Read Waray Samarenyo Meaning Based Isaias 50 Bible Online

Isaias 50 - Waray Samarenyo Meaning Based bible

Isaias 50

¹Nasiring an GINOO, “Naghuhunahuna ba kamo nga ginpaiwas ko an akon mga tawo, sugad hin lalake nga nakigbulag han iya asawa? Hain man an mga karig-onan han pagbulag? Naghuhunahuna ba kamo nga iginbaligya ko kamo ngadto ha pagkabihag sugad hin tawo nga nagbaligya han iya mga anak hin kaoripon? Diri, nahingadto kamo na pagkabihag tungod han iyo mga sala; ginpaiwas kamo tungod han iyo mga pagtalapas.

²“Kay ano nga waray bumaton an akon mga tawo han pagkadtoa ko hin pagtalwas ha ira? Kay ano nga waray hira bumaton han akon pagtawag ha ira? Waray ko ba kusog hin pagtalwas ha ira? Makakahimo ako hin pagpahubas han dagat pinaagi hin usa la ka pagsugo, ngan an mga salog hihimoon ko nga kamingawan, sanglit magkakamatay an kaisdaan dida hini tungod hin kakulang hin tubig.

³Makakapasirom ako han langit, sugad hin nagmasulob-on ini tungod han patay.”

⁴Gintutdoan ako han GINOO nga Dyos kon ano an akon igsisiring, basi makahatag ako hin kusog hadton mga ginugul-an. Kada aga gin-aaghat ako niya hin pamati han iya igtututdo ha akon.

⁵Gintagan ako han GINOO hin pagsabot, ngan waray ako sumupil o bumaya ha iya.

⁶Ginlubasan ko an akon taludtod ngadto hadton mga naghahampak ha akon, tinugotan ko hira hin pagtamay ha akon, han pagrabot han akon bungot, ngan pagtupra ha akon bayhon.

⁷Kundi diri makakadaot ha akon an ira mga pagtamay, kay ginbubuligan ako han GINOO nga Dyos. Maniniguro ako nga mailob ko ini, maaram ako nga diri ako kaalohan,

⁸kay hirani an Dyos ha akon, ngan magpapamatuod hiya nga waray ko sala. May-ada ba nagpapasipara hin pagsumbong kontra ha akon? Pakadtoa kami ha hukmanan! Ipadara ha iya an iya sumbong!

⁹An GINOO nga Dyos ngahaw an nananalipod ha akon— sanglit hin-o an makakagpamatuod nga salaan ako? Mawawara an ngatanan nga nagsusumbong kontra ha akon; mapapara hira sugad hin dugnit nga gintangkob!

¹⁰Kamo ngatanan nga nagtatahod han GINOO ngan nagsusugot han mga pulong han iya surugoon, bangin masirom manggud an agian nga iyo ginlalaktan, kundi sarig kamo han GINOO, tapod kamo han iyo Dyos.

¹¹Kamo ngatanan nga naglalarang hin pagbungkag han iba pagbubungkagon liwat kamo pinaagi han iyo kalugaringon nga mga larang! An GINOO ngahaw an magpapahinabo hini; mag-aantos kamo hin makalolooy nga kapalaran.