Read Waray Samarenyo Meaning Based Jeremias 1 Bible Online

Jeremias 1 - Waray Samarenyo Meaning Based bible

Jeremias 1

¹Ini nga basahan amo an susumaton han iginyakan ni Jeremias nga anak ni Hilkias nga usa han kapadian han bungto han Anatot didto han katunaan han Benjamin.

²Naghimangraw an GINOO kan Jeremias dida han ika-13 ka tuig nga pagkahadi han Juda ni Josias nga anak ni Amon,

³ngan naghimangraw na liwat an GINOO ha iya han hadi na hi Joakim nga anak ni Josias. Katapos hito, naghimangraw ha iya an GINOO hin makadamo tubtob han ika-11 ka tuig nga pagkahadi ni Sedequias nga anak ni Josias. Dida han ikalima ka bulan hito nga tuig ginhalin an mga tawo han Jerusalem ngadto ha pagkabihag.

⁴Nagsiring ha akon an GINOO,

⁵“Han waray ka pa igpapanamkon ha tiyan, nakilala na ako ha imo, ngan han waray ka pa katawo, ginhalad ngan ginpili ko na ikaw nga manaragna han mga nasod.”

⁶Binmaton ako, “O Ginoo nga DYOS, diri ako maaram magyakan; batan-on pa ako kaupay.”

⁷Kundi nagsiring ha akon an GINOO, “Ayaw pagsiring nga batan-on ka pa kaupay, kundi pakadto han mga tawo nga akon padadad-an ha imo, ngan sumati hira han ngatanan nga akon igsusugo ha imo hin pagyakan.

⁸Ayaw kahadlok ha ira, kay aada ako ha imo hin pagpanalipod ha imo. Ako nga GINOO an nagyakan!”

⁹Niyan, kinamkam han GINOO an akon mga im-im, ngan nagsiring ha akon, “Pamati, ihinahatag ko ha imo an mga pulong nga kinahanglan imo igyakan.

¹⁰Yana nga adlaw ihinahatag ko ha imo in gahom hin pagbuot han mga nasod ngan mga ginhadian, hin paggabot ngan pagbungkag, hin pagpuo ngan pagpukan, hin pagtindog ngan hin pagtanom.”

¹¹Nagpakiana ha akon an GINOO, “Jeremias, ano an imo hinkikit-an.” Binmaton ako, “Usa nga sanga hin kahoy nga almendras.”

¹²“Maupay an imo pagkita,” nagsiring an GINOO, “ngan nagbabantay[1] ako nga matuman an akon mga pulong.”

¹³Niyan naghimangraw liwat ha akon an GINOO, “Ano pa an imo hinkikit-an?” nagpakiana hiya. Binmaton ako, “Hinkikit-an ko in usa nga nagkakaladkad nga daba didto ha amihanan, ngan tikahuruwad na ini nganhi.”

¹⁴Nagsiring hiya ha akon, “An makalilisang nga karat-an masukob tikang ha amihanan ngada han ngatanan nga nag-uokoy dinhe hini nga tuna,

¹⁵kay ginpapakanhi ko an ngatanan nga mga nasod ha amihanan. Pagtitindogon han ira kahadian an ira mga trono dida han mga ganghaan han Jerusalem ngan han mga pader nga naglilibot han syudad, ngan han ngatanan nga mga higrani nga syudad han Juda.

¹⁶Kakastigohon ko an akon mga tawo kay nakasala hira; ginsalikway ako nira, naghalad hira hin mga halad nga tinubod ngadto hin lain nga kadiyosan, ngan naghimo hira hin mga diyosdiyos nga ira ginsingba.

¹⁷Pag-andam, Jeremias; kadtoa ngan pagsumati hira han ngatanan nga ipinapagsumat ko ha imo. Ayaw kahadlok ha ira yana, kay kon diri, ikaw lugod an akon paghahadlokon kon kaupod ka na nira.

¹⁸Pamati, Jeremias! Makontra ha imo an ngatanan dinhe hini nga tuna—an kahadian han Juda, an mga opisyal, an kapadian, ngan an mga tawo. Kundi yana nga adlaw tatagan ko ikaw hin kusog hin pag-ato ha ira; masusugad ka hin usa nga pinarig-on nga syudad, hin usa nga puthaw nga harigi, ngan hin usa nga bronse nga pader. Diri hira makakapirde ha imo kay aada ako ha imo hin pagpanalipod ha imo. Ako nga GINOO an nagyakan.”