Read Waray Samarenyo Meaning Based Levitico 10 Bible Online

Levitico 10 - Waray Samarenyo Meaning Based bible

Levitico 10

¹Kinmuha hira Nadab ug Abiu nga mga anak nga kalalaken-an ni Aaron han ira surudlan hin insyenso, ngan ginsudlan ini hin mga baga, ginbutangan hin insyenso, ngan iginhalad ngadto han GINOO. Kundi naghalad hira hin diri baraan nga kalayo kay waray man hira sugoa han GINOO hin paghalad hini.

²Ha gilayon nagpadara hin kalayo an GINOO ngan ginsunog hira. Namatay hira ha atubangan han GINOO.

³Niyan nagsiring hi Moises kan Aaron, “Amo ini an iginhimangraw han GINOO han iya pagsiring, ‘Kinahanglan magtahod han akon pagkabaraan an ngatanan nga nag-aalagad ha akon; igpapadayag ko an akon himaya ngadto han akon mga tawo.’”[3] Kundi hinmilom la hi Aaron.

⁴Gintawag ni Moises hira Misael ug Elzafan nga mga anak nga kalalaken-an ni Uziel nga bata ni Aaron, ngan nagsiring ha ira, “Kadi ngan kuhaa didi han baraan nga Tulda an mga lawas han iyo patod ngan igawas hira han kampo.”

⁵Sanglit dinmuok hira ngan kinaptan an mga panapton han mga minatay ngan gindara nira ngadto ha gawas han kampo sumala han iginsugo ni Moises.

⁶Niyan nagsiring hi Moises kan Aaron ngan han iya mga anak nga kalalaken-an nga hira Eleazar ug Itamar, “Ayaw niyo pagpabay-i nga gumok an iyo buhok o paggisia an iyo mga panapton hin pagpakita nga masulob-on kamo. Kon pagbuhaton ini niyo, mapatay kamo ngan masisina an GINOO kontra han bug-os nga bungto. Kundi tutugotan an ngatanan nga iyo mga igkasi Israelita hin pagmabidoon tungod hadton ginpatay han GINOO hin kalayo.

⁷Ayaw kamo pagbaya han agian han Tulda kay bangin mamatay kamo. Baraan na kamo kay gindihogan na kamo hin lana han GINOO.” Sanglit ginbuhat nira sumala han iginsiring ni Moises.

⁸Nagsiring an GINOO kan Aaron,

⁹“Kinahanglan diri sumulod han akon Tulda ikaw ngan an imo mga anak nga kalalaken-an katapos niyo uminom hin bino o bisan ano nga makahurubog nga irimnon; kon pagbuhaton niyo ini, mapatay kamo. Usa ini nga balaod nga pagtutumanon han ngatanan mo nga mga tulin.

¹⁰Kinahanglan mahibaroan mo an kalainan han mga butang nga baraan ngan han ordinaryo la nga mga butang, han malinis sumala han seremonyas ngan han diri malinis.

¹¹Kinahanglan pagtutdoan mo an mga tawo han Israel han ngatanan nga mga balaod nga iginhatag ko ha imo pinaagi kan Moises.”

¹²Nagsiring hi Moises kan Aaron ngan han duha niya nga nahisalin nga mga anak nga kalalaken-an, hira Eleazar ug Itamar, “Kuhaa an halad nga pagkaon nga salin han pagkaon nga iginhalad ngadto han GINOO, paghimo hin tinapay nga waray patubo ngan kaona ini ha ligid han altar, kay labi hin ka baraan ini nga halad.

¹³Kaona ini didto hin baraan nga dapit; bahin ini nimo ngan han imo mga anak nga kalalaken-an tikang han pagkaon nga iginhalad ngadto han GINOO. Amo ito an iginsugo ha akon han GINOO.

¹⁴Kundi makakahimo pagkaon kamo ngan an iyo mga panimalay han dughan ngan han mangorhi nga paa nga iginhalad nga linain nga regalo ngan an linain nga amot ngadto han GINOO para han kapadian. Makakaon ini niyo bisan diin nga dapit nga malinis sumala han seremonyas. Iginhatag ha iyo ngan han iyo mga anak ini nga mga halad sugad nga iyo bahin tikang han mga halad hin pagkaurosa han mga tawo han Israel.

¹⁵Pagdadad-on nira an mangorhi nga paa ngan an dughan dungan han pagdara han tambok nga usa nga halad nga pagkaon ngadto han GINOO. Ha kadayonan iyo ngan han iyo mga anak ini nga mga bahin, sumala han iginsugo han GINOO.”

¹⁶Pinmakiana hi Moises hiunong han kanding nga halad tungod hin sala ngan hinbaroan niya nga gintubod na ini. Nasina hi Moises kanda Eleazar ug Itamar, ngan nagpakiana hiya,

¹⁷“Kay ano nga waray niyo kaona an halad tungod hin sala didto hin baraan nga dapit? Labi hin ka baraan ini ngan iginhatag ini ha iyo han GINOO basi makuha an sala han bungto.

¹⁸Tungod nga waray man an dugo hini isakob han baraan nga Tulda, kinahanglan didto unta niyo kakaona an halad sumala han akon iginsugo.”

¹⁹Binmaton hi Aaron, “Kon akon ginkaon an halad tungod hin sala yana nga adlaw, makalipay ba ini han GINOO? Yana nga adlaw iginhalad han mga tawo ngadto han GINOO an ira halad tungod hin sala ngan gindara nira an ira halad nga tutuboron, kundi nanhinabo la gihapon ha akon ini nga makaharadlok nga mga butang.”

²⁰Han pakabati hini ni Moises, tinmunga hiya han baton ni Aaron.