Read Waray Samarenyo Meaning Based Isaias 11 Bible Online

Isaias 11 - Waray Samarenyo Meaning Based bible

Isaias 11

¹Sugad hin kahoy nga ginpulod an hadianon nga panimalay ni David; kundi sugad nga nananaringsing an puno han kahoy nga ginpulod, mabangon man in bag-o nga hadi tikang han mga tulin ni David.

²Mahatag ha iya hin kinaadman an espiritu han GINOO, ngan hin hibaro ngan hin kaabtik hin paghadi han mga tawo han GINOO. Makakasabot hiya han kaburut-on han GINOO ngan han pagtahod ha iya,

³ngan malilipay hiya hin pag-alagad han GINOO. Diri hiya maghuhukom sumala han iya hinkikit-an o hinbabatian;

⁴maghuhukom hiya hin matadong han mga kablas, ngan maugop hiya han mga katungod han mga magpakalolooy. Pinaagi han iya sugo pagkakastigohon niya an mga tawo, ngan papatayon niya an magraot nga mga tawo.

⁵Matadong ngan maligdong an iya paghadi han iya mga tawo.

⁶Magtatampo nga malinawon an mga lubo ngan mga karnero, ngan madirig an mga leyopardo han nati nga mga kanding. Magsasaro an nati nga mga baka ngan hati nga mga liyon, ngan pagmamangnoan ini hin gudti nga kabataan.

⁷Magsasaro an mga baka ngan mga uso, ngan magdidirig nga malinawon an ira mga nati. Makaon an mga liyon han uhot nga kinakaon han mga baka.

⁸Diri paglalabtan bisan in usa nga minasus-an kon mag-uyag hiya hirani hin malara nga halas.

⁹Didto ha Sion nga baraan nga bukid han Dyos mawawaray gud bisan ano nga nakakadarahog o maraot. Mapupuno an tuna han hibaro han GINOO sugad nga puno hin tubig an kadagatan.

¹⁰Maabot in adlaw nga magigin tigaman han mga nasod an bag-o nga hadi nga tikang han hadianon nga panimalay ni David. Magtititirok hira didto han iya hadianon nga syudad ngan pagpapasidunggan hiya nira.

¹¹Kon umabot na ini nga adlaw gagamiton na liwat han Ginoo an iya gahom ngan pauulion adton iya mga tawo nga nahibilin didto ha Asiria, ha Ehipto, didto han katunaan han Patros, Sudan, Elam, Babilonia, ug Hamat, ngan didto han kabaybayonan ngan mga puro ha dagat.

¹²Iisahon han GINOO in tigaman nga bandera ha pagpakita han kanasoran nga gintitirok na liwat niya an nagsarang nga mga tawo han Israel ug Juda, ngan ibabalik hira tikang han upat nga mga kanto han tuna.

¹³Diri na maaawa han Juda an ginhadian han Israel, ngan diri na magigin kaaway han Israel an Juda.

¹⁴Mag-uusa hira hin pagsulong han mga Filisteohanon didto ha katundan ngan hin panikas han mga tawo nga nag-uokoy didto ha sinirangan. Pagsasakopon nira an mga tawo han Edumea ug Moab, ngan magsusugot ha ira an mga tawo han Amon.

¹⁵Pahuhubson han GINOO an Dagat Suez ngan pahuhuypon niya in mapaso nga hangin basi magmara an Eufrates, ngan magbibilin hin pito la nga gudtiay nga mga sapa, basi makatabok in bisan hin-o nga maglakat.

¹⁶Mag-aandam hiya hin hiluag nga baraktasan tikang ha Asiria para hadton iya mga tawo, an Israel, nga nahisalin nga buhi didto, sugad nga may-ada dalan para han ira kaapoy-apoyan hadto han paggawas nira han Ehipto.