Read Waray Samarenyo Meaning Based Levitico 7 Bible Online

Levitico 7 - Waray Samarenyo Meaning Based bible

Levitico 7

¹Mga turumanon ini para hin mga halad hin pagbayad nga labi hin ka baraan nga mga halad.

²Pag-iihawon an hayop para hini nga halad didto han amihanan nga dapit han altar diin gin-iihaw an mga hayop para han mga gintutubod nga halad, ngan igsasablig an dugo hini ngada han ngatanan nga upat nga mga ligid han altar.

³Kukuhaon an ngatanan nga tambok hini ngan ighahalad dida ha altar: an tambok ha ikog, an tambok nga nagpuputos han mga sakob han ginhawa,

⁴an mga isol ngan an tambok hini, ngan an labi kamaupay nga bahin han atay.

⁵Pagsusunogon han padi dida han altar an ngatanan nga tambok sugad nga usa nga halad nga pagkaon ngadto han GINOO. Usa ini nga halad hin pagbayad.

⁶Makakakaon hini in bisan hin-o nga lalake han padianon nga mga panimalay, kundi kinahanglan kaonon ini didto hin baraan nga dapit, kay labi ini hin ka baraan.

⁷Usa la an turumanon para han halad tungod hin sala ngan han halad hin pagbayad: an karne kanan padi na nga nagtutubod han halad.

⁸An panit han hayop nga gintutubod kanan padi na nga nagtutubod han halad.

⁹An tagsa nga halad nga pagkaon nga ginluto dida hin hudno o dida hin karaha o dida hin lata nga parilyahan kanan padi na nga naghalad hini ngadto ha Dyos.

¹⁰Kundi an ngatanan nga diri linuto nga mga halad nga pagkaon, bisan sinaktan hin lana o waray sakot, kanan han ngatanan na nga kapadian nga tulin ni Aaron, ngan kinahanglan upayon an pagbahinbahin nira han halad.

¹¹Mga turumanon ini para han mga halad hin pagkaurosa nga ighahalad ngadto han GINOO.

¹²Kon himoon ini nga usa nga halad hin pagpasalamat ngadto sa Dyos, kinahanglan maghalad hiya, labot han hayop nga pagtutuboron, hin tinapay nga waray patubo; bisan magdakmol nga mga tinapay nga hinimo hin harina nga sinaktan hin lana hin olibo, o magnipis nga mga torta nga pinahiran hin lana hin olibo, o mga torta nga hinimo hin harina nga sinaktan hin lana hin olibo.

¹³Labot hini, maghahalad hiya hin mga tinapay nga ginhudno nga may patubo.

¹⁴Dadad-on niya in usa nga bahin han kada usa ka lain nga tinapay sugad na iya ini linain nga amot ngadto han GINOO; bahin na ini han padi nga nagkuha han dugo han hayop ngan nagsablig hini ngada han altar.

¹⁵Kinahanglan kaonon an unod han hayop dida han adlaw nga igintubod hini; waray gud hini isasalin ngada han pagkaaga.

¹⁶Kon magdara in usa ka tawo hin usa nga halad hin pagkaurosa basi makagtuman hiya han iya pagsumpa o basi makahimo hiya hin kinasingkasing nga paghalad, diri kakaonon ini ngatanan hito nga adlaw nga gindara ini hin paghalad, kundi an mahisasalin mahihimo kaonan han sunod nga adlaw.

¹⁷Kinahanglan pagtuboron an karne nga mahisalin pa dida han ikatulo ka adlaw.

¹⁸Kon pagkaonon an bisan ano hini dida han ikatulo ka adlaw, diri ini nga halad kakarawaton han Dyos. Waray kapulsanan para ha iya ini nga halad, kundi pag-iisipon nga mahugaw, ngan an bisan hin-o nga kumaon hini, mag-aantos han karat-an nga iya dadangatan.

