Read Waray Samarenyo Meaning Based Isaias 22 Bible Online

Isaias 22 - Waray Samarenyo Meaning Based bible

Isaias 22

¹Mensahe ini mahitungod han Kahamub-an han Panan-awon. Ano an nahinanabo? Kay ano nga nagsasaurog an ngatanan nga mga tawo han syudad didto han mga atop han kabablayan?

²Nagrurugyaw an bug-os nga syudad, nga puno hin aringasa ngan kasindak. An iyo mga tawo nga nagkamatay hin pakig-away waray ngatanan kamatay ha pag-awayan.

³Nagdadlagan an ngatanan niyo nga mga pangulo ngan nabihag hira ha waray pa ngani hira makapana.

⁴Sanglit pabay-i la ako nga magtatangis hin mapait tungod hadton ngatanan nga nagkamatay nga akon mga tawo. Ayaw la ako pagliawa.

⁵Panahon ini hin pagkalisang, pagkapirde, ngan pagkagupong didto han Kahamub-an han Panan-awon, ngan iginpadara ini ha aton han GINOO nga Dyos nga Labi Kamakagarahum. Ginrumpag an mga pader han aton syudad ngan nag-aningal dida ha kapungtoran an mga gogliat hin pakibulig.

⁶Inmabot nga nangangabayo an mga sondalo nga tikang han tuna han Elam, nga sangkap hin mga pana. Gin-andam na an mga taming han mga sondalo nga tikang han tuna han Kir.

⁷Luob hin mga karuwahe an maglangbo nga mga kahamub-an han Juda; natindog ha atubangan han mga ganghaan han Jerusalem an dikabayo nga mga sondalo.

⁸Narumpag an ngatanan nga mga panalipod han Juda. Han paghinabo hini, iginggawas niyo an mga hinganiban tikang han hirimosan han mga hinganiban ha pag-awayan.

⁹Hin-agian niyo an mga dapit han mga pader han Jerusalem nga kinahanglan pag-aydon. Gin-usisa niyo an ngatanan nga kabablayan didto ha Jerusalem ngan ginruba niyo in pira han mga balay basi makakuha kamo hin mga bato para hin pag-ayad han mga pader han syudad. Basi makatirok kamo hin tubig,

¹¹nagtindog kamo hin biriawan hin tubig ha sakob han syudad nga mabiaw han tubig nga naawas tikang han daan nga linaw. Kundi nagpakabungol la kamo han Dyos nga maiha na nga naglarang hiya hini ngatanan ngan iya na pagbuot nga mahinanabo.

¹²Hadto gintinawag kamo han GINOO nga Dyos nga Labi Kamakagarahum hin pagtangis ngan pagmabidoon, hin pagkiskis han iyo mga ulo, ngan hin pagbado hin sako.

¹³Nagtinawa ngan nagsaurog la lugod kamo. Nag-ihaw kamo hin mga karnero ngan mga baka para han iyo pagkaon ngan nag-irignom kamo hin bino. Nagsiring kamo, “Gabay kita mangaon ngan mag-irignom, kay magkakamatay man kita buwas.”

¹⁴An GINOO, nga Dyos nga Labi Kamakagarahum amo ngahaw an naghimangraw ha akon, “Diri gud mapapasaylo ha ira ini nga karat-an samtang buhi pa hira. Ako nga GINOO nga Dyos nga Labi Kamakagarahum an nagyakan.”

¹⁵Ginpakadto ako han GINOO nga Labi Kamakagarahum kan Sebna nga tinaporan han hadianon nga panimalay ngan gintugon ako hin pagsiring ha iya,

¹⁶“Ha imo paghunahuna hin-o ka ba? Ano an imo katungod hin pag-ukab hin lubnganan para ha imo ngahaw dida han batoon nga ligid han pungtod?

¹⁷Bangin dako ka nga pagkatawo, kundi pupuroton ngan ilalabog ka han GINOO.

¹⁸Pupuroton ka niya sugad hin bula ngan ilalabog ka ngadto hin darudako nga nasod. Mapatay ka didto sapit han mga karuwahe nga imo ipinaparayaw. Nagpakaalo ka han panimalay han imo agaron.

¹⁹Kukuhaon ka han GINOO tikang han imo katungdanan ngan pupukanon ka tikang han imo hitaas nga kahimtang!”

²⁰Nagsiring kan Sebna an GINOO, “Kon mahinabo na ito, ipapatawag ko hi Eliaquim nga akon surugoon nga anak ni Hilquias.

²¹Isusul-ot ko ha iya an imo opisyal nga bado ug paha ngan ihahatag ko ha iya an ngatanan nga imo hadto anay gahom. Masusugad hiya hin amay para han mga tawo han Jerusalem ug Juda.

²²Tatagan ko hiya hin bug-os nga gahom ha ilarom han hadi nga tulin ni David. Makapot hiya han mga yawi han katungdanan; waray magsasada han iya pag-aabrehan, ngan waray mag-aabre han iya pagsasadhan.

²³Igtataod ko hiya hin marig-on sugad hin usa nga usok ngan magigin burabod hiya hin kadungganan para han bug-os niya nga panimalay.

²⁴“Kundi iya dako nga pinas-an an ngatanan niya nga kauropdan ngan mga sinakop. Makab-it hira ha iya sugad hin mga daba ngan mga kaldero nga nanmimitay dida hin usa nga usok!

²⁵Kon mahinabo na ito, magagabot ngan matutumba an usok nga igintaod hin marig-on. Ngan amo na ini an kataposan han ngatanan nga nanmimitay dida han usok.” An GINOO an nagyakan.