Read Waray Samarenyo Meaning Based Isaias 10 Bible Online

Isaias 10 - Waray Samarenyo Meaning Based bible

Isaias 10

¹Maghihikaraot kamo! Naghihimo kamo hin diri magtadong nga mga balaod nga nagtatalumpigos han akon mga tawo.

²Amo ini an iyo paagi hin pagkuha han mga katungod ngan katadungan han mga kablas. Amo ini an iyo paagi hin pag-agaw han hiagi han mga balo nga kababayen-an ngan mga ilo.

³Mag-aano man kamo kon pagkastigohon na kamo han Dyos? Mag-aano man kamo kon pagdad-an kamo niya hin karat-an tikang hin hirayo nga nasod? Ngain man kamo dadalagan hin pakibulig? Diin man niyo tatagoa an iyo mga manggad?

⁴Pamamatayon kamo didto ha pag-awayan o pagdadanason kamo sugad nga mga priso. Kundi bisan pa ngani, diri mapupuypoy an kasina han GINOO, ngan andam la gihapon an iya kamot hin pagkastigo.

⁵Nagsiring an GINOO, “Asiria! Gagamiton ko an Asiria sugad hin balbag hin pagkastigo hadton akon mga nasisinahan.

⁶Ginsugo ko an Asiria hin pagsulong hin nasod nga diri natoo hin diyos, hin mga tawo nga nag-aghat ha akon hin kasina. Ginsugo ko hira hin panikas, pangawat, ngan pagtamaktamak han mga tawo sugad hin lamsaw dida han kakalsadahan.”

⁷Kundi an hadi nga Asiriahanon may-ada nahuhunahunaan nga magpintas nga mga larang. Naglarang hiya hin pagbungkag hin damo nga mga nasod.

⁸Naghihinambog hiya, “Hadi an kada usa han akon mga kapitan!

⁹Gindaog ko an mga syudad han Calno ug Carquemis ngan an mga syudad han Hamat ug Arfad. Gindaog ko an Samaria ug Damasco.

¹⁰Gin-abot ko hin pagkastigo adton mga ginhadian nga nagsisingba hin mga diyosdiyos, mga diyosdiyos nga darudamo pa kay hadton kanan Jerusalem ug Samaria.

¹¹Ginpukan ko an Samaria ngan an ngatanan nga mga diyosdiyos hini, ngan amo ngahaw an akon pagbubuhaton han Jerusalem ngan han mga ladawan nga ginsisingba didto.”

¹²Kundi nasiring an GINOO, “Kon mahuman ko na an akon ginbubuhat didto ha Bukid Sion ngan didto ha Jerusalem, pagkakastigohon ko an hadi han Asiria tungod han ngatanan niya nga paghambog ngan pagpahitaas.”

¹³Naghihinambog an hadi han Asiria, “Ako gud la an nagbuhat hini ngatanan. Makusog, makinaadmananon, ngan listo ako. Ginpara ko an mga pag-ultan hin mga nasod ngan ginkuha ko an mga manggad nga ira ginhimos. Sugad hin todo nga baka gintamaktamakan ko an mga tawo nga nag-uokoy didto.

¹⁴Sugad hin salag hin tamsi an mga nasod han kalibutan. Waray ako pagkuri hin pagkuha han ira mga manggad sugad nga masayonay in panguha hin mga bunay hin tamsi. Waray gud bisan usa nga tamsi nga nagbuklad han iya pako nga nagpalapaka hin pako, nagnganga ngan nagpiyaik hin paghadlok ha akon!”

¹⁵Kundi nasiring an GINOO, “Makakasiring ba in usa nga parakol nga larulabaw hiya hin kagamhanan kay han tawo nga nagamit hini? Labaw pa ba ka importante in usa nga lagadi kay han tawo nga nagamit han lagadi? Diri an balbag an nag-aalsa hin tawo, kundi an tawo an nag-aalsa hin balbag.”

