Read Waray Samarenyo Meaning Based Isaias 51 Bible Online

Isaias 51 - Waray Samarenyo Meaning Based bible

Isaias 51

¹Nagsiring an GINOO, “Pamati ha akon, kamo nga naruruyag nga matalwas, kamo nga nadangop ha akon hin pakibulig. Paghunahunaa niyo an bato diin kamo tinmikang, an bukid nga bato diin kamo gin-ukad.

²Paghunahunaa niyo hi Abraham nga iyo ginikanan, ngan hi Sara nga nag-anak ha iyo. Waray anak hi Abraham han pagtawga ko ha iya, kundi ginbendisyonan ko hiya ngan gintagan ko hiya hin mga anak; ginpadamo ko an iya mga tulin.

³“Kalolooyan ko an Jerusalem, an ngatanan nga nag-uokoy didto han mga naruba han syudad. Bisan kon kamingawan na an iya tuna, hihimoon ko ini nga usa nga tanaman, sugad han tanaman nga akon gintanom didto ha Eden. Mahiaagian didto an kalipay ngan pagrayhak, ngan mga kanta hin pagdayaw ngan pagpasalamat ha akon.

⁴“Pamati ha akon, mga tawo ko, pamatii an akon igyayakan; Ihahatag ko an akon pagturon-an ngadto han mga nasod; mahatag ha ira hin kapawa an akon mga balaod.

⁵Maabot ako hin kadagmitan ngan tatalwason ko hira; hirani na an panahon han akon pagdarag-an. Ako ngahaw an maghahadi han mga nasod. Naghuhulat han akon pag-abot an higrayo nga katunaan; naghuhulat hira ha akon nga malaomon nga tatalwason ko hira.

⁶Hangad ngadto han kalangitan; tan-awa an tuna! Mapapara an kalangitan sugad hin aso; madudumog an tuna sugad hin daan nga panapton, ngan magkakamatay an ngatanan nga mga tawo hini sugad hin kalangawan. Kundi magpapadayon an katalwasan nga akon dadad-on; ngan diri matatapos an akon pagdarag-an.

⁷“Pamati ha akon, kamo nga maaram han matadong, kamo nga kinmarawat hin kinasingkasing gud han akon pagturon-an. Ayaw kamo kahadlok kon pagyuyubiton ngan pagtatamayon kamo han mga tawo;

⁸mapapara hira sugad hin gintangkob nga panapton! Kundi magpapadayon an katalwasan nga akon dadad-on; diri matatapos an akon pagdarag-an.”

⁹Pagmata, O GINOO, ngan buligi kami! Gamita an imo gahom ngan talwasa kami; gamita ini sugad han imo ginbuhat han naglabay na nga mga panahon. Ikaw an nagtirutigbas kan Rahab[69] nga higante ha dagat.

¹⁰Ikaw liwat an nagpahubas han dagat, ngan naghimo hin agian ha dagat, basi makatabok adton imo pagtutubson nga mga tawo.

¹¹Magkakaabot nga malipayon ngadto ha Jerusalem adton imo mga gintalwas, nga nagkakaranta ngan naggogogliat tungod hin kalipay. Magmamalipayon hira ha kadayonan, nga talwas na ha kadayonan tikang han kabidoan ug kasakitan.

¹²Nagsiring an GINOO, “Ako amo an nagliliaw ha iyo, Kay ano nga nahahadlok kamo hin tawo nga may-ada kamatayon nga sugad la hiya hin banwa?

¹³Hinngalimtan na ba niyo an GINOO nga naghimo ha iyo, nga nagbitad han kalangitan ngan nagpahimutang han mga patukoranan han tuna? Kay ano nga nag-uokoy kamo ha waray hunong nga pagkahadlok han kasina hadton mga nagtatalumpigos ha iyo, hadton mga andam hin pagbungkag ha iyo? Diri na gud an ira kapungot makakadapat ha iyo!

¹⁴Diri maiha bubuhian na adton mga priso; mag-uokoy hira hin hilawig nga kinabuhi, ngan magkakamay-ada hira han ngatanan nga pagkaon nga ira kinahanglan.

¹⁵“Ako amo an GINOO nga iyo Dyos; inuukay ko an dagat ngan pinapangurob ko an mga balod hini. An akon ngaran amo an GINOO nga Labi Kamakagarahum!

¹⁶Ginbitad[70] ko an kalangitan ngan ginpahimutang ko an mga patukoranan han tuna; nasiring ako ngadto ha Jerusalem, ‘Akon kamo mga tawo! iginhatag ko ha iyo an akon pagturon-an, ngan pinanalipdan ko kamo pinaagi han akon kamot.’”

¹⁷Pagmata na, Jerusalem! Pagmata ngan bangon na! Gin-inom mo na an kopa hin pagkastigo nga iginpainom ha imo han GINOO tungod han iya kasina; gintungkas mo ini ngan nakapariigdiig ini ha imo.

¹⁸Waray gud magmamando ha imo, waray gud dida han imo mga tawo nga magtutugway ha imo.

¹⁹Nahulog ha imo in doble nga karat-an; ginpuo an imo tuna pinaagi hin araway, ngan ginggutom an imo mga tawo. Waray gud may pinmaid ha imo.

²⁰Dida han kanto han tagsa nga kalsada natutumba an imo mga tawo tungod hin kamaluya; sugad hira hin bugsok nga nadakop dida hin usa nga pukot hin parapanganop. Inabat nira an kusog han kasina han Dyos.

²¹Kamo nga nag-aantos nga mga tawo han Jerusalem, kamo nga nagririigdiig nga daw sugad hin mga hubog,

²²nananalipod ha iyo ngan nasiring an GINOO nga iyo Dyos, “Kinukuha ko an kopa nga iginhatag ko ha iyo tungod han akon kasina. Diri na gud niyo pag-iimnon an bino nga nakakapariigdiig ha iyo.

²³Ihahatag ko ini ngadto hadton mga nagtalumpigos ha iyo, ngadto hadton mga nagpahigda ha iyo ha kakalsadahan, ngan nagtamaktamak ha iyo nga daw sugad la hin tapotapo kamo.”