Read Waray Samarenyo Meaning Based Levitico 8 Bible Online

Levitico 8 - Waray Samarenyo Meaning Based bible

Levitico 8

¹Nagsiring kan Moises an GINOO,

²“Dad-a hi Aaron ngan an iya mga anak nga kalalaken-an ngadto han agian han akon Tulda ngan dad-a an padianon nga mga biste, an lana nga igdirihog, an todo nga baka para han halad tungod hin sala, an duha nga lalaki nga mga karnero, ngan an basket hin tinapay nga waray patubo.

³Niyan tiroka didto an bug-os nga bungto.”

⁴Gintuman ni Moises sumala han iginsugo han GINOO, ngan han katirok na han bungto,

⁵iya ginsiring hira, “An akon yana pagbubuhaton amo an iginsugo ha akon han GINOO.”

⁶Gindara ni Moises hi Aaron ngan an iya mga anak nga kalalaken-an ngan iya ginpakarigos hira.

⁷Iginsul-ot niya kan Aaron an bado, an kapa, ngan an paha ha iya hawak. Iya iginsul-ot kan Aaron an efod[1] ngan igintaod ini pinaagi hin pagbagkosi han iya hawak han paha nga hinablon hin pino.

⁸Iya iginsul-ot kan Aaron an tahob han dughan ngan igintaod dida hini an Urim ug Tumim.[2]

⁹Iya iginsul-ot an pudong ha ulo ni Aaron, ngan ha atubangan hini igintaod niya an bulawan nga adorno, baraan nga tigaman hin paghalad, sumala han iginsugo han iya han GINOO.

¹⁰Niyan kinuha ni Moises an lana nga igdirihog ngan gindihogan an Tulda han GINOO ngan an ngatanan nga mga butang nga nakadto ha sakob hini, ngan hin sugad nga paagi, iya iginhalad ini ngatanan ngadto han GINOO.

¹¹Kinmuha hiya hin bahin han lana ngan iginsablig ini hin makapito ngada han altar ngan han kasangkapan hini, ngan ngada han palanggana ngan han tungtongan hini, basi ighalad ini ngadto han GINOO.

¹²Gin-ordenahan niya hi Aaron pinaagi hin pagbob-i han iya ulo han igdirihog nga lana.

¹³Sunod, gindara ni Moises ha iya atubangan an mga anak nga kalalaken-an ni Aaron ngan ginbadoan hira, ginpahaan, ngan ginkaloan hira sumala han iginsugo han GINOO.

¹⁴Niyan gindara ni Moises an todo nga baka para han halad tungod hin sala, ngan ipinandong nira Aaron ngan han iya mga anak nga kalalaken-an an ira mga kamot dida han ulo han baka.

¹⁵Gin-ihaw ini ni Moises ngan kinmuha hiya han dugo, ngan pinaagi han iya tudlo iginpahid an dugo dida han mga sungaysungay han mga kanto han altar basi ighalad ini. Niyan ginhuwad niya an salin nga dugo ngada han ubos han altar. Hini nga paagi iya iginhalad ngan ginlinisan ngan nabaraan ini.

¹⁶Kinuha ni Moises an ngatanan nga tambok ha sakob han ginhawa, an labi hin kamaupay nga bahin han atay, ngan an mga isol upod an tambok hini, ngan ginsunog ini ngatanan dida ha altar.

¹⁷Kinuha niya an iba nga bahin han baka, lakip an panit hini, an unod, ngan an mga tinae, ngan ginsunog ini ha gawas han kampo sumala han iginsugo han GINOO.

¹⁸Sunod, gindara ni Moises an lalaki nga karnero para han halad nga ginsusunog ngan ipinandong nira Aaron ngan han iya mga anak nga kalalaken-an an ira mga kamot dida han ulo han karnero.

¹⁹Gin-ihaw ini ni Moises ngan iginsablig an dugo ngada han ngatanan nga upat nga mga ligid han altar.

²⁰Gin-atado niya an lalaki nga karnero, ginhugasan an mga sakob han ginhawa ngan an mangorhi nga mga paa, ngan ginsunog dida han altar an ulo, an tambok, ngan an ngatanan nga salin han lalaki nga karnero sumala han iginsugo han GINOO. Usa ini nga halad nga pagkaon ini nga halad nga ginsunog, ngan nakakalipay han GINOO an alimyon hini.

