Read Waray Samarenyo Meaning Based Isaias 27 Bible Online

Isaias 27 - Waray Samarenyo Meaning Based bible

Isaias 27

¹Dida hito nga adlaw gagamiton han GINOO an iya gamhanan ngan makamaratay nga espada hin pagkastigo kan Lebiatan, ito nga nagpupulidpulid ngan naglulubaglubag nga dragon, ngan hin pagpatay han higante nga mananap[35] nga nag-uokoy didto ha dagat.

²Dida hito nga adlaw masiring an GINOO hiunong han iya matahom nga urubasan,

³“Dayuday ginbabantayan ngan ginbabaribhan ko ini. Ginbabantayan ko ini adlaw gab-i basi diri paglabtan.

⁴Diri na ako nasisina han urubasan. Kon may-ada mga katungkan nga kinahanglan pagpuohon, uugtangon ko gud ini.

⁵Kundi kon an mga kaaway han akon mga tawo karuyag han akon pagpanalipod, makigsangkay hira ha akon. Tinuod, makigsangkay hira ha akon.”

⁶Ha mga adlaw nga tiarabot an mga tawo han Israel nga mga tulin ni Jacob, manggagamot sugad hin kahoy ngan manmumukad ngan mananaringsing hira. Maluluob an tuna han ira mga bunga.

⁷Waray pagkastigoha han GINOO an Israel sugad han iya pagkastigo han iya mga kaaway, o waray kawad-i hin sugad kadamo nga mga tawo.

⁸Ginkastigo han GINOO an iya mga tawo pinaagi hin paghalina ha ira ngadto ha pagkabihag. Iya ginkuha hira pinaagi hin makusog nga hangin nga tikang ha sinirangan.[36]

⁹Kundi pasasayloon la an mga sala han Israel kon pagdugmokon na sugad hin tisa an mga bato han pagano nga mga altar ngan kon waray na mahisalin nga mga tigaman han diyosa Asera o mga altar hin insyenso.

¹⁰Ruba na an pinarig-on nga syudad. Ginbayaan ini sugad hin mahawan nga kamingawan. Nahimo ini nga panabsaban hin kabakahan diin hira makakapahuway ngan makakapanabsab.

¹¹Mga laya ngan mga bari na an mga sanga han mga kahoy, ngan an kababayen-an nangangahoy hini nga ira isurungo. Diri mapaid o malolooy ha ira an Dyos nga ira Magburuhat kay waray gud makasabot an mga tawo.

¹²Dida hito nga adlaw pagtitirokon han GINOO hin tag-usausa an iya mga tawo tikang ha Eufrates ngadto ha pag-ultan han Ehipto sugad nga nahilalain an trigo tikang han uhot dida han paggiok.

¹³Kon umabot na ito nga adlaw patutunggon in usa nga trompeta hin pagpabalik tikang ha Asiria ug Ehipto han ngatanan nga mga Israelita nga mga bihag didto. Magkakaabot ngan magsisingba hira han GINOO didto ha Jerusalem, dida han iya baraan nga pungtod![37]