha bug-os nga kalibutan. Gutiay na la an nahisalin han nasod, kundi adton mga nanhisalin gindumara pa han mga tulin ni David.

¹⁶Nagbuhat in pira han mga tawo hin mga butang nga nakalipay han GINOO, kundi nagpinakasala an iba ha ira. Hi Ezequias

¹⁷Gin-andam ni Ezequias an iya syudad basi makadto hin mga pagsulong ngan nag-andam hira hin surodlan hin tubig para hini nga tuyo. Naghimo hira hin tunel pinaagi hin pag-ukab han bato ginamitan hin puthaw nga mga kasangkapan. Nagpahimo liwat hin mga surodlan hin tubig.

¹⁸Sulod han panahon han iya paghadi, ginsulong si Senaquerib an syudad ngan ginsugo an iya labaw nga opisyal tikang ha Laquis. Gin-ayat niya an Jerusalem ngan naghinambog hiya.

¹⁹Nawad-an hin kaisog an mga tawo ngan nangurog hira hin kahadlok; inmabot hira hin kasakit sugad hin babaye nga tipag-aranak!

²⁰Kundi nag-ampo hira han GINOO nga maloloy-on, an Usa nga Baraan ha langit, ngan pinamatian dayon an ira mga pag-ampo. Ginpadara hi Isaias hin pagtalwas ha ira.

²¹Ginhampak han GINOO an kampo han mga taga-Asiria ngan ginpuo hira han iya anghel.

²²Ginbuhat ni Ezequias an nakalipay han GINOO ngan ginsunod niya nga marig-on an susbaranan han iya ginikanan nga hi David. Amo ini an iginsugo han dako nga manaragna nga hi Isaias kanay panan-awon kasasarigan.

²³Ha iya panahon ginpaisol niya an adlaw ngan ginpahilaba niya an kinabuhi han hadi.

²⁴Ginliaw niya an mga magsulob-on ha Jerusalem. Naglantaw an iya gamhanan nga espiritu ngadto han panahon nga tiarabot,

²⁵ngan nagtagna hiya han mahinanabo ha diri pa maabot an pagkatapos han panahon, mga tinago nga mga butang nga waray pa mahinabo.