¹⁹Kon makasabod an karne hin bisan ano nga mahugaw sumala han seremonyas, kinahanglan diri ini pagkaonon, kundi kinahanglan pagtuboron ini ngatanan. Makakakaon han karne an bisan hin-o nga malinis sumala han seremonyas,

²⁰kundi kon may diri malinis nga tawo nga kumaon hini, diri na gud hiya pag-iisipon nga usa han kanan Dyos mga tawo.

²¹Ngan kon may kumaon han karne hini nga halad katapos niya makakapot hin bisan ano nga mahugaw sumala han seremonyas, matikang ha tawo o ha mananap, diri na gud hiya pag-iisipon nga usa han kanan Dyos mga tawo.

²²Iginhatag han GINOO kan Moises an masunod nga mga turumanon

²³para han mga tawo han Israel. Diri kakaonon an tambok hin baka, karnero, o kanding.

²⁴Kinahanglan diri kaonon an tambok hin mananap nga namatay ha iya kalugaringon o ginpatay hin ihalas nga mananap, kundi gamiton ini hin bisan ano nga tuyo.

²⁵Diri na gud pag-iisipon nga usa han kanan Dyos mga tawo an bisan hin-o nga kumaon han tambok hin hayop nga gindara nga halad nga pagkaon ngadto hin GINOO.

²⁶Bisan diin pag-uokoy an mga Israelita, kinahanglan diri gud hira maggamit han dugo hin mga tamsi o mga mananap para hin pagkaon.

²⁷Diri na gud pag-iisipon nga usa han kanan Dyos mga tawo an bisan hin-o nga magtalapas hini nga balaod.

²⁸Iginhatag han GINOO kan Moises an masunod nga mga turumanon

²⁹para han mga tawo han Israel. An bisan hin-o nga magdara hin halad hin pagkaurosa, kinahanglan magdara hin bahin han halad nga iya linain nga regalo ngadto han GINOO,

³⁰nga maglulugaring hiya hin pagdara hini sugad nga usa nga halad nga pagkaon. Pagdadad-on niya an tambok han hayop upod an dughan hini, ngan ihahalad ini sugad nga iya linain nga regalo ngadto han GINOO.

³¹Pagtutuboron han padi an tambok dida han altar, kundi ihahatag ha kapadian an dughan.

³²Ihahatag an tuo nga mangorhi nga paa han hayop sugad nga usa nga linain nga amot

³³ngadto han padi nga maghalad han dugo ngan han tambok han halad hin pagkaurosa.

³⁴Usa nga linain nga regalo an dughan han hayop, ngan usa nga linain nga amot an tuo nga mangorhi nga paa, nga ginkuha han GINOO tikang han mga tawo han Israel ngan iginhatag ngadto han kapadian. Amo ini an kinahanglan ihatag han mga tawo han Israel ngadto han kapadian ha ngatanan nga panahon nga tiarabot.

³⁵Amo ini an bahin han pagkaon nga iginhalad ngadto han GINOO nga iginhatag kan Aaron ngan han iya mga anak nga kalalaken-an dida han adlaw han pag-ordenahi ha ira hin pagkapadi.

³⁶Dida hito nga adlaw ginsugo han GINOO an mga tawo han Israel hin paghatag ha ira hini nga bahin han halad. Turumanon ini nga kinahanglan pagsugton han mga tawo han Israel ha ngatanan nga panahon nga tiarabot.

³⁷Sanglit amo ini an mga turumanon para han mga halad nga ginsusunog, han mga halad nga pagkaon, han mga halad tungod hin sala, han mga halad hin pagbayad, han mga halad para han ordenasyon hin padi, ngan han mga halad hin pagkaurosa.

³⁸Iginhatag han GINOO kan Moises ini nga mga sugo didto han Bukid Sinai, didto han kamingawan dida han adlaw han pagsugoa niya han mga tawo han Israel hin pagdara han ira mga halad.