Read Waray Samarenyo Meaning Based Sirac 8 Bible Online

Sirac 8 - Waray Samarenyo Meaning Based bible

Sirac 8

¹Gamita an Kamay-ada Buot Ayaw pag-ayata in tawo nga may gahom; bangin mahulog ka ha iya mga kamot.

²Ayaw pakig-away hin riko nga tawo; bangin paghukipan niya in mga tawo hin pagkontra ha imo. Damo na nga mga tawo ngan kahadian an ginbungkag han bulawan.

³Ayaw pakiglantugi hin mayakan nga tawo; imo la dudugangan an iya kamayakan.

⁴Ayaw pagtawai in tawo nga maraot an batasan; bangin pagpakaalohan niya an imo mga ginikanan.

⁵Ayaw paghukmi in tawo nga nagbabasol na han iya mga sala. Hinumdomi nga makasasala kita ngatanan.

⁶Ayaw pagtamaya in tawo tungod kay lagas na hiya; an iba ha aton nagtitikalagas na.

⁷Ayaw ikalipay an pagkamatay hin usa ka tawo; hinumdomi nga kita ngatanan mapatay.

⁸Ayaw pagpasibay-i an ginhimangraw han mga mag-aram. Pag-admi an ira mga darahonon; tikang hini nga mga tawo mahibabaro ka hin dako nga kamaaram ngan hin pag-alagad han mga dumagko.

⁹Pamatii an iginsisiring han mga kalagsan kay hinbaroan nira ini tikang hadton mga nag-una ha ira. Mahibabaro ka tikang ha ira ngan makakagtutdo hira ha imo kon uunanhon hin kaandam hin pagbaton ha takna han imo pagkinahanglan.

¹⁰Ayaw pagtagi in usa nga makasasala hin higayon hin pakasala. Bangin la lugod ikaw an madaot; masayunay la ini sugad hin kapaso kon ginsusung-an mo an kalayo.

¹¹Ayaw pagdara hin kasina han tawo nga waray pagkaawod. Bangin lubagon niya an imo mga pulong ngan gamiton niya ini kontra ha imo.

¹²Ayaw pagpautang hin bisan hin-o nga tawo nga makurukusog kay ha imo. Kon buhaton mo ini, iisipon na la nga nawara ha imo.

¹³Ayaw pagpatapod hin pagbayad hin utang nga diri mo maaakos. Kon magpatapod ka kinahanglan nga andam ka hin pagbayad.

¹⁴Ayaw pagsalawad hin sumbong kontra hin usa nga maghurukom. Makakadaog hiya tungod han iya katungdanan.

¹⁵Ayaw upod hin paglakat hin tawo nga lisang. Makakasamok la ini ha imo. Bubuhaton niya an linurong nga iya naruruyagan ngan mapatay ka upod ha iya.

¹⁶Ayaw pakiglantogi hin tawo nga mapaso an ulo, o pagkadto hin dapit nga duha la kamo. Diri hiya nahahadlok hin pagpatay hin tawo ngan tutubalon ka dida nga waray may mabulig ha imo.

¹⁷Ayaw pangaro hin sagdon hin usa nga lurong. Diri hiya makakahimo hin pagtago han imo igsusumat ha iya.

¹⁸Ayaw pagbuhat hin bisan ano nga diri angay hibaroan ha atubangan hin diri kinikilala nga tawo. Diri ka maaram kon ano an mahinanabo kon imo ini buhaton.

¹⁹Ayaw ipadayag hin bisan kan kanay an imo tinago nga mga panhunahuna. Kon buhaton mo ini, daw sugad mo la hin ginkaragan an higayon han imo kalipayan.[18]