Read Waray Samarenyo Meaning Based Levitico 14 Bible Online

Levitico 14 - Waray Samarenyo Meaning Based bible

Levitico 14

²inin masunod nga mga turumanon hiunong han seremonyas hin paglinis hin usa ka tawo nga nag-upay na han sakit nga sanla. Ha adlaw nga ginpahibaro nga malinis na hiya, pagdadad-on hiya ngadto han padi,

³ngan iggagawas hiya han kampo ngan didto pag-uusisahon hiya. Kon upay na an sakit,

⁴magsusugo an padi nga pagdad-on in duha nga mga tamsi nga maglinis sumala han seremonyas, upod in usa ka pedaso nga kahoy nga sidro, usa nga pula nga lubid, ngan hin usa nga sanga hin isopo.

⁵Niyan magsusugo an padi nga pag-ihawon an usa han duha nga tamsi ha bawbaw hin makaong nga kalot nga may sulod nga puraw nga tubig tikang hin burabod.

⁶Kukuhaon niya an ikaduha nga tamsi ngan itutunlob ini upod an kahoy nga sidro, an pula nga lubid, ngan an isopo dida han dugo han tamsi nga gin-ihaw.

⁷Igwawarikwik niya an dugo hin makapito ngadto han tawo nga paglilinisan han iya sakit nga sanla, ngan katapos igpapahibaro nga malinis na hiya. Palulupdon niya an buhi nga tamsi ha igbaw han kaumhan.

⁸Pagbubunakan han tawo an iya mga panapton, kikiskisan an iya ulo ngan makarigos hiya; niyan magmamalinis na hiya sumala han seremonyas. Makakasulod na hiya han kampo, kundi kinahanglan mag-ukoy hiya ha gawas han iya tulda sulod hin pito ka adlaw.

⁹Dida han ikapito ka adlaw kikiskisan na liwat niya an iya ulo, tutusaran an iya bungot, an iya mga kiray, ngan an iba pa nga buhok dida han iya lawas; pagbubunakan niya an iya mga panapton ngan makarigos hiya, ngan katapos magmamalinis na hiya sumala han seremonyas.

¹⁰Dida han ikawalo ka adlaw dadad-on niya in duha nga lalaki nga nati nga karnero ngan hin usa nga babayi nga karnero nga usa pa la ka tuig an panuigon, ngan waray mga dum-it; duha ka kilo nga harina nga sinaktan hin lana hin olibo, ngan tunga hin litro nga lana hin olibo.

¹¹Pagdadad-on han padi an tawo ngan ini nga mga halad ngadto han agian han Tulda han GINOO.

¹²Niyan kukuhaon han padi an usa han duha nga lalaki nga mga nati nga karnero, upod an tunga hin litro nga lana hin olibo, ngan ighahalad ini nga usa nga halad hin pagbayad. Ighahalad niya ini nga usa nga linain nga regalo ngadto han GINOO para han padi.

¹³Pag-iihawon niya an nati nga karnero didto han baraan nga dapit diin gin-iihaw an mga hayop para han mga halad tungod hin sala ngan an mga halad nga tutuboron. Kinahanglan pagbuhaton niya ini kay, sugad han halad tungod hin sala, para han padi an halad hin pagbayad ngan baraan ini kaupay.

¹⁴Makuha an padi hin dugo han nati nga karnero ngan igpapahid ini dida han mitaybitay han tuo nga talinga, dida han tamuragko han tuo nga kamot, ngan dida han tamuragko han tuo nga tiil han tawo nga igpapahibaro nga malinis na sumala han seremonyas.

¹⁵Makuha an padi hin lana han olibo ngan igbububo ini ngada han palad han iya kalugaringon nga wala nga kamot,

¹⁶itutunlob ngada hini in tudlo han iya tuo nga kamot, ngan igwawarikwik ini hin makapito didto han atubangan han GINOO.

