Read Waray Samarenyo Meaning Based Levitico 23 Bible Online

Levitico 23 - Waray Samarenyo Meaning Based bible

Levitico 23

¹Iginhatag han GINOO kan Moises

²inin masunod nga mga turumanon hiunong han mga pyesta nga pagsasaurogon diin magkakatirok hin pagsingba an mga tawo han Israel.

³May-ada niyo unom ka adlaw hin pagtuman han iyo mga buruhaton, kundi hinumdomi niyo nga an ikapito nga adlaw, nga Adlaw nga Igparahuway, usa ini nga adlaw hin pagpahuway. Ayaw kamo pagbuhat dida hini nga adlaw, kundi pag-urosa kamo hin pagsingba. Kanan GINOO an Adlaw nga Igparahuway bisan diin kamo pag-uokoy.

⁴Igsangyaw niyo an masunod nga mga pyesta dida han igintalaan nga mga panahon.

⁵An Pyesta han Paglabay nga ginsasaurog ha pagpasidungog han GINOO, natikang dida hiton katunod han adlaw han ika-14 nga adlaw han syahan nga bulan.

⁶Dida han ika-15 nga adlaw natikang an Pyesta han Tinapay nga Waray Patubo, ngan sulod hin pito ka adlaw kinahanglan diri kamo kumaon hin tinapay nga may-ada patubo.

⁷Dida han syahan hini nga mga adlaw magtitirok kamo hin pagsingba ngan diri kamo magbubuhat han iyo kada adlaw nga mga buruhaton.

⁸Ighalad niyo ha GINOO an iyo mga halad nga pagkaon sulod han pito ka adlaw. Dida hiton ikapito ka adlaw magtitirok na liwat kamo hin pagsingba, ngan diri kamo magbubuhat han iyo kada adlaw nga mga buruhaton.

⁹Kon sumulod na kamo han tuna nga iginhahatag ha iyo han GINOO ngan mag-ani na kamo han iyo mga abot, dad-a niyo an syahan nga upong ngadto han padi.

¹¹Ighahalad ini niya nga usa nga linain nga halad ngadto han GINOO basi karawaton kamo. Ighahalad ini han padi dida han adlaw nga sunod gud la han Adlaw nga Iparahuway.

¹²Dida han adlaw han paghalad niyo han halad nga pagkaon, paghalad liwat kamo hin usa nga halad nga tutuboron, nga usa nga nati nga karnero nga lalaki, nga usa ka tuig an panuigon, nga waray gud mga dum-it.

¹³Upod hini ighalad niyo in duha ka kilo nga harina nga sinaktan hin lana hin olibo ngan himoa ini nga usa nga halad nga pagkaon. Nakakalipay han GINOO an alimyon hini nga halad. Ighalad liwat niyo upod hini in usa ka litro nga bino.

¹⁴Ayaw kamo pagkaon hin bisan ano han bag-o nga binari, ma hilaw, ma sinanlag, o ma hinudno nga tinapay, tubtob han pagdad-a niyo hini nga halad ngadto sa Dyos. Kinahanglan tumanon ini nga turumanon han ngatanan niyo nga mga tulin ha ngatanan nga panahon nga tiarabot.

¹⁵Pag-ihap ma pito ka bug-os nga semana kahuman han Adlaw nga Iparahuway diin gindara niyo an usa ka upong nga inani ngan ginhalad niyo ngadto han GINOO.

¹⁶Dida han ika-50 ka adlaw, an adlaw kahuman han ikapito nga Adlaw nga Iparahuway, paghalad ngadto han GINOO hin lain nga bag-o nga halad nga pagkaon.

¹⁷Magdadara an tagsa nga panimalay hin duha ka bug-os nga tinapay ngan ighahalad ini ngadto han GINOO nga usa nga linain nga regalo. Hihimoon an kada usa ka bug-os nga tinapay tikang hin mga duha ka kilo nga harina nga hinudno nga may-ada patubo, ngan ighahalad ini ngadto han GINOO nga usa nga halad han syahan nga abot nga gin-ani.

¹⁸Ngan upod han tinapay ighahalad han bungto in pito nga mga nati nga karnero nga tag usa ka tuig an panuigon, usa liwat nga lalaki nga baka, ngan hin duha nga kanding, nga ubos waray gud mga dum-it. Ighahalad ini nga usa nga halad nga tutuboron ngadto han GINOO upod in usa nga halad nga pagkaon ngan hin usa nga halad nga irimnon nga bino. Nakakalipay han GINOO an alimyon hini nga halad.

¹⁹Paghalad liwat kamo hin usa nga kanding nga lalaki para hin usa nga halad tungod hin sala ngan hin duha nga lalaki nga mga nati nga karnero nga tag usa ka tuig an panuigon para hin usa nga halad hin pagkaurosa.

²⁰Ighahalad han padi an tinapay upod an duha nga nati nga mga karnero sugad nga usa nga linain nga regalo ngadto han GINOO para han kapadian. Baraan ini nga mga halad.

²¹Dida hito nga adlaw ayaw kamo pagbuhat han iyo kada adlaw nga mga buruhaton, kundi pagtirok kamo hin pagsingba. Kinahanglan pagtumanon han iyo mga tulin ini nga turumanon ha ngatanan nga panahon nga tiarabot bisan diin hira pag-uokoy.

