Read Waray Samarenyo Meaning Based Levitico 13 Bible Online

Levitico 13 - Waray Samarenyo Meaning Based bible

Levitico 13

¹Iginhatag han GINOO kanda Moises ug Aaron ini nga mga turumanon.

²Kon in usa ka tawo may-ada katol ha iya panit, o hubag o namumula nga mahirimo nga sanla, kinahanglan pagdad-on hiya ngadto han padi nga tulin ni Aaron.

³Uusisahon han padi an katol, ngan kon nagbusag na an mga buhok dida han katol ngan diri na la katol ha panit kundi hasta na ngadto han unod, sanla ini nga sakit ngan igpapahibaro han padi nga mahugaw ini nga tawo.

⁴Kon mabusag na an katol, kundi diri pa hilarom ngan diri pa mabusag an mga buhok, iglalain han padi ini nga tawo sulod hin pito ka adlaw.

⁵Dida han ikapito ka adlaw uusisahon na liwat hiya han padi, ngan kon ha iya paghunahuna amo la gihapon pagkit-on an katol ngan waray man pagsarang, iglalain ini nga tawo sulod hin pito pa ka adlaw.

⁶Uusisahon na liwat hiya han padi katapos han ikapito ka adlaw, ngan kon kinmupos na an katol ngan waray magsarang, iya igpapahibaro nga malinis na hiya sumala han seremonyas; usa la ini nga yano nga katol. Pagbubunakan han tawo an iya mga panapton ngan magmamalinis na hiya sumala han seremonyas.

⁷Kundi kon magsarang an katol kahuman hiya mausisa ngan igpahibaro hiya han padi nga malinis hiya, kinahanglan pumakita na liwat hiya han padi.

⁸Uusisahon na liwat hiya han padi, ngan kon hisabotan nga nagsarang an katol, igpapahibaro han padi nga mahugaw na liwat hiya; sanla ini nga sakit.

⁹Kon in usa ka tawo may sakit nga sanla, kinahanglan dad-on hiya ngadto han padi

¹⁰nga mag-uusisa ha iya. Kon may mabusag nga katol ha iya panit nga nakakapabusag han mga buhok dida han katol ngan puno ini hin nana,

¹¹sanla ini nga maiha na kaupay. Igpapahibaro han padi nga mahugaw ini nga tawo ngan diri na kinahanglan nga iglain hiya, kay mahugaw gud hiya.

¹²Kon magsarang na an sakit ngan makalukop han bug-os nga lawas tikang ha alimpoporo ngadto ha rapadapa

¹³pag-uusisahon na liwat hiya han padi. Kon tinuod nga lukop na an bug-os nga lawas hin katol, igpapahibaro han padi nga diri mahugaw an tawo sumala han seremonyas. Kon nagbusag na an iya bug-os nga panit; malinis hiya sumala han seremonyas.

¹⁴Kundi kon hikit-an in mapula nga unod dida han katol, mahugaw ini nga tawo.

¹⁵Pagsususihon na liwat hiya han padi, ngan kon hikit-an nga mapula na an unod, igpapahibaro niya nga mahugaw an tawo. Nangangahulogan nga sanla in kinikita nga mapula nga unod, ngan mahugaw an tawo.

¹⁶Kundi kon mag-upay an katol ngan magmabusag na liwat, mapakadto an padi han tawo

¹⁷nga magsususi na liwat ha iya. Kon nagbusag na an katol, malinis na liwat hiya sumala han seremonyas, ngan igpapahibaro han padi nga malinis na hiya.

¹⁸Kon an bisan hin-o may hubag nga nag-upay na,

¹⁹ngan katapos, nagbulbog liwat ngan namula an hinubagan kon an mabusag nga nahubag nagtikapula, kinahanglan mapakadto hiya han padi.

²⁰Pagsususihon hiya han padi, ngan kon hilarom na an hubag ngan nagbusag an mga buhok dida hini, igpapahibaro han padi nga mahugaw hiya. Sanla ini nga sakit nga nagtikang dida han hubag.

²¹Kundi kon kahuman pagsusiha han padi ngan hikit-an niya nga waray man magbusag an mga buhok dida hini ngan waray man maghilarom an hubag, kundi nangangapay la, iglalain hiya han padi sulod hin pito ka adlaw.

²²Kundi kon magsarang ini nga mabusag nga nahubag, igpapahibaro han padi nga mahugaw hiya; may-ada hiya sakit nga sanla.

²³Kundi kon diri ini magbalhin ngan diri magsarang, an ulat la ini nga nahibilin tikang han hubag, ngan igpapahibaro han padi nga malinis hiya sumala han seremonyas.

²⁴Hiunong hin usa ka tawo nga nasunog, kon an unod nga nasunog magbusag o namumula nga pangapay,

²⁵pagsususihon hiya han padi. Kon nagbusag an mga buhok dida hini nga nasunog nga panit ngan kon diri la an panit an nasunog kundi pati an unod dida hini, sanla ini nga sakit nga nagtikang dida han nasunog nga panit, ngan igpapahibaro han padi nga mahugaw ini nga tawo.

²⁶Kon waray magbusag an mga buhok dida hini ngan aada la ha panit kundi nangangapay la, iglalain hiya han padi sulod hin pito ka adlaw.

²⁷Pagsususihon na liwat hiya han padi dida han ikapito ka adlaw, ngan kon hisabotan nga nagsasarang ini, usa ini nga sakit nga sanla, ngan igpapahibaro han padi nga mahugaw ini nga tawo.

