Read Waray Samarenyo Meaning Based Isaias 20 Bible Online

Isaias 20 - Waray Samarenyo Meaning Based bible

Isaias 20

¹Ha ilarom han pagsugo ni Hadi Sargon han Asiria, ginsulong han gilalabawi nga kapitan han kasondalohan nga Asiriahanon an Filisteohanon nga syudad han Asdod.

²Tulo ka tuig an inmagi nga nagtugon an GINOO kan Isaias nga anak ni Amoz nga iya hukason an iya mga sandalyas ngan huboon an panapton nga sako nga iya ginsul-ot. Sinmugot hiya ngan naglinakat hiya nga hubo ngan waray sandalyas.

³Han kabihag na han Asdod, nagsiring an GINOO, “Naglinakat hi Isaias nga akon surugoon sulod hin tulo ka tuig nga hubo ngan waray sandalyas. Tigaman ini han mahinanabo ngadto han Ehipto ug Sudan.

⁴Pagtutugwayan han hadi han Asiria an mga priso nga iya nabihag nga mga hubo tikang han duha nga mga nasod. Maglalakat an mga batan-on ngan an mga tigurang nga hubo ug waray sandalyas, nga nakikita an ira mga pugtot, usa ini nga kaarawdan han Ehipto.

⁵Manluluya ha kaawod adton mga nagsarig han Sudan ngan nagparayaw han Ehipto, maluya na tungod hin kaawod ngan waray na nira paglaom.

⁶Kon umabot na ito nga panahon, masiring an mga tawo nga nag-uokoy didto han baybayon han Filistia, ‘Tan-awa daw an nahinabo han mga tawo nga aton ginsarigan basi panalipdan kita niya tikang han hadi han Asiria! Uunanhon naton hin paglikay nga diri kita mamatay?’”