Read Waray Samarenyo Meaning Based Isaias 57 Bible Online

Isaias 57 - Waray Samarenyo Meaning Based bible

Isaias 57

¹Kon napatay in maupay nga mga tawo, waray usa nga nababaraka o waray nanginginano ha iya. Kundi kon napatay in nga mag-upay nga mga tawo, waray karat-an nga nakakadaot ha ira.

²May kamurayaw ngan pagpahuway ha kamatayon adton mga mag-upay an kinabuhi.

³Daop ngadi basi paghukman kamo nga mga makasasala! Sugad la kamo han mga diwatahan, mga manlilibog, ngan mga babaye nga magraot in dungog.

⁴Hin-o an iyo gin-iintrimisan? Hin-o an ginyuyubitan niyo nga mga buwaon?

⁵Ginsisingba niyo an kadiyosan han pagkahimungaan pinaagi han iyo pakighilawas ha sirong han iyo baraan nga mga kahoy. Iginhahalad niyo an iyo mga anak sugad nga mga halad nga tinubod didto han batoon nga mga lungib nga hirani hin hinubsan nga mga sapa.

⁶Kinukuha niyo didto in maghamis nga mga bato ngan ginsisingba niyo ini sugad nga kadiyosan. Gin-iipisan niyo hin bino nga iyo mga halad ngan iyo gindadara in mga halad nga pagkaon. Naghuhunahuna ba kamo nga nalilipay ako hini ngatanan?

⁷Napakadto kamo han higtaas nga mga bukid pagtubod hin mga halad ngan hin pakighilawas.

⁸Ginbubutang niyo an iyo maglaw-ay nga mga diyosdiyos ha sakob, hirani han iyo mga porta. Ginsasalikway ako niyo; naghuhubo kamo ngan napakadto kamo han iyo dagko nga mga higdaan upod an iyo mga hinigugma nga iyo binabaydan basi la makigdirig ha iyo. Ngan didto pinapatakasan niyo an iyo kaipahon.

⁹Nagbubutang kamo han iyo mga pahamot ngan mga iharaplas ngan napakadto kamo hin pagsingba han diyos nga hi Molec. Nagpapadara kamo hin mga sinugo ngadto ha kahigrayoan, bisan pa ngadto ha kalibutan han mga patay hin pamiling la hin kadiyosan nga pagsisingbahon.

¹⁰Nagguguol kamo pagpinamiling hin iba nga kadiyosan, kundi diri gud kamo naundang. Naghuhunahuna kamo nga nahatag ha iyo hin kusog an iyo maglaw-ay nga mga diyosdiyos, sanglit diri gud kamo nanluluya.

¹¹Nasiring an GINOO, “Hin-o ini nga kadiyosan nga nakakapahadlok ha iyo, sanglit nagbibinuwa kamo ha akon, ngan nangangalimot na kamo ha akon? Inmukoy ba kamo hin pagpasidungog ha akon tungod nga nagmingaw man ako hin maiha?

¹²Naghuhunahuna kamo nga matadong an iyo binubuhat, kundi ipapadayag ko an iyo mga ginawian, ngan diri gud makakabulig ha iyo an iyo mga diyosdiyos.

¹³Kon tumawag kamo hin pakibulig, asay an iyo mga diyosdiyos an papagtalwasa ha iyo. Igpapalid ini hin usa la ka paghuyop hin hangin! Kundi mag-uokoy didto han tuna adton mga nasarig ha akon ngan pagsisingbahon ako nira didto han akon Templo.”

¹⁴Nasiring an GINOO, “Pabalika ha akon an akon mga tawo. Kuhaa an ngatanan nga nakakaulang ha ira aragian! Himoa an dalan ngan andama ini!

¹⁵“Ako amo an gilalabawi ngan baraan nga Dyos, nga buhi ha kadayonan. Nag-uokoy ako didto hin hitaas ngan baraan nga dapit, kundi nag-uokoy liwat ako upod hin mga tawo nga mapinaubsanon ngan mabinasolon, basi makapahiuli ako han ira pagtapod ug paglaom.

¹⁶Gintagan ko hin kinabuhi an akon mga tawo, ngan diri ako magpapadayon hin pagsumbong ha ira o hin pagkasina ha ira ha kadayonan.[75]

¹⁷Nasina ako ha ira tungod han ira sala ug kahalot, sanglit ginkastigo ngan ginpabay-an ko hira. Kundi magtig-a gud an ira ulo ngan nagpadayon gudla hira han ira kalugaringon nga paagi.

¹⁸“Hinkit-an ko an ira panggawi; kundi pagtatambalon ko hira. Pagmamandoan ngan bubuligan ko hira, ngan pagliliawon ko adton mga mabidoon.

¹⁹Ihinahatag ko in kalinaw ngadto han ngatanan, han mga higrani ngan han mga higrayo! Pagtatambalon ko an akon mga tawo.

²⁰Kundi sugad an magraot nga mga tawo hin mabalod nga dagat kanay mga balod sunodsunod an pag-abot, nga nagdadara hin sighot ug lapok.

²¹Waray gud kamurayaw para han mga makasasala,” nasiring an GINOO.