Read Waray Samarenyo Meaning Based Levitico 4 Bible Online

Levitico 4 - Waray Samarenyo Meaning Based bible

Levitico 4

¹Ginsugo han GINOO hi Moises

²hin pagsumat han mga tawo han Israel nga adton makasala ngan makasupak hin diri tinuyo han mga sugo han GINOO, kinahanglan magtuman hiya hinin nasunod nga mga lagda.

³Kon an Labaw nga Padi an nakasala, ngan tungod hini madarahigan hin sala an mga tawo, ighahalad niya in usa nga todo nga baka nga waray gud mga dum-it, ngan ighahalad ini ngadto han GINOO para han iya sala.

⁴Pagdadad-on niya an baka ngadto han agian han Tulda, ipapandong niya an iya kamot dida han ulo hini ngan pag-iihawon ini didto ha atubangan han GINOO.

⁵Niyan makuha an Labaw nga Padi hin dugo han baka ngan dadad-on ini ngadto han Tulda.

⁶Itutunlob niya an iya tudlo dida han dugo ngan iwawarikwik ini hin makapito ha atubangan han baraan nga biray.

⁷Niyan bubutangan niya hin dugo an mga sungaysungay han mga kanto han altar nga tuboran hin insyenso didto han Tulda. Ihuhuwad niya an salin han dugo ngada han ubos han altar nga tuboran hin mga halad nga aada han agian han Tulda.

⁸Tikang hini nga baka kukuhaon niya an ngatanan nga tambok, an tambok han mga sakob han ginhawa,

⁹an mga isol ngan an tambok hini, ngan an labi kamaupay nga bahin han atay.

¹⁰Kukuhaon han padi ini nga tambok ngan pagtutuboron ini dida han altar nga tuboran hin mga halad, sugad han ginbubuhat niya han tambok han mananap nga gin-ihaw para han halad nga pagkaurosa.

¹¹Kundi kukuhaon niya an panit, an ngatanan nga unod, an ulo, an mga paa, an mga sakob han ginhawa upod an mga tinae,

¹²pagdadad-on ini ngatanan ha gawas han kampo ngadto han dapit nga malinis sumala han seremonyas, diin ihinuhuwad an agbon, ngan didto iya pagtutuboron ini dida hin ginharing nga mga sungo.

¹³Kon an bug-os nga bungto han Israel an nakasala ngan nakatalapas hin diri tinuyo hin usa han mga sugo han GINOO,

¹⁴niyan ha paghibaroi gudla han sala, pagdadad-on han bungto in usa nga todo nga baka nga ira halad tungod hin sala. Pagdadad-on ini nira ngadto han Tulda han GINOO;

¹⁵ipapandong han mga pangulo han bungto an ira mga kamot ha ulo hini, ngan pag-iihawon ini didto.

¹⁶Pagdadad-on han Labaw nga Padi in dugo han baka ngadto han Tulda,

¹⁷itutunlob an iya tudlo dida hini ngan iwawarikwik an dugo hin makapito ha atubangan han biray.

¹⁸Bubutangan niya hin dugo an mga sungaysungay han mga kanto han altar nga tuboran hin insyenso ha sakob han Tulda, ngan ihuhuwad an salin han dugo ngada han ubos han altar nga tuboran hin mga halad, nga aada han agian han Tulda.

¹⁹Niyan kukuhaon niya an ngatanan nga tambok han baka ngan pagtutuboron ini dida ha altar.

²⁰Pagbubuhaton niya ngada hini nga baka an amo ngahaw nga iya ginbuhat ngada han baka nga halad tungod hin sala, ngan tungod hini maghahalad hiya para han sala han mga tawo, ngan pasasayloon hira.

²¹Niyan pagdadad-on niya an baka ngadto ha gawas han kampo ngan pagtutuboron ini, sugad han pagtubod niya han baka nga iginhalad para han iya kalugaringon nga sala. Halad ini hin pagkuha han sala han bungto.

²²Kon usa nga punoan an nakasala ngan nakatalapas hiya nga diri tinuyo hin usa han mga sugo han GINOO,

²³niyan, ha pagpahibaroa gudla ha iya han iya sala, dadad-on niya nga iya halad in usa nga lalaki nga kanding nga waray gud mga dum-it.

²⁴Ipapandong niya an iya kamot ha ulo hini ngan pag-iihawon ini didto han amihanan nga dapit han altar, diin gin-iihaw an mga hayop para han mga pagtutuboron nga halad. Halad ini hin pagkuha hin sala.

²⁵Itutunlob han padi an iya tudlo dida han dugo han hayop, ibubutang ini dida han mga sungaysungay han mga kanto han altar, ngan ihuhuwad an salin han dugo ngada han ubos han altar.

²⁶Niyan iya pagtutuboron dida han altar an ngatanan nga tambok han kanding sugad han pagtubod niya han tambok han mga hayop nga iniihaw para han mga halad nga pagkaurosa. Hini nga paagi pagtutuboron han padi an halad para han sala han punoan, ngan pasasayloon hiya.

²⁷Kon ordinaryo nga tawo an nakasala ngan nakatalapas hiya nga diri tinuyo hin usa han mga sugo han GINOO,

²⁸niyan ha pagpahibaroa gudla ha iya han iya sala, dadad-on niya nga iya halad in usa nga babayi nga kanding nga waray mga dum-it.

²⁹Ipapandong niya an iya kamot ha ulo hini ngan pag-iihawon an kanding didto han amihanan nga dapit han altar diin gin-iihaw an mga hayop para han mga tutuboron nga halad.

³⁰Itutunlob han padi an iya tudlo dida han dugo han hayop, ibubutang ini dida han mga sungaysungay han mga kanto han altar, ngan ihuhuwad an salin nga dugo hini ngada han ubos han altar.

³¹Niyan kukuhaon niya an ngatanan nga tambok hini sugad nga kinukuha an tambok han mga hayop nga gin-iihaw para han mga halad nga pagkaurosa, ngan pagtutuboron ini niya dida han altar, ngan nakakalipay han GINOO an kahamot hini. Hini nga paagi tutuboron han padi an halad para han sala han tawo, ngan pasasayloon hiya.

³²Kon nagdara in usa ka tawo hin usa nga karnero nga halad hin sala, kinahanglan babayi ini nga waray mga dum-it.

³³Ipapandong niya an iya kamot ha ulo hini ngan pag-iihawon ini didto han amihanan nga dapit han altar diin gin-iihaw an mga hayop para han mga tutuboron nga halad.

³⁴Itutunlob han padi an iya tudlo dida han dugo han hayop, ibubutang ini dida han mga sungaysungay han mga kanto han altar, ngan ihuhuwad an salin han dugo ngada han ubos han altar.

³⁵Niyan kukuhaon niya an ngatanan nga tambok hini sugad nga kinukuha an tambok han karnero nga gin-iihaw para han mga halad nga pagkaurosa, ngan pagtutuboron ini niya dida han altar upod an mga halad nga pagkaon nga iginhatag ngadto han GINOO. Hini nga paagi tutuboron han padi an halad para han sala han tawo, ngan pasasayloon hiya.