Read Waray Samarenyo Meaning Based Isaias 55 Bible Online

Isaias 55 - Waray Samarenyo Meaning Based bible

Isaias 55

¹Nagsiring an GINOO, “Kadi, kamo ngatanan nga inuuhaw— aadi in tubig! Kadi, kamo nga mga waray kwarta— palit kamo ngan kaon! Kadi, palit kamo hin bino ug gatas— diri ini pababaydan ha iyo!

²Kay ano nga ginagasto niyo in kwarta dida hin diri nakakabusog? Kay ano nga ginagasto niyo an iyo mga suhol ngan ginugutom la kamo gihapon? Pamati kamo ha akon ngan buhata niyo an akon igsisiring, ngan magpapahimulos kamo han gimamaupayi nga pagkaon.

³“Pamati yana, mga tawo ko, ngan daop kamo ha akon; daop ha akon ngan mabubuhi kamo! Hihimoon ko ha iyo in dayon nga ginsabotan, ngan ihahatag ko ha iyo an mga kaupayan nga akon iginsaad kan David.

⁴Ginhimo ko hiya nga pangulo ngan gilalabawi nga kapitan hin mga nasod, ngan pinaagi ha iya iginpakita ko ha ira an akon gahom.

⁵Yana tatawagon niyo in langyaw nga mga nasod; ha usa ka panahon waray hira kumilala ha iyo, kundi yana madalagan hira hin pagtapo ha iyo! Ako nga GINOO nga iyo Dyos, an baraan nga Dyos han Israel, amo an magtatalinguha nga mahinabo ini ngatanan; pagpapasidunggan ngan paghihimayaon ko kamo.”

⁶Balik kamo ngadto han GINOO ngan pag-ampo kamo ha iya yana nga hirani hiya.

⁷Sidnga an mga magraot nga bayaan nira an ira maraot nga pagkinabuhi, ngan balhinon na nira an ira maraot nga panhunahuna. Pabalika hira ngadto han GINOO nga aton Dyos; malolooyon hiya ngan madagmit magpasaylo.

⁸Nasiring an GINOO, “Diri sugad han iyo panhunahuna an akon panhunahuna, ngan lain han iyo mga paagi an akon mga paagi.

⁹Sugad nga hitaas an kalangitan ha igbaw han tuna, hitaas man han iyo mga paagi ngan panhunahuna an akon mga paagi ngan panhunahuna.

¹⁰“Sugad an akon pulong han esno ug han uran, nga nahuhulog tikang ha langit hin pagtubig han tuna. Pinapatubo hini an mga tanom nga nahatag hin binhe para han parauma, hin pagtanom ngan hin pagkaon para han mga tawo.

¹¹Sanglit amo man an pulong nga akon ginyayakan— magtutuman manta han akon ipinapagbuhat; pagbubuhaton gud hini an ngatanan nga diri gud mapapakyas.

¹²“Babayaan niyo nga malipayon kamo an Babilonia; dadad-on kamo nga malinawon ha paggawas niyo han syudad. Magkakaranta an kabukiran ngan kapungtoran, ngan maggogoliat an kakahoyan tungod hin kalipay!

¹³Maturok in mga kahoy nga sipres dida han tinutudkan yana hin mga sapinit; matubo in mga kahoy nga mirtol nga liwan han katungkan. Usa nga tigaman ini nga diri magpapapas, usa nga hinumdoman han ginbuhat ko, an GINOO.”