Read Waray Samarenyo Meaning Based Isaias 2 Bible Online

Isaias 2 - Waray Samarenyo Meaning Based bible

Isaias 2

¹Iini an mensahe nga iginhatag han Dyos kan Isaias nga anak ni Amoz hiunong han Juda ug Jerusalem.

²Ha mga adlaw nga tiarabot an bukid nga tinitindogan han Templo amo an labi kahitaas han ngatanan, nga mananawantawan han ngatanan nga kapungtoran. Maawas ngadto hini in damo nga mga nasod,

³ngan masiring an ira mga tawo, “Sagka kita han pungtod han GINOO,[4] ngadto han Templo han Dyos han Israel. Basi pagtutdoan kita niya han karuyag niya ipabuhat ha aton; ngan maglakat kita dida han mga agian nga iya ginpili. Kay tikang ha Jerusalem an pagturon-an han GINOO; tikang ha Sion nagyayakan hiya han iya mga tawo.”

⁴Magtutuhay hiya hin mga kalipongan dida han dagko nga mga nasod. Pipilpigon nira an ira mga espada ngan hihimoon nga mga arado, ngan an ira mga bangkaw hihimoon nga mga garab. Diri na gud makikig-away an mga nasod, diri na gud mag-aandam para hin araway.

⁵Mga tulin ni Jacob, paglakat na kita dida han kapawa nga ihinatag ha akon han GINOO!

⁶O Dyos, iginsikway mo an imo mga tawo nga mga tulin ni Jacob! Puno an tuna hin mga pagdiwata nga tikang ha Sinirangan, ngan tikang ha Filistia.[5] Nagsusunod an mga tawo hin langyaw nga mga batasan.

⁷Puno an ira tuna hin salapi ug bulawan, ngan diri maiihap an ira mga manggad. Puno an ira tuna hin mga kabayo, ngan diri maiihap an ira mga karuwahe.

⁸Puno an ira tuna hin mga diyosdiyos ngan nagsisingba hira hin mga butang nga hinimo han ira kalugaringon nga mga kamot.

⁹Mahiuubos ngan maaalohan an ngatanan. Ayaw hira pagpasayloa, O GINOO!

¹⁰Matago hira ha sakob hin mga lungib didto han batoon nga kapungtoran, o magbubuho dida han tuna basi hira makalikay han kasina han GINOO ngan hin pagtago tikang han iya gahom ngan pagkaharangdon!

¹¹Maabot in adlaw nga matatapos an kamapinahitas-on han tawo, ngan mabubungkag an kaparayawnon han tawo. Niyan an GINOO na gud la an pagdadayawon.

¹²Dida hito nga adlaw papaubson han GINOO nga Labi Kamakagarahum an ngatanan nga gamhanan, an ngatanan nga mapinahitas-on ngan maparayawnon.

¹³Pagpupudlon niya an higtaas nga mga sidro han Libano ngan an ngatanan nga mga tuog didto ha tuna han Basan.

¹⁴Papatagon niya an higtaas nga kabukiran ngan kapungtoran,

¹⁵an tagsa nga hitaas nga torre, ngan an mga pader han tagsa nga kuta.

¹⁶Lulunoron niya bisan an labi kadagko ngan labi katahom nga mga barko.

¹⁷Matatapos an kamapinahitas-on han tawo ngan mabubungkag an kaparayawnon han tawo. Maaanaw an mga diyosdiyos ngan an GINOO na gudla an dadayawon dida hito nga adlaw.

¹⁹Matago an mga tawo ha sakob hin mga lungib didto han batoon nga kapungtoran, o magbubuho dida han tuna hin paglikay han kasina han GINOO ngan hin pagtago tikang han iya gahom ngan pagkaharangdon, kon kumanhi na hiya hin pagbay-og han tuna.

²⁰Kon umabot na ito nga adlaw, ilalabog nira an bulawan ug salapi nga mga diyosdiyos nga ira ginhimo, ngan babayaan nira ini ngadto han mga yatot ngan mga kulalaknit.

²¹Kon kumanhi na an GINOO hin pagbay-og han tuna, matago an mga tawo ha sakob hin mga buho ngan mga lungib didto han batoon nga kapungtoran hin paglikay han iya kasina ngan hin pagtago tikang han iya gahom ngan pagkaharangdon.

²²Ayaw na pagtapod dida hin mga tawo nga may kamatayon. Ano gud an ira kapulsanan?