Read Waray Samarenyo Meaning Based Isaias 17 Bible Online

Isaias 17 - Waray Samarenyo Meaning Based bible

Isaias 17

¹Nagsiring an GINOO, “Diri na syudad an Damasco; usa na la nga tambak hin mga rinuba.

²Babayaan ha kadayonan an mga syudad han Siria.[26] Usa na la nga panabsaban hin kakarnerohan ug kabakahan ngan mga layaw la ini hira.

³Waray panalipod an Israel ngan diri na talwas an Damasco. Maaalohan sugad han mga tawo han Israel adton mga Siriahanon nga mahisalin nga buhi. Ako nga GINOO nga Labi Kamakagarahum an nagyakan.”

⁴Nagsiring an GINOO, “Maabot in adlaw nga matatapos an pagkagamhanan han Israel ngan mapopobre ini nga riko nga tuna.

⁵An Israel daw usa nga uma nga human na pag-anihi, masusugad hin kamamingaw hin usa nga uma didto han Kahamub-an han Refaim kahuman panguhai han iya mga abot.

⁶Gutiay la nga mga tawo an mahisasalin nga buhi, ngan masusugad an Israel hin usa nga olibo nga pinannguhaan han ngatanan nga mga bunga labot hin duha o tulo didto ha talimpungayan, o hin pira na la nga nahisalin dida han uruubos nga mga sanga. Ako nga GINOO nga Dyos han Israel an nagyakan.”

⁷Kon umabot na ito nga adlaw, madangop an mga tawo hin pagpabulig han ira Magburuhat, an baraan nga Dyos han Israel.

⁸Diri na hira matapod han mga altar nga ginhimo han ira kalugaringon nga mga kamot, o masarig han ira kalugaringon nga mga buhat—mga tigaman han diyosa Asera ngan han mga altar nga tuboran hin insyenso.

⁹Kon umabot na ito nga adlaw, babayaan in pinarig-on nga mga syudad ngan babayaan ini nga mga ruba sugad han mga syudad nga ginbayaan han mga Hibeohanon ngan han mga Amoreohanon[27] han pagpalagiw nira tikang han mga tawo han Israel.

¹⁰Israel, nangalimot ka na han Dyos nga nagtatalwas ngan nananalipod ha imo sugad hin marig-on nga bato. Nagtanom ka lugod hin baraan nga mga tanaman[28] para hin diyos basi magsingba ka hin langyaw nga kadiyosan.

¹¹Kundi bisan kon tinmurok ngan binmukod ini hito manta nga aga han imo pagtamna, waray la gihapon nimo aanihon labot hin mga kakurian ngan hin kasakit nga waray pagkatapos.

¹²Nagkasaramok in gamhanan nga mga nasod, nga may aringasa sugad han dinaguhob han dagat, sugad han kapusak hin dagko nga mga balod.

¹³Nasulong an mga nasod sugad hin nadasmag nga mga balod. Kundi sinasaway ini han Dyos ngan naisol ini. Ipinapalid ini sugad hin tapotapo ha ligid hin bukid, ngan sugad hin uhot nga ginsasarang hin buhawi.

¹⁴Ha pagkagab-i hira an nagdadara han kahadlok, kundi ha pagkaaga waray na ini! Amo ini an dadangatan han ngatanan nga naninikas han aton tuna.