Read Waray Samarenyo Meaning Based Isaias 41 Bible Online

Isaias 41 - Waray Samarenyo Meaning Based bible

Isaias 41

¹Nasiring an Dyos, “Pagmingaw ngan pamati ha akon, kamo nga higrayo nga katunaan! Pag-andam hin pagsumbong han iyo kalipongan didto ha hukmanan; tatagan kamo hin higayon hin pagyakan. Dangop kamo ha akon basi maghukom kita kon hin-o an matadong.

²“Hin-o an nagdara han tawo nga madinaogon nga tikang ha sinirangan,[56] ngan hin-o an nagpadaog ha iya bisan ngain hiya kakadto? Hin-o an nagpadaog ha iya kontra han mga hadi ngan mga nasod? Ginpukan hira han iya espada nga daw sugad la hira hin tapotapo! Ginpasarang hira han iya mga pana sugad hin uhot nga iginpalid han hangin!

³Iya ginlanat hira ngan nagpadayon hiya paglanat nga waray kahadlok, uraura hin kamalaksi nga haros tumukal hiya ha tuna!

⁴Hin-o adto nga nagpahinabo hini? Hin-o an nagbuot han lakat han kasaysayan han kalibutan? Ako nga GINOO nakadto na ha tinikangan pa, ngan ako an GINOO nga Dyos aadto liwat ha kataposan.

⁵“Hinkit-an an akon ginbuhat han mga tawo didto han higrayo nga katunaan; kinalasan hira ngan nangurog hin kahadlok. Sanglit nagtitirok hira ngatanan ngan napakanhi hira.

⁶An kada usa han mga nagbudlay nabulig ngan nadasig han ira igkasi magburudlay.

⁷Nasiring an panday ngadto han platero, ‘Maupay nga pagkabuhat!’ An tawo nga naghahamis han diyosdiyos nagdasig han tawo nga nagtutugkop basi mahimo an ladawan. Nasiring hira, ‘Maupay an pagkasolda!’— ngan igintataod nira an diyosdiyos pinaagi hin mga raysang.

⁸“Kundi ikaw, Israel nga akon surugoon, amo kamo an mga tawo nga akon ginpili, an mga tulin ni Abraham nga akon sangkay.

⁹Gindara ko kamo tikang han mga sidsid han tuna; gintawag ko kamo tikang han gihihigrayoi nga mga kanto hini, ngan nagsiring ha iyo, ‘Amo kamo an akon surugoon.’ Waray ko kamo igsikway, kundi ginpili ko kamo.

¹⁰Ayaw kamo kahadlok—kaupod ako niyo! Ako amo an iyo Dyos—ayaw kamo kaawod! Pakukusgon ngan bubuligan ko kamo; pananalipdan ngan tatalwason ko kamo.

¹¹“Adton mga nasisina ha iyo, mahibabaro han kaarawdan han pagkapirde. Magkakamatay adton mga nakikig-away ha iyo;

¹²ngan mapapara hira ha tuna.

¹³Ako amo an GINOO nga iyo Dyos; ginpakusog ngan ginsiring ko kamo, ‘Ayaw kamo kahadlok; bubuligan ko kamo.’”

¹⁴Nagsiring an GINOO, “Bisan kon gutiay ngan maluya kamo, Israel, ayaw kamo kahadlok; bubuligan ko kamo. Ako an baraan nga Dyos han Israel amo an nagtatalwas ha iyo.

¹⁵Hihimoon ko kamo nga sugad hin giriokan nga tabla, nga may bag-o ngan magtarom nga mga ngipon. Paggigiokon ngan pagbubungkagon niyo ini mga bukid; madudugmok in kapungtoran ngan pupusakon nga mahimo nga tapotapo.

¹⁶Itatakyab ini niyo; igpapalid ini han hangin, ngan igpapasarang ini pinaagi han bagyo. Niyan magmamalipayon kamo kay ako amo an iyo Dyos; iyo pagdadayawon ako nga baraan nga Dyos han Israel.

¹⁷“Kon ha ira pagkinahanglan mamiling hin tubig an akon mga tawo, kon magmara na hin uhaw an ira mga but-ol, niyan ako nga GINOO an mabaton han ira pag-ampo; diri gud ako nga Dyos han Israel magsasalikway ha ira.

¹⁸Paaawason ko in mga salog dida hin bangkil nga kapungtoran, ngan mga burabod hin tubig didto han mga kahamub-an. Hihimoon ko an kamingawan nga mga linaw hin tubig, ngan an mamara nga tuna nga masulog nga burabod.

¹⁹Patutudkon ko didto ha kamingawan in mga kahoy nga sidro, ngan mga kahoy nga akasya, mga mirtol, ngan mga olibo. Maturok in mga kagurangan didto hin bangkil nga tuna, mga kagurangan hin palotsina, aguho, ug sipre.

²⁰Hikikit-an ini hin mga tawo ngan hibabaroan nira nga ako nga GINOO an nagbuhat hini. Makakasabot hira nga ginbuhat ini han baraan nga Dyos han Israel.”

²¹Amo ini an karuyag sidngon han GINOO nga hadi han Israel: “Kamo nga kadiyosan han mga nasod, ipahamtang an iyo sumbong. Dad-a an gimamaupayi niyo nga mga pangatadongan!

²²Pakadi ngan panagna han mahinanabo, basi mahibaroan namon kon nahinanabo na ini. Isaysay ngadto han hukmanan an mga nahinabo han nag-agi nga panahon, ngan pagsumati kami han kahulogan hini,

²³Pagsumati kami han mahinanabo han tiarabot nga panahon— niyan mahibabaroan namon nga kadiyosan kamo! Pagbuhat kamo hin maupay o pagdara hin karat-an; basi mahadlok ngan kulbaon kami!

²⁴Waray la hinungdan kamo ngan an ngatanan nga iyo ginbubuhat; makapupungot adton mga nagsisingba ha iyo!

²⁵“Ginpili ko in tawo nga nag-uokoy didto ha sinirangan;[57] pasusulongon ko hiya tikang ha amihanan. Tatamakan niya in mga punoan nga daw sugad la hira hin mga lapok. Sugad hin parahimo hin daba nga nagtatamaktamak hin lutak nga hirimoon nga daba.

²⁶Hin-o ha iyo in nagtigo nga mahinanabo ini, basi makasiring kami nga matadong manggud kamo? Waray gud ha iyo nagyakan hin usa ka pulong mahitungod hini; waray gud may nakabati nga maghimangraw kamo hin bisan ano!

²⁷Ako nga GINOO amo an syahan nga nagpasangyaw han sumat didto ha Sion; nagsugo ako hin magsarangyaw ngadto ha Jerusalem hin pagsiring, ‘Nagtitikanhi na an iyo mga tawo! Nauli na hira.’[58]

²⁸Han pagtan-aw ko dida han kadiyosan, waray gud ha ira may sadang igyakan nga bisan ano; waray gud nakakabaton han akon mga pakiana.

²⁹Waray la pulos ini ngatanan nga kadiyosan; waray gud nira mahihimo— magluya ngan waray gahom ini nga mga diyosdiyos.”