¹⁷Makuha hiya hin lana nga aada han palad han iya kamot ngan hin dugo han nati nga karnero ngan ipapahid ini dida han mitaybitay han tuo nga talinga, dida han tamuragko han tuo nga kamot, ngan dida han tamuragko han tuo nga tiil han tawo nga igpapahibaro nga malinis na sumala han seremonyas.

¹⁸Ipapahid niya dida han ulo han tawo an salin han lana nga aada han palad han iya kamot. Dida hini nga paagi pagbubuhaton niya an seremonyas hin paglinis.

¹⁹Niyan ighahalad han padi an halad tungod hin sala ngan pagbubuhaton niya an seremonyas hin paglinis. Katapos hito, pag-iihawon niya an hayop nga para han halad nga tutuboron,

²⁰ngan ighahalad ini dida han altar upod an halad nga pagkaon. Dida hini nga paagi pagbubuhaton han padi an seremonyas hin paglinis, ngan magmamalinis an tawo sumala han seremonyas.

²¹Kon kablas an tawo nga diri hiya nakakaakos, magdadara hiya para han paglinis hin usa la nga lalaki nga karnero nga iya halad hin pagbayad tungod hin sala, nga usa nga linain nga regalo ngadto han GINOO para han padi. Magdadara hiya hin usa la ka kilo nga harina nga sinaktan hin lana hin olibo para hin usa nga halad nga pagkaon, ngan hin tunga hin litro nga lana hin olibo.

²²Magdadara liwat hiya hin duha nga sarapati o duha nga tukmo, an usa para han halad tungod hin sala ngan an ikaduha para han halad nga tutuboron.

²³Dida han ikawalo ka adlaw han iya paglinis pagdadad-on niya ini ngadto han padi dida han agian han Tulda.

²⁴Kukuhaon han padi an nati nga karnero ngan an lana hin olibo ngan ighahalad ini nga usa nga linain nga regalo ngadto han GINOO para han padi.

²⁵Pag-iihawon niya an karnero ngan makuha hiya han dugo ngan ipapahid ini dida han mitaybitay han tuo nga talinga han tawo, dida han tamuragko han iya tuo nga kamot, ngan dida han tamuragko han iya tuo nga tiil.

²⁶Maipis an padi han lana hin olibo ngada han palad han iya kalugaringon nga wala nga kamot,

²⁷ngan pinaagi hin tudlo han iya tuo nga kamot igwawarikwik ini hin makapito didto ha atubangan han GINOO.

²⁸Ipapahid niya an lana ha amo manta nga mga dapit nga ginpahiran niya han dugo: dida han mitaybitay han tuo nga talinga han tawo, dida han tamuragko han iya tuo nga kamot, ngan dida han tamuragko han iya tuo nga tiil.

²⁹Ipapahid niya dida ha ulo han tawo an salin nga lana dida han iya palad, ngan dida hini nga paagi pagbubuhaton niya an seremonyas hin paglinis.

³⁰Kahuman, ighahalad niya an usa han duha nga sarapati o tukmo

³¹nga usa nga halad tungod hin sala, ngan an ikaduha usa nga halad nga tutuboron upod an halad nga pagkaon. Dida hini nga paagi pagbubuhaton han padi an seremonyas hin paglinis.

³²Amo ini an mga turumanon para han tawo nga may-ada sakit nga sanla kundi diri nakakaakos hin paghatag han mga igharalad nga kinahanglanon kan balaod hin pagkalinis.

³³Iginhatag han GINOO kanda Moises ug Aaron

³⁴inin masunod nga mga turumanon hiunong hin kabablayan nga tinaponan hin nagsasarang nga alamag. (Gagamiton ini nga mga turumanon kon makasulod na an mga tawo han Israel ngadto han tuna han Canaan nga iginhahatag ha ira han GINOO nga ira panurundon.)

³⁵Bisan hin-o nga makakaagi hin alamag dida han iya balay, kinahanglan kumadto ngan igsumat ini ha padi.