²⁸Kon amo la gihapon ini ngan diri magsarang kundi nangangapay la, diri ini sanla. Igpapahibaro han padi nga malinis hiya sumala han seremonyas, kay ulat la ini han nasunog nga panit.

²⁹Kon in usa nga lalake o usa nga babaye may-ada katol ha iya ulo o ha iya sulang,

³⁰pagsususihon hiya han padi. Kon hisabotan nga diri la ini ha panit kundi nahiupod na an unod ngan an mga buhok dida hini madarag ngan halaghag na, sanla ini nga sakit, ngan igpapahibaro han padi nga mahugaw hiya nga tawo.

³¹Kundi, kon kahuman pagsusiha ha iya han padi, hisabotan nga ha panit la an sakit, ngan waray la gihapon mag-itom nga mga buhok dida hini, iglalain hiya han padi sulod hin pito pa ka adlaw.

³²Dida han ikapito ka adlaw pagsususihon na liwat han padi an katol, ngan kon waray magsarang ngan waray man madarag nga mga barahibo dida hini, ngan aada la ha panit an katol,

³³pagtutusaran han tawo an panit, palibot han katol. Niyan iglalain na liwat hiya han padi sulod hin lain nga pito pa ka adlaw.

³⁴Dida han ikapito ka adlaw pagsususihon na liwat han padi an katol, ngan kon hisabotan nga waray ini magsarang ngan aada la ha panit, igpapahibaro han padi nga malinis an tawo sumala han seremonyas. Pagbubunakan han tawo an iya mga panapton ngan magmamalinis hiya.

³⁵Kundi kon magsarang an katol kahuman igpahibaro nga malinis na hiya,

³⁶sususihon na liwat hiya han padi. Kon nagsarang na an katol, bisan kon waray madarag nga mga buhok; dayag kaupay nga mahugaw ini nga tawo.

³⁷Kundi kon ha paghunahuna han padi waray magsarang an katol ngan nanunubo dida hini in mag-itom nga mga buhok, nag-upay na an katol, ngan igpapahibaro han padi nga malinis na hiya nga tawo sumala han seremonyas.

³⁸Kon an usa nga lalake o usa nga babaye may-ada pamusag ha iya panit,

³⁹pagsususihon han padi ito nga tawo. Kon duason an pamusag hini, usa la ini nga alap-ap ha panit; malinis hiya nga tawo sumala han seremonyas.

⁴⁰Kon magroto an buhok hin usa ka tawo ha luyo o ha atubangan han iya ulo, diri ini nakakapahugaw ha iya.

⁴¹

⁴²Kundi kon pumakita dida han kadangasan in nangangapay nga kamapula nga katol, sanla ini nga sakit.

⁴³Pagsususihon hiya han padi, ngan kon tinuod nga may-ada nangangapay nga kamapula nga katol,

⁴⁴igpapahibaro han padi nga mahugaw hiya, tungod han sanla nga sakit dida han iya ulo.

⁴⁵An tawo nga may-ada sanla kinahanglan magbado hin gisi nga panapton diri magsudlay han iya buhok, magtahob han ubos nga bahin han iya nawong, ngan gumoliat hiya, “Mahugaw ako, mahugaw ako!”

⁴⁶Magpapabilin hiya nga mahugaw samtang aada pa ha iya an sakit nga sanla, ngan kinahanglan mag-ukoy hiya ha gawas han kampo, hirayo han iba.

⁴⁷Kon may alamag[5] dida hin panapton, ma delana o lino,

⁴⁸o dida hin bisan ano nga lino o delana nga dugnit, o dida hin anit, o bisan ano nga hinimo hin anit,

⁴⁹kon may-ada ini pagkaberde o pagkapula, usa ini nga nagsasarang nga alamag ngan kinahanglan ipakita ini ha padi.

⁵⁰Pagsususihon ini han padi ngan iglalain niya hin pagbutang sulod hin pito ka adlaw.

⁵¹Dida han ikapito ka adlaw pagsususihon na liwat niya ini, ngan kon nagsarang na an alamag, mahugaw ini nga butang.

⁵²Susunogon ini han padi kay matapon ini nga alamag ngan kinahanglan sunogon ini hin kalayo.

⁵³Kundi kon ha pagsusi han padi, hikikit-an niya nga waray magsarang an alamag dida han butang,

⁵⁴magsusugo hiya nga paghugasan ini ngan iglain sulod hin pito pa ka adlaw.

⁵⁵Iya na liwat ini pagsususihon, ngan kon waray maglubad an alamag, bisan kon waray magsarang ini, mahugaw la ini gihapon; kinahanglan pagsunogon ini nga butang, bisan kon an kadumgan aada ha atubangan o ha talikoran.

⁵⁶Kundi kon ha pagsusi han padi naglubad na an alamag, gigision niya ini tikang han panapton o anit.

⁵⁷Niyan kon pumakita na liwat an alamag, ngan magsarang na liwat ini, pagsusunogon han tag-iya ini nga butang.

⁵⁸Kon paghugasan niya an butang ngan makuha an alamag, huhugasan na liwat ini niya ngan magmamalinis ini nga butang sumala han seremonyas.

⁵⁹Sanglit amo ini an turumanon hiunong han alamag dida hin panapton, ma delana o lino ini, o dida hin lino o delana nga dugnit, o dida hin bisan ano nga hinimo hin anit.