¹⁶Magpapadara an GINOO nga Labi Kamakagarahum han sakit basi pagkastigohon niya adton mga mag-upay an panlawas yana. Dida ha ira dayuday magdidilaab in kalayo.

¹⁷Mahihimo nga kalayo an Dyos nga kapawa han Israel. Mahihimo nga usa nga laga an baraan nga Dyos han Israel, nga mag-uugtang han ngatanan sulod hin usa la ka adlaw, bisan han mga katungkan nga kabagwakan.

¹⁸Mabubungkag gud an maglangbo nga kaumhan ug kagurangan, ha amo nga paagi nga napatay in usa ka tawo tungod hin makamaratay nga sakit.

¹⁹Pira nala nga kahoy an mahisasalin, nga maiihap ini bisan hin gutiay nga bata.

²⁰Maabot in panahon nga an mga tawo han Israel nga nahisalin nga buhi diri na matapod han nasod nga haros magbungkag ha ira. Masarig na hira hin inungod han GINOO nga baraan nga Dyos han Israel.

²¹Mabalik in pira la han mga tawo han Israel ngadto han ira makagarahum nga Dyos.

²²Bisan kon yana damo an mga tawo han Israel sugad han mga baras ha baybayon, gutiay la ha ira in mabalik. Naghuhulat han mga tawo an ira kapukan, nga angay han ira pagkamaraot.

²³Tinuod, pagtutumanon han GINOO nga Dyos nga Labi Kamakagarahum an pagbungkag han bug-os nga nasod sumala han iya ginsiring.

²⁴Nasiring an GINOO nga Dyos nga Labi Kamakagarahum ngadto han iya mga tawo nga nag-uokoy didto ha Sion, “Ayaw kamo kahadlok han mga Asiriahanon bisan kon ginatatalumpigos kamo nira sugad han ginbuhat ha iyo han mga Ehiptohanon.

²⁵Diri na maiha tataposon ko an pagkastigo ha iyo, ngan katapos hini akon liwat hira pupukanon.

²⁶Ako nga GINOO nga Labi Kamakagarahum an maglalatob ha ira sugad han akon ginbuhat han mga tawo han Madian didto han Bato han Oreb. Kakastigohon ko an Asiria sugad han akon pagkastigo han Ehipto.

²⁷Kon umabot na ito nga panahon bubuhian ko kamo tikang han gahom han Asiria, ngan diri na kamo magpapas-an han ira yugo.”[21]

²⁸Ginrikupo han kaaway nga kasondalohan an syudad han Ayat.[22] Inmagi hira ha Migron. Iginbilin nira didto ha Micmas an ira mga kasangkapan.

²⁹Inmagi na hira han masigpit nga aragian ngan nagpapalabay hira han gab-i didto ha Geba. Nahahadlok hin duro an mga tawo didto han bungto han Rama ngan nanngalagiw an mga tawo didto ha Gabaa, an natawhan nga bungto ni Hadi Saul.

³⁰Goliat kamo nga mga tawo han Galim! Pamati kamo nga mga tawo han Laisa! Baton kamo nga mga tawo han Anatot!

³¹Nanngangalagiw an mga tawo han Madmena ug Gebim.

³²Yana nga adlaw an kaaway nakasalakay na han bungto han Nob, ngan didto inaalsa nira an ira mga kamauo kontra han Bukid Sion, kontra han syudad han Jerusalem.

³³Rurumpagon hira han GINOO nga Labi Kamakagarahum sugad hin mga sanga nga nagkabanggi tikang hin usa nga kahoy. Pagpapaubson ngan pagpapakaalohan an labi ka mapinahitas-on ngan an labi ka gamhanan ha ira.

³⁴Pupuohon hira han GINOO sugad hin mga kahoy nga ginpulod hin parakol didto han butnga han kagurangan, sugad nga kapukan han labi ka maupay nga mga kahoy han Libano!