Read Waray Samarenyo Meaning Based Levitico 17 Bible Online

Levitico 17 - Waray Samarenyo Meaning Based bible

Levitico 17

¹Ginsugo han GINOO hi Moises

²hin paghatag kan Aaron ngan han iya mga anak nga kalalaken-an ngan han ngatanan nga mga tawo han Israel hinin masunod nga mga turumanon:

³Nakakatalapas han Balaod in usa nga Israelita nga mag-ihaw hin baka o karnero o kanding nga usa nga halad ngadto han GINOO nga diri didto han agian han Tulda han GINOO. Nagpaawas hiya hin dugo ngan diri na hiya pag-iisipon nga sakop han bungto han Dyos.

⁵An kahulogan hini nga sugo amo ini: nga pagdad-on na han mga tawo han Israel ngadto han GINOO adton ira mga gin-ihaw nga ira ginhalad didto ha gawas han kampo. Pagdadad-on nira ngadto han padi didto han agian han Tulda ngan pag-iihawon ini nira nga mga halad hin pagkaurosa.

⁶Igsasablig han padi an dugo ngada han mga kagiliran han altar didto han agian han Tulda ngan pagtutuboron an tambok basi makahatag hin alimyon nga makakalipay han GINOO.

⁷Kinahanglan diri na magtalapas han GINOO an mga tawo han Israel pinaagi hin pag-ihaw han ira mga hayop didto han kaumhan ngan himoon nira nga mga halad nga tutuboron ngadto han mga yawa nga kanding. Kinahanglan pagtumanon ini nga lagda han mga tawo han Israel ha ngatanan nga panahon nga tiarabot.

⁸Bisan hin-o nga Israelita o lumalangyaw nga nag-uokoy dida han bungto nga maghalad hin mga hayop nga tutuboron o bisan ano nga halad

⁹ngadto han GINOO nga diri didto ha agian han Tulda, diri na hiya pag-iisipon nga sakop han bungto han Dyos.

¹⁰Bisan hin-o nga Israelita o lumalangyaw nga nag-uokoy dida han bungto nga kumaon hin karne nga may-ada pa dugo, pagkokontrahon hiya han GINOO ngan diri na hiya pag-iisipon nga sakop han iya bungto.

¹¹Aada han dugo an kinabuhi han tagsa nga buhi nga binuhat, ngan tungod hini nagsugo an GINOO nga pag-ipison dida han altar an ngatanan nga dugo para hin pagkuha han mga sala han mga tawo. An dugo nga amo an kinabuhi amo an nagkukuha han mga sala.

¹²Sanglit ginsiring han GINOO an mga tawo han Israel nga diri hira o bisan hin-o nga lumalangyaw nga nag-uokoy dida ha ira kumaon hin bisan ano nga karne nga aada pa hini an dugo.

¹³Kon magdakop in bisan hin-o nga Israelita o lumalangyaw nga nag-uokoy dida han bungto hin mananap o tamsi nga malinis sumala han seremonyas, kinahanglan pagpaawason niya an dugo hini ngada ha tuna ngan pagtak-opan ini hin tuna.

¹⁴Aada han dugo an kinabuhi han tagsa nga buhi nga binuhat sanglit ginsiring han GINOO an mga tawo han Israel nga diri hira kumaon hin bisan ano nga karne nga aada pa hini an dugo, ngan an bisan hin-o nga magpasipara hin pagbuhat hini, diri na pag-iisipon nga sakop han iya bungto.

¹⁵Bisan hin-o nga tawo, ma Israelita o lumalangyaw, nga kumaon hin karne hin mananap nga namatay ha iya la kalugaringon, o ginpatay hin ihalas nga mga mananap, kinahanglan magbunak han iya mga panapton, kumarigos, ngan humulat ngada han pagkagab-i, san-o hiya magmalinis na liwat.

¹⁶Kon diri niya pagtumanon ini, kinahanglan mag-antos hiya han mga bunga han iya pagtalapas.