Read Waray Samarenyo Meaning Based Isaias 15 Bible Online

Isaias 15 - Waray Samarenyo Meaning Based bible

Isaias 15

¹Mensahe ini mahitungod han Moab. Nabungkag ha usa la ka gab-i an mga syudad han Ar ug Kir, ngan nagmamingaw an tuna han Moab.

²Sinmagka han pungtod an mga tawo han Dibon[24] hin pagtangis didto han siringbahan nga dapit. Nagnguyngoy an mga tawo han Moab tungod han mga syudad han Nebo ug Medeba; nagkiskis ngan nagbarbas hira tungod hin kabido.

³Nagbado hin sako an mga tawo dida han kakalsadahan; mabidoon ngan nanangis an mga tawo dida han mga plasa han syudad ngan didto han mga atop han ira mga balay.

⁴Nagnguyngoy hin dagko nga tingog an mga tawo han Hesebon ug Eleale, ngan hinbatian an ira pagtangis tubtob ha Jehasa. Nangurog bisan an mga sondalo; waray na an ira kaisog.

⁵Nasubo an akon kasingkasing tungod han Moab! Nanmalagiw an mga tawo ngadto han bungto han Zoar ug Eglat Selisiya. Nagsagka han dalan an iba ngadto ha Luhit ngan naglakat hira nga nagtitinangis; nanmalagiw nga tugob hin kabidoan an iba ngadto han Horonaim.

⁶Nagmara an sapa han Nimrim, nanlaya na an mga banwa ha ligid han sapa, ngan waray na an malangbo nga kabanwaan.

⁷Ginlatas han mga tawo an Kahamub-an ha ligid han Salog Zered, ngan nagtinguha hira hin pagpalagiw dara an ngatanan nira nga mga hiagi.

⁸Hinbatian an aringasa hin pagtangis ha bisan diin nga mga pag-ultan han Moab. Hinbatian ini didto han mga bungto han Eglaim ug Beer-Elim.

⁹Didto han bungto han Dibon mapula an salog tungod hin dugo, ngan nag-andam an Dyos hin labi pa kamaraot nga butang para han mga tawo didto. Tinuod, malasaw in mga dugo tungod han pamatay han ngatanan nga nahibilin didto ha Moab.