Read Waray Samarenyo Meaning Based Isaias 33 Bible Online

Isaias 33 - Waray Samarenyo Meaning Based bible

Isaias 33

¹Maghihikaraot an amon mga kaaway! Nanikas ngan nanlingo hira, bisan kon waray nagtikas o naglingo ha ira. Kundi matatapos an ira panahon hin panikas ngan panlingo, ngan pagtitikasan ngan paglilingoon man hira.

²O GINOO, kalooyi kami. Naglaom kami ha imo. Panalipdi kami adlaw-adlaw ngan talwasa kami ha mga panahon hin kakurian.

³Kon nakikiaway ka para ha amon, nakalagiw an mga nasod tikang han aringasa han araway.

⁴Inaagaw ngan gintitikas an ira mga hiagi ngan naangkon nga mga butang.

⁵Hin pagkagamhanan han GINOO! Ginhahadian niya an ngatanan. Pupun-on niya an Jerusalem hin katadongan ngan pagkamatadong,

⁶ngan paririg-on niya an nasod. Dayuday pananalipdan niya an iya mga tawo ngan iya tatagan hira hin kinaadman ug hibaro. An ira gidadakoi nga manggad amo an pagtahod ngan pagsingba han GINOO.

⁷An mag-isog nga mga tawo naaro hin bulig. Nagtatangis hin mapait an mga sinugo nga nagtinguha nga magkamay-ada kalinaw.

⁸Makulba an paglakat ha higluag nga mga dalan sanglit waray na tawo nga naagi hito nga dalan. Waray tumana an mga ginsabotan, ngan gintalapas an mga ginkatangdoan. Waray na gud tinatahod.

⁹Waray na tamni ngan binayaan na an tuna. Nanlaya na an mga kagurangan han Libano, sugad na hin kamingawan an malangbo nga kahamub-an han Saron, ngan nagkarapdag na an mga dahon han kakahoyan didto ha Basan ngan didto han Bukid Carmelo.

¹⁰Nagsiring an GINOO ngadto han mga nasod, “Yana, makilos ako! Ipapakita ko an akon pagkagamhanan.

¹¹Waray pulos an iyo mga larang, ngan waray la gamit an ngatanan nga iyo ginbuhat. An akon espiritu sugad hin kalayo nga magpupuo ha iyo.[39]

¹²Madudugmok kamo sugad hin mga palanas nga bato nga ginbangga basi hin mahimo nga apog, sugad hin mga tunok nga gin-ugtang ngada hin kaagbon.

¹³Pamati kamo ngatanan nga aanhi ha hirani ug aadto ha hirayo, han akon ginbuhat ngan kilalaha niyo an akon gahom.”

¹⁴Nangungurog tungod hin kahadlok an mga makasasala nga mga tawo han Sion. Nasiring hira, “An paghukom han Dyos sugad hin kalayo nga naglalaga ha kadayonan. May-ada ba ha aton mabubuhi dida hin sugad nga kalayo?”

¹⁵Mabubuhi kamo kon magyakan ngan magbuhat kamo han matadong. Ayaw paggamita an iyo gahom hin paglimbong han mga pobre, ngan ayaw kamo pagkarawat hin mga hukip. Ayaw kamo pagtampo hadton mga naglalarang hin pagpatay o hin pagbuhat hin magraot nga mga butang.

¹⁶Niyan waray niyo sadang kahadlokan; waray niyo kakulba kay sugad kamo hin aadto hin marig-on nga kuta. Diri kamo kukulangan hin pagkaon ngan hin tubig nga irimnon.

¹⁷Makita na liwat kamo hin usa nga hadi nga harangdon ngan nakita pa kamo hin usa nga tuna nga hiluag.

¹⁸Aada na la ha iyo panumdoman an iyo daan nga mga pagkahadlok hin langyaw nga mga parasukot hin buhis ngan mga tiktik.

¹⁹Diri na gud kamo makita in maglabyaw nga mga lumalangyaw nga nagyayakan hin pinulongan nga diri niyo nasasayoran.

²⁰Tan-awa niyo an Sion, an syudad nga ginsasaurogan naton han aton baraan nga mga pyesta. Tan-awa an Jerusalem, usa nga mamingaw nga dapit nga maupay pag-ukyan, usa nga diri barubalhin nga tulda, kanay mga usok diri gud ginagabot, ngan kanay mga pisi diri gud nauutod.

²¹Ipapakita ha aton han GINOO an iya himaya. Mag-uokoy kita ha ligid hin dagko nga mga salog ngan mga sapa, kundi waray mga kaaway nga barko nga magpapasipara hin pag-agi hini nga mga salog ug sapa.[40]

²²Waray la gamit an ngatanan nga mga pisi dida hini nga mga barko; diri makakabuklad hira han mga layag! Aagawon ta an ngatanan nga manggad han kaaway nga mga kasondalohan, ngan tungod kay damo ini, kababahinan bisan an piay nga mga tawo. An GINOO ngahaw an aton hadi; paghahadian ngan pananalipdan kita niya.

²⁴Waray na gud tawo nga nag-uokoy dinhe hinin aton tuna nga magngungurutob na liwat nga masakit hiya, ngan pasasayloon han GINOO an ngatanan nga mga sala.