Read Waray Samarenyo Meaning Based Sirac 9 Bible Online

Sirac 9 - Waray Samarenyo Meaning Based bible

Sirac 9

¹Nagsagdon Hiunong hin Kababayen-an Ayaw pangabugho han imo asawa nga imo hinigugma. Pagtututdoan mo la hiya hin pagpakaraot ha imo.

²Ayaw igtubyan an imo kadungganan ngadto hin bisan hin-o nga babaye.

³Pahirayo han mga asawa han iba nga kalalaken-an;[19] bangin ka mabitik nira.

⁴Ayaw pakig-upod-upod hin kababayen-an nga mga parakanta; bangin ka nira paglimbongan.

⁵Ayaw pagtinutok hin usa nga uray nga daraga kay bangin ka mapirit hin pagbayad han balor hin usa nga asawa.

⁶Ayaw gud igtubyan an imo kalugaringon ngadto han kababayen-an nga magraot an bantog kay bangin mawad-an ka han ngatanan nga imo hiagi.

⁷Sanglit ayaw pagliningilingi ha mga kakalsadahan o pagsinudoysudoy ha mga dapit nga waray mga tawo.

⁸Ilingiw an imo mga mata kon hikit-an mo in matahum nga babaye. Ayaw pagpinanhunahuna han kamahusay hin babaye nga diri mo asawa. Damo nga kalalaken-an an naghikaraot tungod han katahom hin usa nga babaye.

⁹Ayaw pakigsaro hin babaye nga kanan iba asawa, o pakig-inom ha iya. Bangin ka masulay han iya kamahusay ngan mahulog ka ngadto hin karat-an tungod han imo mapaso nga pagbati. An Maupay nga Pakigsangkay

¹⁰Ayaw bayai in usa nga daan nga sangkay; diri ka gud makakaagi hin bag-o nga makakaliwan ha iya. Sugad hin bino an pagkasangkay; nagtitikarasa la ini samtang nag-iiha.

¹¹Ayaw kaawa han pag-uswag hin usa nga makasasala, kay diri ka maaram kon ano an iya kabubwason.

¹²Ayaw pagkalipay han nalilipayan han mga tawo nga diri natoo han Dyos; hinumdomi nga diri hira makakalikay han sirot samtang mga buhi pa hira.

¹³Kon pumahirayo ka han tawo nga may gahom hin pagpatay ha imo, diri ka magkikinahadlok tungod han imo kinabuhi. Kundi kon kinahanglan humirani ka man ha iya, pag-ikmat kay bangin ka niya pagpatayon. Isipa nga naglalakat ka dida hin tinago nga mga bitik, nga usa ka nga masayonay mabitik.

¹⁴Sugad han imo mahihimo, tinguhaa nga makilala mo an imo mga kahigrani, ngan pamatii an sagdon tikang la ha ira nga may-ada hiyas hin paghatag hin sagdon.

¹⁵Asay pakighimangrawi an mag-aram nga mga tawo, ngan an Balaod han Gihihitaasi amo an iyo paghinabihi.

¹⁶Pilia an magtadong nga mga tawo nga imo mga kasaro hin pagkaon. An imo pagkahadlok han GINOO amo an imo sadang iparayaw. An mga Punoan

¹⁷Gindadayaw in usa nga batid nga panday tungod han iya mga hinimo, ngan an kaaram hin usa nga pangulo ginpapamatud-an pinaagi han iya mga pulong.

¹⁸An paralibak ngan mayakan nga tawo nahahadlokan ngan gindudumtan han bungto.