Read Waray Samarenyo Meaning Based Isaias 47 Bible Online

Isaias 47 - Waray Samarenyo Meaning Based bible

Isaias 47

¹Nagsiring an GINOO, “Babilonia, lusad tikang han imo trono, ngan lingkod dida han tapotapo han tuna. Hadto anay sugad ka hin uray nga babaye, usa nga syudad nga waray pa mapukan, kundi diri ka na gud mahinlo ngan hamili! Oripon ka na yana!

²Birika an gilingan! Gilinga an harina! Hukasa an imo taong! Huboa an imo magtahom nga mga panapton! Alsaha an imo saya ha pagtabok han mga sapa![65]

³Hikikit-an hin mga tawo nga hubo ka; Hikikit-an ka nira nga ginpaubos ngan ginpakaalohan ka. Mabulos ako ngan waray makakapugong ha akon.”

⁴Tutubson kita han baraan nga Dyos han Israel— An GINOO nga Labi Kamakagarahum amo an iya ngaran.

⁵Nasiring an GINOO ngadto ha Babilonia, “Lingkod hin hilom ngan ha kasisidman; diri ka na tatawgon nira nga rayna hin kanasoran!

⁶Nasina ako han akon mga tawo; gindumara ko hira sugad hin akon na hira ginsalikway: Igintubyan ko hira ha imo gahom, ngan waray mo hira kalooyi; ginpakurian mo bisan an mga tigurang.

⁷Naghunahuna ka nga waray pagkatapos an imo ka rayna, ngan waray mo gud pagpainoinoha ini nga mga butang o paghunahunaa an imo dadangatan.

⁸“Pamati hini, ikaw nga mahigugmaon hin kalipay ikaw nga naghuhunahuna nga talwas ka na ngan waray na kataragman. Nasiring ka nga sugad ka gud han Dyos hin kagamhanan— nga waray na gud iba nga masusugad ha imo. Naghunahuna ka nga diri ka gud mababalo, o mag-aantos han kawaray mga anak.

⁹Kundi ha usa la kadali, ha usa la ka adlaw, mahinanabo ini nga duha nga mga butang. Bisan pa ano nga diwata an imo gamiton, mawawad-an ka han imo bana ngan han imo mga anak.

¹⁰“Natapod ka gud ha imo ngahaw dida han imo kamaraot; naghunahuna ka nga waray makakakita ha imo. An imo kinaadman ug hibaro amo an nakapahirayo ha imo, ngan nagsiring ka ha imo ngahaw, ‘Ako amo an Dyos— waray na gud iba nga sugad ha akon!’

¹¹Maabot ha imo an karat-an, ngan waray han imo mga diwata nga makakapugong hini. Tigda la nga maabot ha imo an pagkapukan— pagkabungkag nga waray mo pag-inopa!

¹²Tipigi an ngatanan mo nga mga diwata ngan mga lumay; nga ginggamit mo tikang han imo kabatan-on. Bangin makabulig ini ha imo; bangin makapahadlok ka han imo mga kaaway.

¹³Waray mo gahom bisan kon kinarawat mo in mga sagdon. Padaopa ngan patalwasa ha imo an imo mga paratigo— adton mga tawo nga nag-aaram han mga bitoon, nga nag-uusisa han mga dapit han kalangitan, ngan nagsusumat ha imo pinaagi han bulan kon ano[66] an mahinanabo ha imo.

¹⁴“Masusugad hira hin uhot, ngan uugtangon hira hin kalayo! Diri ngani hira makakatalwas han ira kalugaringon— makalilisang an kapaso para ha ira an kalayo, diri kalayo nga igo la hin pagdangdang ha ira!

¹⁵Amo la ito an kaupayan nga mahihimo nira ha imo— hito nga mga paratigo nga imo ginpakianhan ha bug-os mo nga kinabuhi. Babayaan ka nira ngatanan ngan may hin lakat la ha ira, ngan waray mahisasalin ha ira hin pagtalwas ha imo.”