³⁶Magsusugo an padi nga iggawas ha balay an ngatanan nga mga butang nga diri pa an padi makadto hin pag-usisa han alamag; kon diri, pag-iisipon nga mahugaw an ngatanan nga butang nga aada han balay. Niyan mapakadto han balay an padi

³⁷ngan pag-uusisahon an alamag. Kon may-ada na baga birde o pula nga mga dapit nga daw nagkukutkot han bungbong,

³⁸babayaan niya an balay ngan pagsasadhan ini sulod hin pito ka adlaw.

³⁹Dida han ikapito ka adlaw mabalik hiya ngan pag-uusisahon na liwat an balay. Kon nagsarang na an alamag,

⁴⁰magsusugo hiya nga kuhaon an mga bato diin hin-aagian an alamag ngan ilabog ini ngadto hin mahugaw nga dapit ha gawas han syudad.

⁴¹Katapos hito, kinahanglan pakarosan niya an ngatanan nga bungbong ha sakob ngan ilabog an kinaros ngadto hin mahugaw nga dapit ha gawas han syudad.

⁴²Niyan gagamiton in iba nga mga bato hin pagliwan han mga bato nga ginkuha ngan gagamiton in bag-o nga papilit nga apog hin pagtahob han mga bungbong.

⁴³Kon pumakita na liwat an alamag dida han balay kahuman pagkuhaa han mga bato ngan kahuman pagkarosi ngan pagtahobi hin semento an balay,

⁴⁴makadto hin pagkita an padi. Kon nagsarang an alamag, mahugaw an balay.

⁴⁵Kinahanglan pagrub-on an balay ngan kinahanglan igawas han syudad ngan pagdad-on ngadto hin mahugaw nga dapit an mga bato, an kahoy, ngan an ngatanan nga iginpapilit nga apog hini.

⁴⁶Magmamahugaw ngada han pagkagab-i an bisan hin-o nga sumulod han balay nga sinadhan.

⁴⁷Kinahanglan magbunak han iya mga panapton an bisan hin-o nga humigda o kumaon didto han balay.

⁴⁸Kon ha pag-usisa han padi, waray na hikit-i an alamag kahuman pagtahobi hin papalit nga apog an balay, igpapahibaro han padi nga malinis na an balay sumala han seremonyas, kay nakuha na an ngatanan nga alamag.

⁴⁹Ha paglinis han balay, magdadara hiya hin duha nga tamsi, hin kahoy nga sidro, hin usa nga pula nga lubid, ngan hin usa nga sanga hin isopo.

⁵⁰Pag-iihawon niya an usa han duha nga tamsi ha bawbaw hin makaong nga kalot nga may sulod nga puraw nga tubig tikang hin burabod.

⁵¹Niyan kukuhaon niya an kahoy nga sidro, an isopo, an pula nga lubid, ngan an buhi nga tamsi, ngan itutunlob ini hira dida han dugo han tamsi nga gin-ihaw ngan dida han puraw nga tubig. Ngan pagsasabligan niya hin makapito an balay.

⁵²Dida hini nga paagi paglilinisan niya an balay pinaagi han dugo han tamsi, han puraw nga tubig, han buhi nga tamsi, han kahoy nga sidro, han isopo, ngan han pula nga lubid.

⁵³Katapos, palulupdon niya an buhi nga tamsi ngadto ha gawas han syudad ha igbaw han kaumhan. Dida hini nga paagi pagtutumanon niya an seremonyas hin paglinis han balay, ngan magmamalinis ini sumala han seremonyas.

⁵⁴Amo ini an mga turumanon hiunong han sakit nga sanla,

⁵⁵han mga katol, mga hubag, o mga nanmumula; ngan hiunong han mga alamag dida hin mga panapton o hin mga balay.

⁵⁶

⁵⁷Amo ini nga mga balaod an nagpapahayag kon mahugaw o malinis ba in usa nga butang.