Read Waray Samarenyo Meaning Based Isaias 63 Bible Online

Isaias 63 - Waray Samarenyo Meaning Based bible

Isaias 63

¹Hin-o ini nga tikanhi tikang han syudad han Bozra didto ha Edumea? Hin-o ini nga nakakabado hin panapton nga pula, nga naglalakat[76] nga may-ada gahom ug kusog? Amo ini an GINOO nga may gahom hin pagtalwas, nga tikanhi na hin pagpahibaro han iya pagdarag-an.

²“Kay ano nga mapula an iya panapton, nga sugad hin kanan tawo nga nagtatamaktamak hin mga ubas para hin paghimo hin bino?”

³Mabaton an GINOO, “Gintamaktamakan ko an mga nasod sugad hin mga ubas, ngan waray gud inmabot hin pagbulig ha akon. Gintamaktamakan ko hira ha akon kasina, ngan nakadum-it an ira dugo han ngatanan ko nga panapton.

⁴Iginlarang ko nga inmabot na an panahon hin pagtalwas han akon mga tawo; panahon na ini hin pagkastigo han ira mga kaaway.

⁵Nahipausa ako nga ha akon pagtan-aw, waray ko hinkit-an nga mabulig ha akon. Kundi nakapakusog ha akon an akon kasina, ngan ako ngahaw an nakadara han pagdarag-an.

⁶Ha akon kasina gintamaktamakan ko in bug-os nga mga nasod ngan ginpuo ko hira. Ginhuwad ko ngada ha tuna an ira dugo nga nahatag hin kinabuhi.”

⁷Igsusumat ko an waray pagkapakyas nga paghigugma han GINOO; gindadayaw ko hiya tungod han ngatanan nga ginbuhat niya para ha aton. Ginhura niya hin kaupayan an mga tawo han Israel, tungod han iya pagkalooy ngan dayuday nga paghigugma.

⁸Nagsiring an GINOO, “Akon hira mga tawo; diri hira maglilimbong ha akon.” Sanglit iya gintalwas hira

⁹tikang han ngatanan nira nga mga pag-antos. Diri adto usa nga anghel, kundi an GINOO ngahaw an nagtalwas ha ira. Iya gintalwas hira tungod han iya paghigugma ngan pagpaid. Iya hira dayuday ginmangnoan han una pa nga mga adlaw,

¹⁰kundi sinmupil hira ha iya ngan ginbido an iya baraan nga espiritu. Sanglit nahimo an GINOO nga ira kaaway ngan nakig-away kontra ha ira.

¹¹Kundi hinnumdoman nira[77] an nag-agi nga mga adlaw ni Moises nga surugoon han GINOO, ngan pinmakiana hira, “Hain na man yana an GINOO nga nagtalwas han mga pangulo han iya mga tawo basi diri hira malumos ha dagat? Hain na an GINOO nga naghatag han iya espiritu ngadto kan Moises?

¹²Hain na an GINOO nga tungod han iya gahom nagbuhat hin dagko nga mga butang pinaagi kan Moises, nga nagbuhag han katubigan han dagat ngan nagdara han iya mga tawo hin paglatas han hilarom nga tubig, basi madaog para ha iya ngahaw in kabantogan nga waray kataposan?” Ginmandoan hira han GINOO, ngan sugad hin ihalas nga mga kabayo diri gud nalilisa an ira mga tiil, ngan waray gud hira manhipakdol.

¹⁴Sugad nga gintutugwayan an kabakahan ngadto han malangbo nga kahamub-an, gintagan man han GINOO an iya mga tawo hin pagpahuway. Ginmandoan niya an iya mga tawo, ngan napasidunggan an iya ngaran.

¹⁵O GINOO, tamdi kami tikang han imo mahimayaon ngan baraan nga urokyan didto ha langit. Hain na man an imo dako nga pagpaid para ha amon? Hain na an imo gahom? Hain na man an imo paghigugma ngan pagkalooy? Ayaw gad kami pagpabay-i.

¹⁶Ikaw an amon amay. Diri makilala ha amon hira Abraham ug Jacob nga amon kaapoy-apoyan, kundi ikaw, O GINOO, amo an amon amay nga dayuday nagtutubos ha amon.

¹⁷Kay ano nga itinugot mo man nga mahisalaag kami tikang han imo mga paagi? Kay ano nga ginpatig-a mo hin duro an amon mga ulo sanglit nabulag kami ha imo? Balik gad, tungod hadton mga nag-aalagad ha imo, tungod han mga tawo nga dayuday mo na gin-angkon.

¹⁸Gintabog hin madaliay han amon mga kaaway kami nga imo baraan nga mga tawo; gintamaktamakan nira an imo baraan nga ruwang.[78]

¹⁹An imo pagdumara ha amon baga sugad hin diri ka namon punoan, sugad hin diri kami nimo mga tawo.