Read Waray Samarenyo Meaning Based Isaias 21 Bible Online

Isaias 21 - Waray Samarenyo Meaning Based bible

Isaias 21

¹Mensahe ini mahitungod han Babilonia. Maabot in karat-an tikang hin usa nga makaharadlok nga tuna sugad hin buhawi nga nalabay ha kamingawan.

²Hinkit-an ko in usa nga panan-awon hin makalilisang nga mga hinabo, usa nga panan-awon hin paglingo ngan pagkabungkag. Sulong kamo, kasondalohan han Elam! Paliboti an mga syudad, kasondalohan han Media! Tataposon na han Dyos an pag-antos nga iginpahimutang han Babilonia.

³Makakahatag hin kahadlok ug hin kasakit ha akon an akon hinkit-an ngan hinbatian dida han panan-awon, kasakit nga sugad hin kanan babaye nga tipag-aranak.

⁴Duro hin kamalipong hiton akon ulo ngan nangungurog ako hin kahadlok. Karuyag ko na la nga umabot an kagab-ihon, kundi kahadlok man la an dinmangat ha akon.

⁵Dida han panan-awon andam na in panagtawo; ginbanigan na an salog nga panlilingkoran han mga dinapit. Nangangaon ngan nag-iirignom na hira. Tigda la nga nag-aningal an sugo, “Mga opisyal! Andama an iyo mga taming!”

⁶Niyan nagsiring ha akon an GINOO, “Kadto ngan pagbutang hin gwardya ngan tugona hiya nga igsumat niya an iya hinkit-an.

⁷Kon hikit-an niya in mga tawo nga naabot nga dikabayo nga padispadis, ngan in mga tawo nga nasakay hin mga asno ngan mga kamelyo, kinahanglan iya pagbantayan hira hin maupay.”

⁸Naggoliat an gwardya, “Sir, nagbinantay ako adlaw gab-i.”

⁹Tigda la, aadi na hira! Mga dikabayo ngan padispadis. Nagsusumat an gwardya, “Napukan na an Babilonia! Nanhirugmok dida ha tuna an ngatanan nga mga diyosdiyos nga ira ginsingba.”

¹⁰Akon katawhan nga Israel, ginggiok kamo sugad hin trigo, kundi yana igsusumat ko ha iyo an maupay nga sumat nga akon hinbatian tikang han GINOO nga Labi Kamakagarahum, nga Dyos han Israel.

¹¹Mensahe ini mahitungod han Edumea. May nagtawag ngadi ha akon tikang ha Edumea, “Gwardya, maiha pa ba mag-aga? Sumati ako kon san-o an gab-i matatapos.”

¹²Nabaton ako, “Maabot an kaagahon, kundi kahuman masunod an kagab-ihon! Kon karuyag mo liwat hin pagpakiana, balik la ngan pakiana.”

¹³Mensahe ini mahitungod han Arabia. Mga tawo han Dedan, kamo nga mga hugpo hin naglalakaton ha kamingawan ngan nagkakampo didto han waray tanom nga nasod han Arabia,

¹⁴paimna niyo an inuuhaw nga mga tawo nga mapakada ha iyo. Kamo nga mga tawo han tuna han Tema, pakaona niyo an mga kalagiw.

¹⁵Nanmalagiw an mga tawo ha paglikay han mga espada nga andam na hin pagpatay ha ira, han mga pana nga andam na hin pagpara ha ira, ngan han ngatanan nga kataragman han away.

¹⁶Niyan nagsiring ha akon an GINOO, “Sulod hin usa gudla ka tuig matatapos an pagkagamhanan han mga tribo han Kedar.

¹⁷An mga parapana, amo an giiisogi nga mga tawo han Kedar, kundi diri damo ha ira an mahisasalin. Ako nga GINOO nga Dyos han Israel an nagyakan.”