Read Waray Samarenyo Meaning Based Isaias 48 Bible Online

Isaias 48 - Waray Samarenyo Meaning Based bible

Isaias 48

¹Pamati hini, mga tawo han Israel, kamo nga tinmikang kan Juda; Nagsusumpa kamo ha ngaran han GINOO, ngan nasiring kamo nga nagsisingba kamo han Dyos han Israel— kundi diri kamatuoran an iyo ginyayakan.

²Kundi naparayaw kamo hin pagsiring nga mga tuminungnong kamo han baraan nga syudad, ngan natapod kamo han Dyos han Israel, kanay ngaran amo an GINOO nga Labi Kamakagarahum.

³Nagsiring an GINOO ngadto ha Israel, “Maiha na nga gintagna ko kon ano an mahinanabo; niyan tigda la nga gintuman ko ini!

⁴Hinbaroan ko nga magmamatig-a an iyo ulo, sugad hin puthaw natikig an iyo liog ngan sugad hin bronse kamakugnot an iyo agtang.

⁵Sanglit gintagna ko hin maiha na an iyo tiarabot nga panahon, ngan gin-unahan ko hin pagsumat han mga butang nga diri pa ini nahinanabo, basi diri kamo sumiring nga gintalinguha nga mahinabo ini han iyo mga diyosdiyos ngan mga ladawan.

⁶“Nanhinabo na an ngatanan nga akon igintagna; kinahanglan nga tumuod kamo nga diri sayop an akon mga panagna. Yana pagsusumatan ko kamo hin bag-o nga mga butang nga tiarabot, mga hinabo nga waray ko igpadayag hadto.

⁷Karuyag ko nga mahinabo ini yana; waray pa gud sugad hini nga nahinabo hadto. Kon nahinabo ini hadto, masiring kamo nga hinbaroan na niyo ini ngatanan.

⁸Nasayod ako nga diri kamo kasasarigan, nga daan bantog na kamo nga mga masupilon. Sanglit waray ini niyo hibatii, ngan waray pulong hiunong hini nga inmabot ha iyo mga talinga.

⁹“Basi pagdayawon hin mga tawo an akon ngaran, ginpupugngan ko an akon kasina; gin-iilob ko la ini ngan diri na ako magpupukan ha iyo.

¹⁰Ginsarihan ko kamo dida hin kalayo hin pag-antos, sugad nga ginpupurog an salapi dida hin hudno. Kundi hinbaroan ko nga waray kamo pulos.

¹¹Natuman an akon ginbuhat tungod la ha akon— diri ako matugot nga pagpakaalohan an akon ngaran, o makaangbit an bisan hin-o han akon himaya nga akon ngan para ha akon gud la.”

¹²Nagsiring an GINOO, “Pamati ha akon, Israel, an mga tawo nga akon gintawag! Ako amo an Dyos, an syahan, an kataposan, an amo la nga Dyos!

¹³Ginhimo han akon mga kamot an mga patukoranan han tuna; ngan ginbitad ko an kalangitan. Kon gintatawag ko an tuna ug langit, nadaop hira dayon ha akon.

¹⁴“Pagtitirok ngan pamati, kamo ngatanan! Waray han kadiyosan makagtagna nga susulongon an Babilonia han tawo nga akon ginpili; pagtutumanon niya an karuyag ko ipabuhat ha iya.

¹⁵Amo ako an naghimangraw ngan nagtawag ha iya; ginpagawas ko hiya ngan gintalinguha ko nga magmainuswagon hiya.

¹⁶“Duok kamo ha akon ngan pamatii yana an akon igsisiring. Naghimangraw ako hin dayag tikang pa ha tinikangan, ngan dayuday ginhimo ko nga matuman an akon mga pulong.” (Yana iginhatag ha akon han GINOO nga Dyos an iya gahom ngan ginsugo ako.)

¹⁷Nagsiring an baraan nga Dyos han Israel, an GINOO nga nagtutubos ha iyo: “Ako amo an GINOO nga iyo Dyos, nga karuyag magtutdo ha iyo tungod han iyo kalugaringon nga kaupayan, ngan nagmando ha iyo didto han dalan nga iyo pag-aagian.

¹⁸“Kon pinamatian la unta niyo an akon mga sugo! Mag-aawas unta para ha iyo in mga kaupayan sugad hin sapa nga diri nahubas! Maabot unta ha iyo an pagdarag-an sugad han mga balod nga nalapya ha baybayon.

¹⁹Masusugad unta han mga baras kadamo an iyo mga tulin, ngan gintalinguha ko nga diri gud hira pagpuo.”

²⁰Pagkagawas kamo tikang ha Babilonia, pagkalakat kamo nga talwas! Igoliat nga malipayon an sumat; isangyaw ini ha ngatanan nga dapit: “Gintalwas han GINOO an Israel nga iya surugoon!”

²¹Han pagdad-a han GINOO han iya mga tawo hin paglatas han mapaso ngan mamara nga kamingawan, waray hira mag-antos hin kauhaw. Ginpaawas niya para ha ira in tubig tikang hin bato; ginbuka niya an bato ngan inmawas an tubig.

²²Nasiring an GINOO, “Waray kamurayaw para hin mga makasasala.”