Read Waray Samarenyo Meaning Based Isaias 62 Bible Online

Isaias 62 - Waray Samarenyo Meaning Based bible

Isaias 62

¹Magyayakan ako hin pagdasig han Jerusalem; Diri ako mahilom tubtob nga matalwas hiya, Ngan maglamrag an iya pagdarag-an sugad hin sulo ha kagab-ihon.

²Jerusalem, nakita an mga nasod ha imo nga madinaogon! Makita han imo kaanyag an ngatanan nira nga kahadian. Tatawgon ka hin bag-o nga ngaran, Usa nga ngaran nga iginhatag han GINOO.

³Masusugad ka hin usa nga matahom nga korona para han GINOO.

⁴Diri ka na gud tatawagon nga “Sinalikway,” O tatawagon an imo tuna nga “An Binayaan nga Asawa.” “Nalilipay ha Iya an Dyos” an magigin bag-o nimo nga ngaran! Tatawagon an imo tuna nga “Ginkasal-Nga-Malipayon,” Kay nalilipay ha imo an GINOO, Ngan sugad hiya hin usa nga bana han imo tuna.

⁵Sugad hin usa nga olitawo nga nangangasawa hin uray nga babaye, Pangangasaw-on ka niya nga nagtuha ha imo. Sugad nga nalilipay in usa nga bana han iya asawa, Malilipay man ha imo an imo Dyos.

⁶Jerusalem, nagbutang ako hin mga gwardya dida han imo mga pader, Kinahanglan aada gud hira ha ira dapit adlaw gab-i. Ikaw nga nagpahinumdom han GINOO han iya mga saad Diri ka gud magpahuway. Ngan diri gud hiya tugotan nga mahingalimot ha ira.

⁷Kinahanglan diri gud hira hiya papahuwayon tubtob nga ipahiuli niya an Jerusalem Ngan himoon niya ini nga usa nga syudad nga gindadayaw han bug-os nga kalibutan!

⁸Iginsumpa na han GINOO, Ngan pagtutumanon niya ini pinaagi han iya gahom: “Diri ko gud ihahatag an iyo pagkaon ngadto han iyo mga kaaway. Ngan diri na an mga lumalangyaw mainom han iyo bino.

⁹Kundi kamo nga nagtanom ngan nag-ani, Amo an makaon han tinapay ngan magdadayaw han GINOO. Kamo nga nagmangno ngan nanmuro han mga ubas Amo an mainom han bino didto han mga bungsaran han akon Templo.”

¹⁰Mga tawo han Jerusalem, pagkagawas kamo han syudad Ngan paghimo hin dalan para han nangunguli niyo nga mga tawo! Pag-andam kamo hin hiluag nga dalan; hawani ini hin mga bato! Pag-isa hin sinyal basi makahibaro an mga nasod

¹¹Nga nagpapahibaro an GINOO ngadto han bug-os nga tuna: “Sumati an mga tawo han Jerusalem Nga tikanhi na an GINOO hin pagtalwas ha iyo, Nga gindadara niya an mga tawo nga iya gintalwas.”

¹²Pagtatawgon kamo nga “Baraan-nga-Katawhan-han-Dyos,” “An-Katawhan-nga-Gintubos-han-GINOO.” Pagtatawgon an Jerusalem nga “An-Syudad-nga-Hinihigugma-han-Dyos,” “An-Syudad-nga-Waray-Igsalikway-han-Dyos.”