²²Niyan gindara ni Moises an ikaduha nga lalaki nga karnero nga para han pag-ordenar hin kapadian, ngan ipinandong nira Aaron ngan han iya mga anak nga kalalaken-an an ira mga kamot dida han ulo han karnero.

²³Gin-ihaw ini ni Moises ngan ginkuha niya an dugo ngan ipinahid ini dida han mitaybitay han kan Aaron tuo nga talinga, dida han tamuragko han iya tuo nga kamot, ngan dida han tamuragko han iya tuo nga tiil.

²⁴Niyan gindara niya ha iya atubangan an mga anak nga kalalaken-an ni Aaron ngan ipinahid an dugo dida han mga mitaybitay han tuo nira nga mga talinga, dida han mga tamuragko han tuo nira nga mga kamot ngan dida han tamuragko han tuo nira nga mga tiil. Niyan iginsablig ni Moises an salin nga dugo ngada han ngatanan nga upat nga mga ligid han altar.

²⁵Kinuha niya an tambok, an tambok ha ikog, an ngatanan nga tambok nga nagpuputos han mga sakob han ginhawa, an labi hin kamaupay nga bahin han atay, an mga isol upod an tambok hini, ngan an tuo nga mangorhi nga paa.

²⁶Niyan kinmuha hiya hin usa ka bug-os nga tinapay nga nakada han basket han mga tinapay nga waray patubo, ngan iginhalad ini ngadto han GINOO, usa ka bug-os nga sinaktan hin lana, ngan usa nga manipis nga torta, ngan iya ibinutang ini ha bawbaw han tambok ngan han tuo nga mangorhi nga paa.

²⁷Iya iginbutang ini ngatanan nga pagkaon dida han mga kamot nira Aaron ngan han iya mga anak nga kalalaken-an, ngan ira iginhalad ini nga usa nga linain nga regalo ngadto han GINOO.

²⁸Niyan kinuha ni Moises tikang ha ira an pagkaon ngan ginsunog ini dida ha altar, ha bawbaw han halad nga ginsunog, sugad nga usa nga halad para hin ordenasyon hin padi. Usa ini nga halad nga pagkaon, ngan nakalipay han GINOO an alimyon hini.

²⁹Niyan kinuha ni Moises an dughan ngan iginhalad ini nga usa nga linain nga regalo ngadto han GINOO. Amo ini an bahin ni Moises nga kinuha tikang han lalaki nga karnero nga halad han ordenasyon. Ginbuhat ni Moises an ngatanan sumala han iginsugo han GINOO.

³⁰Kinmuha hi Moises han igdirihog nga lana ngan han dugo nga nakada han altar, ngan iginsablig ini ngadto kan Aaron ngan han iya mga anak nga kalalaken-an ngan han ira mga biste. Hini nga paagi iginhalad niya ngadto han GINOO hira ngan an ira mga biste.

³¹Nagsiring hi Moises kan Aaron ngan han iya mga anak nga kalalaken-an, “Dad-a niyo an karne ngadto han agian han Tulda han GINOO, paglagaa ini, ngan pangaona ini niyo didto upod han tinapay nga aadto han basket han mga halad para hin ordenasyon, sumala han iginsugo han GINOO.

³²Sunoga an bisan ano nga karne o tinapay nga nahisalin.

³³Diri kamo mabaya han agian han Tulda sulod hin pito ka adlaw, ngada han kahuman han seremonyas han iyo ordenasyon.

³⁴Ginsugo kita han GINOO hin pagtuman han aton ginbuhat yana nga adlaw basi makuha an iyo sala.

³⁵Kinahanglan magpabilin kamo didto han agian han Tulda adlaw gab-i sulod hin pito ka adlaw, ngan aada kamo hin pagtuman han iginsugo han GINOO. Kon diri, mapatay kamo. Amo ini an iginsugo ha akon han GINOO.”

³⁶Sanglit ginbuhat ni Aaron ngan han iya mga anak nga kalalaken-an an ngatanan nga iginsugo han GINOO pinaagi kan Moises.