Read Waray Samarenyo Meaning Based Isaias 34 Bible Online

Isaias 34 - Waray Samarenyo Meaning Based bible

Isaias 34

¹Kadi kamo, nga tawo han ngatanan nga kanasoran! Pag-alirong kamo ngan pamati. Pakadi ngan pamati kamo, an bug-os nga tuna, ngan an ngatanan nga nag-uokoy ha tuna.

²An GINOO nasisina han ngatanan nga kanasoran ngan han ngatanan nga ira mga kasondalohan. Iya ginhukman na hira ngadto hin pagkabungkag.

³Diri iglulubong an patay nira nga mga lawas, kundi malunay an mga lawas nga nadudunot ngan nagbabaraho; ngan magmamapula tungod han dugo an kabukiran.

⁴Pupusakon hin maupay sugad hin katapotapo an adlaw, bulan, ngan mga bitoon. Maaanaw an langit sugad hin ginlukot nga linikid nga basahan, ngan matataktak an mga bitoon sugad hin nagkakahuglog nga mga dahon hin ubas ug igos.

⁵Gin-andam na han GINOO an iya espada didto ha langit, ngan yana hahampakon na niya an Edumea, an mga tawo nga iya na ginhukman hin pagpuo.

⁶An iya espada natina han dugo han mga nati nga karnero ug kanding ngan nagmasinaw tungod han tambok han mga isol han mga karnero. Magtutubod an GINOO hin mga halad didto han syudad han Bozra; damo an ginpangihaw didto han tuna han Edumea.

⁷Papatayon an mga tawo sugad hin ihalas nga mga baka ngan nati nga mga todo, ngan natutumog hin dugo ngan maluluob hin tambok an tuna.

⁸Amo ini an panahon nga tatalwason han GINOO an Sion ngan pipirdehon niya an iya mga kaaway.

⁹Mahihimo nga alkitran an mga salog han Edumea ngan mahihimo nga asupre an tuna. Maglalaga an bug-os nga nasod sugad hin alkitran.

¹⁰Maglalaga ini adlaw gab-i ngan mag-iinaso ha kadayonan. Mawawaray gamit an tuna ha ngatanan nga katuigan, ngan waray na gud tawo nga maagi didto.

¹¹Pag-uokyan an tuna hin mga bukaw ngan mga uwak. Paghihimoon na liwat ini han GINOO nga waray gamit nga kamingawan sugad han hadto anay han waray pa an Dyos pagtuha han kalibutan.

¹²Mawawaray hadi nga magdudumara han nasod, ngan mawawaray na an ngatanan nga mga pangulo.[41]

¹³Maturok an mga katungkan nga kabagwakan didto han ngatanan nga mga palasyo ngan pinaderan nga mga bungto, ngan pag-uokyan ini han mga lubo ngan mga bukaw.

¹⁴Mga layaw didto an magpintas ngan yawan-on nga kamanampan. Mapakadto an higante nga mananap ha gab-i[42] hin pamiling hin dapit nga iya papahuwayan.

¹⁵Aadto an mga bukaw pagsasalag, pagbubuhay, pagpupusa, ngan pagmamangno han ira mga piso. Maglulupadlupad didto in mga panon hin mga manaol.

¹⁶Usisaha dida han basahan han mga buhi han GINOO ngan basaha kon ano an iya karuyag sidngon. Waray usa hini nga mga binuhat nga mawawara ngan waray usa nga mawawaray padis. Kanan GINOO ini pagbuot; hiya ngahaw an magtitirok hini.

¹⁷An GINOO amo an magbabahinbahin han tuna para ha ira, ngan tatagan hin bahin an kada usa ha ira. Mag-uokoy hira didto han tuna ha ngatanan nga katuigan ngan hira an magtatag-iya hini ha kadayonan.