Read Waray Samarenyo Meaning Based Levitico 27 Bible Online

Levitico 27 - Waray Samarenyo Meaning Based bible

Levitico 27

¹Iginhatag han GINOO kan Moises

²an masunod nga mga turumanon para han mga tawo han Israel. Kon igintubyan na ngadto han GINOO in usa ka tawo ha pagtuman hin usa nga linain nga pagsumpa, matatalwas ito nga tawo pinaagi hin pagbayad hinin masunod nga mga kabaraydan,

³sumala han opisyal nga suruklan: — lalake nga 20 ngadto ha 60 an panuigon: 50 ka bug-os nga salapi — kon babaye: 30 ka bug-os nga salapi — lalake nga 5 ngadto ha 20 an panuigon: 20 ka bug-os nga salapi — kon babaye: 10 ka bug-os nga salapi — lalake nga ubos hin 5 ka tuig an panuigon: 5 ka bug-os nga salapi — kon babaye: 3 ka bug-os nga salapi — lalake nga lapos na hin 60 an panuigon: 15 ka bug-os nga salapi — kon babaye: 10 ka bug-os nga salapi

⁸Kon kablas kaupay an tawo nga nagsumpa, nga diri hiya nakakabayad han nababatasan nga kabaraydan, dadad-on ini nga tawo ngadto han padi, ngan pauubson han padi an kabaraydan nga maaakos han tawo hin pagbayad.

⁹Kon an pagsumpa hiunong hin hayop nga kinakarawat nga usa nga halad ngadto han GINOO, baraan kaupay an tagsa nga regalo nga iginsaad ngadto han GINOO,

¹⁰ngan diri makakaliwan hin lain nga hayop an tawo nga nagsumpa. Kon iya pagbuhaton ini, mahihimo nga kanan GINOO an duha nga hayop.

¹¹Kundi kon an pagsumpa hiunong hin mananap nga mahugaw sumala han seremonyas, nga diri kinakarawat nga usa nga halad ngadto han GINOO, pagdadad-on han tawo ngadto han padi an hayop.

¹²An padi an mag-iigo kon pira an kabaraydan pinasikad dida han kamaupay o kamaraot han mananap, ngan diri na maliliwat ini nga kabaraydan.

¹³Kon karuyag han tawo hin paglukat han mananap, kinahanglan pagbaydan niya an kabaraydan upod in dugang nga 20 por syento.

¹⁴Kon maghalad in usa ka tawo han iya balay ngadto han GINOO, an padi an mag-iigo han kabaraydan sumala han kamaupay o kamaraot han balay ngan diri na ini matatawaran.

¹⁵Kon karuyag han tawo nga naghalad han balay hin paglukat hini, kinahanglan pagbaydan niya an kabaraydan upod in dugang nga 20 por syento.

¹⁶Kon maghalad in usa ka tawo hin bahin han iya tuna ngadto han GINOO, ipapasikad an kabaraydan dida han kadamo han binhe nga ginagamit hin pagpugas ha tuna, ha tag napulo ka bug-os nga salapi an kada 11 ka gantang nga sebada.

¹⁷Kon ighalad niya an tuna katapos gud la han Tuig han Pagpahioli, ipapasikad an kabaraydan dida han kadamo han mga tuig ngada han Tuig han Pagpahioli.

¹⁸Kon iya ighalad ini katapos lumabay in panahon tikang han Tuig han Pagpahioli, pag-iigoigoon han padi an kabaraydan hini pinasikad han kadamo han mga tuig nga nahibibilin pa ngada han Tuig han Pagpahioli, ngan pahahamub-an an kabaraydan.

¹⁹Kon karuyag han tawo nga naghalad han uma hin paglukat hini, kinahanglan baydan niya an kabaraydan upod in dugang nga 20 por syento.

²⁰Kon igbaligya niya an tuna ngadto hin lain nga tawo, nga diri anay niya paglukaton ini tikang han GINOO, mawawad-an hiya han iya katungod hin paglukat hini.

²¹Ha pag-abot han Tuig han Pagpahioli magigin kadayonan na ini nga hiagi han GINOO; ighahatag ini ha kapadian.

²²Kon ighalad hin usa ka tawo ngadto han GINOO in usa nga uma nga iya napalit, ngan diri bahin han tuna nga iya nasunod,

²³an padi an mag-iigoigo han kabaraydan pinasikad han kadamo han mga tuig ngada han Tuig han Pagpahioli, ngan kinahanglan pagbaydan han tawo an kabaraydan hito manta nga adlaw; kanan GINOO na an kwarta.

²⁴Pag-abot han Tuig han Pagpahioli, ig-ooli an tuna ngadto han tunay nga tag-iya o ngadto han iya mga tulin.

²⁵Ipapasikad an ngatanan nga kabaraydan han timbangan nga ginagamit ha sanktuaryo.

²⁶An GINOO an tag-iya han mga suhag nga anak hin hayop, sanglit waray makakaghalad hini nga mga suhag ngadto han nga usa nga kaburot-on nga halad. Kanan GINOO ini hira ma nati ini nga baka, o nati nga karnero, o nati nga kanding,

²⁷kundi an suhag hin mananap nga diri malinis mahihimo malukat han igo nga ginkasarabotan nga kabaraydan upod in dugang nga 20 por syento. Kon diri ini paglukaton, mahihimo igbaligya ini ngadto ini lain nga tawo ha sugad gihapon nga kabaraydan.

²⁸Waray makakagbaligya o makakalukat han iya kaburot-on nga iginhalad[15] ngadto han GINOO, bisan kon usa ini nga tawo, hayop, o tuna. Kanan GINOO na ini ha kadayonan.

²⁹Diri na ini malulukat, bisan pa ngani usa ka tawo nga iginhalad na; kinahanglan pagpatayon hiya.

³⁰An GINOO an tag-iya han ikanapulo nga bahin han ngatanan nga abot han tuna, bisan inani o bunga hin kahoy; sagrado ini para han GINOO.

³¹Kon karuyag hin usa ka tawo hin paglukat hini, kinahanglan pagbaydan niya an angay nga kabaraydan upod in dugang nga 20 por syento.

³²Kanan GINOO an usa han kada napulo nga mga hayop. Dida han pag-ihap han mga hayop, kanan GINOO an kada ikanapulo.

³³Diri makakagbuot an tag-iya han mga hayop basi asay mapili an magraot la nga mga hayop, ngan diri hiya makakagbarubalyo hini. Kon pagbalyoan niya hin lain nga hayop in usa nga hayop, an GINOO an tag-iya han duha nga hayop ngan diri na ini malulukat.

³⁴Amo ini an mga sugo nga iginhatag han GINOO kan Moises didto ha Bukid Sinai para han mga tawo han Israel.