Read Waray Samarenyo Meaning Based Sirac 51 Bible Online

Sirac 51 - Waray Samarenyo Meaning Based bible

Sirac 51

¹An Kanta hin Pagpasalamat Nagpapasalamat ako ha imo, O GINOO ngan Hadi, gindadayaw ko ikaw nga akon Dyos ug Magtaralwas. Nagpapasalamat ako ha imo,

²kay ginbuligan ngan ginpanalipdan mo ako. Gintalwas mo ako ha kamatayon, han magpakaharadlok ngan buwa nga mga pagbutangbutang.

³Ginbuligan gud ako han waray gud may napaid ha akon, ha imo dako nga kalooy gintalwas mo ako, han damo nga mga kakurian nga akon gin-agian: han mapintas nga pagdumot han akon mga kaaway, nga karuyag magtapos han akon kinabuhi,

⁴han diri ko pakaginhawa dida han madakmol nga aso nga nag-uusbok tikang hin mga kalayo nga waray ko pagsuriti,

⁵han kamatayon ngahaw, han mga magraogdaog nga butangbutang nga iginsumat ngadto han hadi.

⁶Makausa inmatubang ako han kamatayon,

⁷ginpalibotan ako hin mga kaaway ha bisan diin nga dapit. Nangita ako hin tawo nga makakabulig ha akon, kundi waray ko hin-agian didto.

⁸Kundi nahinumdom ako, GINOO, han imo kamaloloy-on, ngan han imo ginbuhat han naglabay nga mga panahon. Hinnumdoman ko nga gintalwas mo adton nasarig ha imo, nga gintalwas mo hira ha ira mga kaaway.

⁹Niyan nag-ampo ako ha imo tikang dinhe ha tuna, nga talwason mo ako han kamatayon.

¹⁰Nag-ampo ako, “O GINOO, ikaw an akon amay,[170] ayaw ako pagpabay-i han akon mga kakurian dida nga waray mabulig ha akon kontra han magraogdaog nga akon mga kaaway.

¹¹Dayuday magdadayaw ako ha imo ngan magkakanta ako hin mga awit hin pagpasalamat.” Pinamatian mo an akon pag-ampo,

¹²ngan gintalwas mo ako han mga pagtarhog hin pagpatay ha akon. Sanglit nagpapasalamat ngan nagdadayaw ako ha imo. O GINOO, nagdadayaw ako ha imo! Ginpangita Ko an Kinaadman

¹³Han batan-on pa ako, san-o ako magtikang han akon mga paglakaton, nag-ampo ako para hin Kinaadman.

¹⁴Kinmadto ako ha Templo ngan nagpakiana ako hiunong ha iya, ngan bibilngon ko hiya samtang nga buhi pa ako.

¹⁵Tikang han akon pagkabatan-on ngadto gud han akon pagkalagas hiya an akon kalipay. Tikang pa han akon pagkabata ginsunod ko hin matadong an iya agianan.

¹⁶Dida han akon pagtikang hin pamati ha iya, kinarawat ko an Kinaadman ngan ginbalos ako hin dako nga hibaro.

¹⁷Dayuday usa ako nga magturoon ngan nagpapasalamat ako han ngatanan nga nagtutdo ha akon.

¹⁸Gintalinguha ko hin pag-ukoy hin kinabuhi nga makinaadmananon ngan ginpadayon ko an mga mag-upay nga buhat. Diri gud ako nagbabasol.

¹⁹Nakiaway ako para han Kinaadman ngan ginhirotan ko an akon mga panulos. Kon nag-aampo ako, iginkokompisal ko nga mabidoon ako tungod han kakulang hin Kinaadman.

²⁰Kundi gintalinguha ko gud an pagtag-iya ha iya, ngan hinkaplagan ko hiya pinaagi hin kawaray ko sala. Tinmubo ako ha kinaadman tikang pa han akon pakaagi ha iya ngan diri ko na gud hiya bubulagan.

²¹Tungod han akon dako nga ungara hin pakaagi ha iya, ginbalos ako hin maupay.

²²Gintagan ako han GINOO hin balos nga nakakagyakan ako hin maupay ngan ginamit ko ini hin pagdayaw ha iya.

²³Pakadi kamo ngatanan ha akon, kamo nga nagkikinahanglan hin pagtutdo ngan pag-aram kamo ha akon eskwelahan.

²⁴Kay ano nga nagtutug-an kamo nga mga tapang kamo ngan diri man la kamo nababaraka hiunong hini?

²⁵Iini an akon igsisiring: Waray bayad an pagkamay-ada kinaadman.

²⁶Isang-at niyo an yugo ngan pag-andam hin pag-aram. Dayuday hiraniay la an higayon.

²⁷Kitaa niyo ha iyo ngahaw nga waray gud ako mag-aram hin duro kundi hinkaplagan ko in dako nga kalipay.

²⁸Bisan magkadiano hin kadako han imo gasto hin pakaangkon hin Kinaadman, damo gud an pulos hini.

²⁹Pagpasalamat nga malipayon tungod han kalooy han GINOO, ngan ayaw gud kaawod hin pagdayaw ha iya.

³⁰Buhata an imo katungdanan ha igo nga panahon, ngan babaloson ka han GINOO ha takna nga iya igintalaan.