Read Waray Samarenyo Meaning Based Isaias 61 Bible Online

Isaias 61 - Waray Samarenyo Meaning Based bible

Isaias 61

¹Aadi ha akon an espiritu han GINOO nga Dyos. Ginpili ngan ginsugo ako niya Hin pagdara hin maupay nga sumat ngadto han mga kablas. Hin pagtambal han mga masulob-on, Hin pagpahibaro hin katalwasan ngadto han mga bihag, Ngan hin kagawasan ngadto hadton mga priso.

²Ginsugo ako niya hin pagsangyaw Ngan inmabot na an panahon Nga tatalwason han GINOO an iya mga tawo Ngan pipirdehon an ira mga kaaway. Ginsugo ako niya hin pagliaw han ngatanan nga mabidoon,

³Paghatag ngadto hadton mga mabidoon didto ha Sion Hin rayhak ug kalipay nga liwan hin kabidoan, Hin usa nga kanta hin pagdayaw nga liwan hin kabido. Masusugad hira hin mga kahoy Nga igintanom han GINOO ngahaw. Pagbubuhaton nira ngatanan an matadong, Ngan pagdadayawon nira an Dyos tungod han iya ginbuhat.

⁴Pagtitindogon nira hin utro in mga syudad nga maiha na hin duro nga nagkaruruba.

⁵Akon mga tawo, mag-aalagad ha iyo in mga lumalangyaw, Pagbabantayan nira an iyo mga panon, Ngan pag-uumhon nira an iyo tuna ngan pagmamangnoan an iyo mga urubasan.

⁶Ngan hikikilal-an kamo nga kapadian han GINOO, Ngan mga surugoon han aton Dyos. Pagpapahimulosan niyo an bahandi han mga nasod, Ngan maparayaw kamo nga iyo ini ngatanan.

⁷Natapos na an iyo kaawod ngan kaalo. Mag-uokoy kamo didto han iyo kalugaringon nga tuna, Ngan maduha ka pilo an iyo mga bahandi! Magpapadayon gud an iyo kalipay.

⁸Nasiring an GINOO, “Hinihigugma ko an pagkamatadong, ngan napupungtan ko an pagtalumpigos ngan an pagtalapas. Babaloson ko nga matinumanon an akon mga tawo, Ngan maghihimo ako hin dayon nga ginsaaran ha ira.

⁹Mababantogan hira dida han kanasoran; Mahibabaro an ngatanan nga nakita ha ira Nga usa hira nga mga tawo nga akon ginpakaupay.”

¹⁰Nagrayhak an Jerusalem tungod han ginbuhat han GINOO. Sugad hiya hin karaslon nga babaye nga ginbadoan para han iya pagkasal. Ginbadoan hiya han Dyos hin katalwasan ngan pagdarag-an!

¹¹Sugad nga naturok ngan natubo gud an mga binhe, Pagtatalwason han GINOO nga Dyos an iya mga tawo, Ngan pagdadayawon an GINOO han ngatanan nga mga nasod.