Read Waray Samarenyo Meaning Based Isaias 54 Bible Online

Isaias 54 - Waray Samarenyo Meaning Based bible

Isaias 54

¹Jerusalem, sugad ka na la hin baw-as nga babaye, kundi yana makakahimo ka na hin pagkanta ngan paggoliat tungod hin kalipay. Yana darudamo an imo mga anak kay hin babaye nga waray bayai han iya bana!

²Padarudakoa an tulda nga imo inuokyan; pahiruhilab-i an iya mga pisi ngan parig-ona an mga usok!

³Ipauunhan an imo mga pag-ultan ha paluyoluyo; babawion han imo mga tawo an tuna nga gin-uokyan yana han iba nga mga nasod. Maluluob hin mga tawo an mga syudad nga binayaan na yana.

⁴Ayaw kahadlok—diri ka na pagpapakaalohan; diri ka na maaawod. Hingangalimtan mo an imo kamalingo sugad hin batan-on nga asawa; ngan an imo makahurulop nga pag-usaan sugad hin balo nga babaye.

⁵Masusugad hin imo bana an imo Magturuha— an GINOO nga Labi Kamakagarahum amo an iya ngaran! Tutubson ka han baraan nga Dyos han Israel— amo hiya an punoan han bug-os nga kalibutan.

⁶Israel, sugad ka hin batan-on nga asawa nga binayaan han iya bana ngan tugob ka hin kabidoan. Kundi karuyag han GINOO nga bumalik ka ngadto ha iya ngan masiring hiya:

⁷“Binayaan ko ikaw hin usa la kadali; kukuhaon ko ikaw pinaagi hin dako nga paghigugma.

⁸Tinmalikod ako nga nasisina hin madaliay la; kundi hihigugmaon ko na ikaw ha kadayonan.” Amo ini an siring han GINOO nga magtutubos ha imo.

⁹“Dida han panahon ni Noe nagsaad ako nga diri ko na gud paglulunopan an tuna. Yana nagsasaad ako nga diri na ako masisina ha imo; diri ako magsasaway o magkakastigo ha imo.

¹⁰Marurumpag pa an kabukiran ngan kapungtoran, kundi diri gud matatapos an akon paghigugma ha imo; pagtutumanon ko ha kadayonan an akon saad hin kalinaw.” Amo ini an siring han GINOO nga nahigugma ha imo.

¹¹Nagsiring an GINOO, “O Jerusalem, ikaw nga nag-aantos ngan makalolooy nga syudad, nga waray gud nagliliaw ha imo, pagtitindogon ko hin utro an imo mga patukoranan dida hin mahal nga mga bato.

¹²Mga rubi an ibubutang ko ha imo mga lantawan, ha imo mga ganghaan an mga bato nga mag-inggat nga nasilaw sugad hin kalayo, ngan mga alahas an pader nga palibot ha imo.

¹³“Ako ngahaw an magtututdo han imo mga tawo, ngan maghahatag ha ira hin kauswagan ngan kalinaw.

¹⁴Magpapakusog ha imo an katadongan ngan an pagkamatadong. Mahigagawas ka na han pagtalumpigos ngan pagkahadlok.

¹⁵Kon may-ada sumulong ha imo, ginbubuhat niya ini kontra han akon kaburot-on; mapupukan an bisan hin-o nga makiaway ha imo!

¹⁶“Gintuha ko an platero nga naghaharing hin kalayo ngan nagpipilpig hin mga hinganiban. Gintuha ko liwat an sondalo nga nagamit han mga hinganiban hin pagpatay.

¹⁷Kundi waray hinganiban nga makakadaot ha imo; makakabaton ka han ngatanan nga nagsusumbong ha imo, Pananalipdan ko an akon mga surugoon, ngan ihahatag ko ha ira an pagdarag-an.” An GINOO an nagyakan.