Read Waray Samarenyo Meaning Based Levitico 3 Bible Online

Levitico 3 - Waray Samarenyo Meaning Based bible

Levitico 3

¹Kon may maghalad hin usa han iya mga baka nga ipapahinungod para hin pagkaurosa, kinahanglan todo o umagwas ini ngan waray gud mga dum-it.

²Ipapandong han tawo an iya kamot dida han ulo han hayop ngan pag-iihawon ini didto han agian han Tulda han GINOO. Isasablig han kapadian nga mga tulin ni Aaron an dugo hini ngada han ngatanan nga upat nga mga ligid han altar

³ngan pagdadad-on inin nasunod nga mga bahin han hayop nga usa nga halad nga pagkaon ngadto han GINOO: an ngatanan nga tambok ha sakob han ginhawa,

⁴an mga isol ngan an tambok hini, ngan an labi ka maupay nga bahin han atay.

⁵Pagtutuboron han kapadian ini ngatanan dida han altar upod han iba nga mga halad nga pagtutuboron. Nakakalipay han GINOO an kahamot hini nga halad nga pagkaon.

⁶Kon usa nga karnero o kanding an gamiton para hin halad nga pagkaurosa, kinahanglan nga lalaki o babayi ini, kundi kinahanglan waray gud mga dum-it.

⁷Kon ighalad in usa nga karnero,

⁸ipapandong an iya kamot dida han ulo hini ngan pag-ihawon ini didto ha atubangan han Tulda. Isasablig han kapadian an dugo hini ngada han ngatanan nga upat nga mga ligid han altar,

⁹ngan dadad-on inin nasunod nga mga bahin han hayop nga usa nga halad nga pagkaon ngadto han GINOO: an tambok, an bug-os nga matambok nga ikog nga hinilap hirani han gutoguto, an ngatanan nga kinakas,

¹⁰an mga isol ngan an tambok dida hini, ngan an labi kamaupay nga bahin han atay.

¹¹Pagtutuboron han nangungulo nga padi ini ngatanan dida han altar sugad nga usa nga halad nga pagkaon ngadto han GINOO.

¹²Kon ighalad hin kanding, in usa ka tawo

¹³ipapandong an iya kamot dida han ulo hini ngan pag-iihawon ini didto ha atubangan han Tulda. Isasablig han kapadian an dugo hini ngada han ngatanan nga upat nga mga ligid han altar,

¹⁴ngan ighahalad inin masunod nga mga bahin hini sugad nga usa nga halad nga pagkaon ngadto han GINOO: an ngatanan nga kinakas,

¹⁵an mga isol ngan an tambok dida hini, ngan an labi kamaupay nga bahin han atay.

¹⁶Pagtutuboron han padi ini ngatanan dida han altar sugad nga usa nga halad nga pagkaon nga makakalipay ha GINOO. Kanan GINOO an ngatanan nga tambok.

¹⁷Waray Israelita nga makaon hin tambok o dugo; turumanon ini nga pagsusugton ha kadayonan han ngatanan nga mga Israelita bisan diin hira mag-uokoy.