Read Waray Samarenyo Meaning Based Sirac 6 Bible Online

Sirac 6 - Waray Samarenyo Meaning Based bible

Sirac 6

¹ngan ayaw pakig-away; lugod pakigsangkay. Nagdadara ha imo hin maraot nga bantog an kaarawdan nga angay han buwaon nga mga makasasala.

²Ayaw pagpadara han mapaso mo nga mga kaipahon; susungayon ka hini sugad hin usa nga todo nga baka.[14]

³Babayaan ka sugad hin usa nga kahoy nga waray mga dahon o bunga.

⁴Makakapuo ha imo an maraot nga ungara ngan mahihimo ka nga pataraw-an ha imo mga kaaway. An Pakigsangkay

⁵Kon matinahuron ngan makiaangayon ka, magmamalipay ka han pakigsangkay ha imo han damo nga mga tawo.

⁶Pahiangay han kadam-an, kundi aro-i hin sagdon in usa la ka tawo dida hin usa ka yukot.

⁷Kon makigsangkay ka, ayaw dayon pag-apiki hin pagtapod ha ira; seguroha anay nga katataporan hira.

⁸May mga tawo nga kasangkayan mo la kon makakaupay ini ha ira, kundi diri mo hira maunong ha imo ha takna han kakurian.

⁹May kasangkayan nga mabulag ha imo tungod hin lantogi. Ginbubuyagyag pa nira an iyo ginkalantugian sanglit ginpapakaalohan ka nira.

¹⁰May iba nga makikigsaro ha imo ha lamesa samtang maupay an imo kamutangan. Mapahirani hira ha imo sugad han imo lambong ngan susugoon pa ngani nira an imo mga surugoon, kundi diri hira maunong ha imo ha takna hin kakurian.

¹²Kon magtitikakuri an imo kahimtang pababay-an ka nira, ngan diri ka na makakaagi ha ira.

¹³Pahirayo han imo mga kaaway ngan bantayi an imo kasangkayan.

¹⁴Sugad hin katataporan nga sirongan in usa nga sangkay nga maunongon. Pagbiling hin usa nga sangkay ngan nakaagi ka hin manggad.

¹⁵Waray na gud sugad hin kamahal kay hin maunongon nga sangkay; diri hiya mapapalit hin kwarta.

¹⁶Sugad hin bulong nga naghahatag hin maupay nga panlawas an usa nga maunongon nga sangkay. Makakaagi hin sugad nga sangkay adton nga may kahadlok la han GINOO.

¹⁷Makakaagi hin matuod nga kasangkayan an tawo nga may kahadlok han GINOO, kay dudumaraon niya an iya kasangkayan sugad han iya pagdumara han iya kalugaringon.[15] Pag-aram Tikang han Kinaadman

¹⁸Anak, pag-aram hin pagmahal han Kinaadman samtang bata ka pa, ngan makaagi ka pa ha iya kon matigurang ka na.

¹⁹Paniguroha an pamiling han Kinaadman sugad hin usa nga parauma nga nag-aarado ngan nagtatanom han iya kaumhan; niyan makakagpaabot ka hin maupay nga pag-ani. Pagkakabudlayan mo la ini hin madaliay, kundi makakagpahimulos hin diri maiha han iya mga bunga.

²⁰Para han diri disiplinado nga mga tawo makuri gud an mga inaaro han Kinaadman. Waray nira igo nga tinguha hin pagtuman hini.

²¹Maburubug-at nga pinas-an an iya mga inaaro nga diri hira karuyag hin pagdara, ngan binabayaan nira dayon.

²²An karuyag sidngon han “disiplina” amo gad la ini—disiplina,[16] ngan diri damo nga tawo an nakakadisiplina han ira kalugaringon.

²³Pamati, anak ko, ngan ayaw igsikway an akon sagdon.

²⁴Gaposa an imo mga tiil han mga kadena han Kinaadman ngan ibutang an iya yugo ha imo liog.

²⁵Pas-ana hiya ngan ayaw pag-uba han iya mga gapos.

²⁶Pagsunda an Kinaadman ngan pagsunod han iya mga paagi ha bug-os mo nga kasingkasing.

²⁷Pagbilnga hiya ngan imo hiya hikakaplagan. Kapti hiya ngan ayaw na gud buhii.

²⁸Niyan hiaagian mo an kamurayaw nga iya ihinahatag ngan magigin kalipay mo hiya.

²⁹An mga tigaman han pagkaoripon nga imo iginsusul-ot mahihimo nga tigaman hin pagkaharangdon. An iya mga kadena mahihimo nga imo panalipod ngan igsusul-ot mo an iya yugo sugad hin hadianon nga panapton.

³¹Igsusul-ot mo an Kinaadman sugad hin maranggat nga korona.

³²Anak, kon karuyag mo, mahibabaro ka. Magmamalisto ka kon imo gud karuyag.

³³Kon mahigugmaon ka hin pamati, mahibabaro ngan magigin makinaadmananon ka.

³⁴Tampo han katirok han mga tigurang; bilnga an tawo nga makinaadmananon ngan ayaw bulag ha iya.

³⁵Pag-andam hin pamati kon magyayakan an mainampoon nga mga tawo, ngan ayaw pagpalabya ha imo an bisan ano nga nagpapakita hin pakasantop han mahinanabo.

³⁶Kon makaagi ka hin tawo nga maaram, duawa hiya hin temprano pa; duawa hiya hin agsob tubtob han kapanas han taramakan han iya portahan.

³⁷Gamita an bug-os mo nga panahon hin pamalandong han mga sugo han GINOO ngan dayuday paghunahunaa an iya mga balaod. Tatagan ka niya han tukib nga sarabotan ngan kinaadman nga imo gin-uungara.