Read Waray Samarenyo Meaning Based Levitico 21 Bible Online

Levitico 21 - Waray Samarenyo Meaning Based bible

Levitico 21

¹Ginsugo han GINOO hi Moises hin pagsumat han kapadian nga mga tulin ni Aaron, “Kinahanglan waray padi nga maghugaw han iya kalugaringon pinaagi hin pagbulig han mga seremonyas hin paglubong hin minatay kon mamatay in usa nga uropod,

²labot kon iya ini iroy, amay, anak nga lalake, anak nga babaye, bugto nga lalake,

³o daraga nga bugto nga nag-uokoy dida han iya balay.

⁴Diri niya paghugawan an iya kalugaringon tungod han kamatay hadton mahimo nga mga kauropod niya pinaagi han iya pag-asawa.[13]

⁵“Waray padi nga magkiskis han iya ulo o magkorti han iya bungot o magtato han iya lawas hin pagpakita nga nagmamasulob-on hiya.

⁶Kinahanglan magbaraan hiya ngan diri magpakaalo han akon ngaran. Naghahalad hiya ha akon hin mga halad nga pagkaon ngan kinahanglan nga baraan hiya.

⁷Diri mangasawa in usa nga padi hin usa nga babaye nga nagin maraot an dungog, o hin usa nga babaye nga diri na uray, o binulagan nga babaye, kay baraan hiya.

⁸Kinahanglan pag-isipon han mga tawo nga baraan an padi kay naghahalad hiya ha akon han mga halad nga pagkaon. Hi ako an GINOO; baraan ako ngan ginbabaraan ko an akon mga tawo.

⁹Kon magbaligya han iya dungog in usa nga anak nga babaye hin padi, nagpapakaalo hiya han iya amay; kinahanglan sunogon hiya ngada han kamatay.

¹⁰“Gindihogan an Labaw nga Padi ha iya ulo han igdirihog nga lana ngan iginhalad hiya hin pagsul-ot han padianon nga mga biste sanglit kinahanglan diri niya pagpabay-an nga makurumos an iya buhok, ngan diri maggisi han iya mga panapton hin pagpakita nga nagmamasulob-on hiya.

¹¹Iginhalad na hiya ha akon, ngan diri na tugot ha iya nga magmahugaw pa hiya sumala han seremonyas o maghugaw han akon baraan nga Tulda pinaagi hin paggawas hini ug pagsulod hin balay nga may minatay, bisan kon iya ini kalugaringon nga amay o iroy.

¹³Kinahanglan mangasawa hiya hin babaye nga uray pa,

¹⁴diri hin usa nga balo, o binulagan nga babaye, o hin babaye nga nagin maraot an dungog. Kinahanglan mangasawa hiya hin usa nga uray pa, nga tikang han iya kalugaringon nga banay.

¹⁵Kon diri, magmamahugaw sumala han seremonyas an iya mga anak nga kinahanglan unta magin baraan. Hi ako an GINOO ngan iginlain ko na hiya nga Labaw nga Padi.”

¹⁶Ginsugo han GINOO hi Moises

¹⁷hin pagsiring kan Aaron, “Waray han imo mga tulin nga may mga karat-an ha lawas nga makakaghalad ha akon han halad nga pagkaon. Pagtutumanon ini ha ngatanan nga panahon nga tiarabot.

¹⁸Waray tawo nga may mga karat-an ha lawas nga makakaghalad: diri mahimo nga maghatad an buta, an piay, an may karat-an ha nawong, o may iba nga karat-an ha iya lawas;

¹⁹an tawo nga may kimay nga kamot o piay nga tiil;

²⁰an tawo nga buktot o inano; an tawo nga may sakit ha mata o ha panit; ngan an tawo nga kapon.

²¹Waray tulin ni Aaron nga padi nga may mga karat-an ha lawas nga makakaghalad ha akon han halad nga pagkaon.

²²Makakahimo hin pagkaon in sugad nga tawo han iginhalad ha akon nga pagkaon: an human na ighalad nga baraan nga pagkaon ngan an ginhahalad pa nga baraan nga pagkaon,

²³kundi tungod nga may-ada niya karat-an ha lawas, diri hiya makakahirani han baraan nga biray o makakaduok han altar. Kinahanglan diri niya paghugawan ini nga baraan nga mga butang, kay hi ako an GINOO ngan ginbabaraan ko ini ngatanan.”

²⁴Amo ini an iginsiring ni Moises kan Aaron, ha mga anak nga kalalaken-an ni Aaron, ngan ha ngatanan nga mga tawo han Israel.