²²Kon mag-aani kamo han iyo mga uma, ayaw niyo pag-aniha an aadto han mga ligid han mga uma, ngan ayaw na niyo pagbalika hin pag-ani an mga uhay nga hinlikatan; ibilin ini para han mga kablas ngan mga lumalangyaw. An GINOO amo an iyo Dyos.

²³Dida han syahan nga adlaw han ikapito nga bulan magsasaurog kamo hin usa nga linain nga adlaw hin pagpahuway, ngan magtitirok kamo hin pagsingba kon magtunog na an mga trompeta.

²⁵Paghalad kamo hin usa nga halad nga pagkaon ngadto han GINOO ngan ayaw kamo pagbuhat han iyo kada adlaw nga mga buruhaton.

²⁶An ika-10 nga adlaw han ikapito nga bulan amo an adlaw diin pagtutumanon an ikinatuig nga seremonyas hin pagkuha han mga sala han mga tawo. Dida hito nga adlaw ayaw gud kamo pagkaon hin bisan ano; pagtirok kamo hin pagsingba ngan paghalad kamo hin usa nga halad nga pagkaon ngadto han GINOO.

²⁸Ayaw kamo pagbuhat hito nga adlaw, kay adlaw ito hin pagbuhat han seremonyas hin pagkuha hin mga sala.

²⁹An bisan hin-o nga magpasipara hin pagkaon hin bisan ano hito nga adlaw, diri na hiya pag-iisipon nga sakop han bungto han Dyos.

³⁰Ngan kon may-ada magbuhat hin bisan ano nga buruhaton hito nga adlaw, an GINOO ngahaw an mapatay ha iya.

³¹Pagtutumanon ini han ngatanan niyo nga mga tulin bisan diin hira pag-uokoy.

³²Tikang han katunod han adlaw dida han ika-9 nga adlaw han bulan ngadto han katunod han adlaw dida han ika-10 nga adlaw, pagtumana niyo ini nga adlaw nga usa nga linain nga adlaw hin pagpahuway, ngan sulod hito nga adlaw ayaw kamo pagkaon hin bisan ano.

³³Natikang an Pyesta han mga Payagpayag dida han ika-15 nga adlaw han ikapito nga bulan ngan nagpapadayon ini sulod hin pito ka adlaw.

³⁵Dida han syahan hini nga mga adlaw pagtirok kamo hin pagsingba ngan ayaw kamo pagbuhat han iyo kada adlaw nga mga buruhaton.

³⁶Ha kada adlaw sulod han pito ka adlaw maghahalad kamo hin usa nga halad nga pagkaon. Dida han ikawalo nga adlaw pagtirok liwat kamo hin pagsingba ngan paghalad kamo hin usa nga halad nga pagkaon. Adlaw ini hin pagsingba, ngan ayaw gud kamo pagbuhat hin bisan ano nga buruhaton. (

³⁷Amo ini an mga pyesta nga siringbahon diin ginpapasidunggan niyo an GINOO pinaagi hin pagtirok niyo hin pagsingba ngan hin paghalad hin mga halad nga pagkaon, mga halad nga tutuboron, mga halad nga inani, mga unong nga hayop, ngan mga halad nga bino, sumala han ginkikinahanglan adlaw-adlaw.

³⁸Ini nga mga pyesta idinugang han mga Adlaw nga Igparahuway ngan idinugang ini nga mga halad han iyo nabatasan nga mga regalo, iyo mga halad hin pagtuman han mga ginsumpaan niyo, ngan iyo kaburot-on nga mga halad nga ihinahatag niyo ngadto han GINOO.)

³⁹Kon human na kamo pag-ani han iyo mga uma, pagsaurog kamo hini nga pyesta hin pito ka adlaw, tikang hiton ika-15 nga adlaw han ikapito nga bulan. Magigin usa nga linain nga adlaw hin pagpahuway an syahan nga adlaw.

⁴⁰Dida hito nga adlaw pagkuha kamo han gimamag-upayi nga mga bunga han iyo nabunga nga mga kahoy, pagkuha kamo hin mga palwa hin palmera ngan hin lapyo nga mga sanga hin dahonan nga mga kahoy, ngan pagtikangi niyo in usa nga siringbahon nga pyesta ha pagpasidungog han GINOO nga iyo Dyos.

⁴¹Pagsauroga niyo ini hin pito ka adlaw. Kinahanglan tumanon ini han iyo mga tulin ha ngatanan nga panahon nga tiarabot.

⁴²Mag-uokoy an ngatanan nga mga tawo han Israel dida hin mga payag nga sirongan sulod hin pito ka adlaw,

⁴³basi makasabot an iyo mga tulin nga pagbuot ini han GINOO nga mag-ukoy an mga tawo han Israel dida hin yano nga mga payag han pagpagawsa ko ha ira han Ehipto. Hi ako an GINOO nga iyo Dyos.

⁴⁴Sanglit ha sugad nga paagi iginhatag ni Moises ngadto han mga tawo han Israel an mga turumanon hin pagsaurog han mga siringbahon nga pyesta ha pagpasidungog han GINOO.