Read Waray Samarenyo Meaning Based Sirac 49 Bible Online

Sirac 49 - Waray Samarenyo Meaning Based bible

Sirac 49

¹Hi Josias Sugad hin kahamot an ngaran ni Josias han alimyon hin mahusay nga pagkasakot nga insyenso, sugad kamatam-is hin pagtilaw[157] hin dugos, sugad hin tokar pinadisan hin irimnon dida hin sasaro.

²Ginsunod niya an matadong nga paagi hin pagtadong han nasod ngan ginkuha niya an mga makaharadlok nga mga buruhaton han pagsingba hin mga diyosdiyos.

³Maunongon gud hiya han GINOO ngan ginparig-on niya an matuod nga tuloohan hadto nga nag-agi nga maraot nga mga panahon. Hi Jeremias

⁴Labot kanda David, Ezequias, ug Josias, makalilisang nga mga makasasala an ngatanan nga kahadian, kay ginbayaan nira an Balaod han Gihahataasi ngadto gud han sidsid han ginhadian.[158]

⁵Igintubyan nira an ira gahom ug kadungganan ngadto hin mga lumalangyaw,

⁶nga nagsunog han syudad nga baraan, ngan ginbayaan an mga kalsada hini sumala han igintagna ni Jeremias.

⁷Ginpakaalohan nira hi Jeremias, bisan kon ginpili na hiya nga manaragna han waray pa hiya katatawo, “basi maggabot ngan magpukan, magbungkag ngan magpuo” kundi “magtindog ngan magtanom” liwat. Hi Ezekiel

⁸Amo adto hi Ezekiel an ginpakita han panan-awon han langitnon nga himaya nga nakada ha igbaw han karuwahe ngan han buhi nga mga binuhat.

⁹Naghinabi liwat hiya han manaragna nga hi Job nga dayuday nagbuhat han matadong.[159] An Dose nga mga Manaragna

¹⁰Mabanhaw unta tikang ha lubnganan an mga tul-an han dose nga mga manaragna tungod nga nakagpadasig ini nga mga tawo han nasod han Israel ngan nagtalwas ha ira hin masarigon nga paglaom. Hira Sorobabel ug Josue

¹¹Uunanhon ta pagdayaw kan Sorobabel? Sugad hiya hin singsing nga iginbutang ha tuo nga kamot han GINOO,

¹²sugad kan Josue nga anak ni Josadac. Gin-otro nira pagtindog an Templo nga iginpahinungod para han dayon nga kabantogan. Hi Nehemias

¹³Kinahanglan liwat hinumdoman ngan pasidunggan hi Nehemias. Gin-ayad niya an naruba nga mga pader han Jerusalem; iginbutang niya an mga ganghaan ngan mga trangka. Gintindog niya an aton mga puroy-anan. An Mga Patriarka

¹⁴Waray pa tawo nga nabuhi dinhe ha tuna nga sugad kan Enoc, kay gindara hiya nga buhi ngadto ha langit.

¹⁵Waray pa liwat natawo nga sugad kan Jose;[160] ginpasidunggan bisan pa an iya mga tul-an.[161]

¹⁶Ginpasidunggan hira Sem, Set, ug Enos,[162] kundi labaw gud han ngatanan nga mga binuhat an himaya ni Adan.