Read Waray Samarenyo Meaning Based Jeremias 10 Bible Online

Jeremias 10 - Waray Samarenyo Meaning Based bible

Jeremias 10

¹Mga tawo han Israel, pamatii an mensahe ha iyo han GINOO.

²Nasiring hiya, “Ayaw niyo pagsunda an mga paagi han iba nga mga nasod; ayaw kamo kaalantad hin mga urosahon nga mga taran-awon didto ha langit, bisan kon nahahadlok hin duro an iba nga mga nasod.

³Waray pulos an tuloohan hini nga mga tawo. Ginpupulod in usa nga kahoy didto han kagurangan; ginhihimo ini nga ladawan

⁴ngan ginpuputos ini hin salapi ug bulawan. Ginraraysang ini hin maupay basi diri ini matumba ngan mahulog.

⁵An sugad nga mga diyosdiyos sugad hin mga pahoy didto hin usa nga uma hin mga melon; diri ini hira nakakayakan; kinahanglan pagdad-on hira, kay diri ini hira nakakalakat. Ayaw kamo kahadlok ha ira: diri ini hira makakadaot ha iyo, ngan diri ini hira makakahatag hin kaupayan ha iyo.”

⁶GINOO, waray usa nga sugad ha imo: makagarahom ka, ngan harangdon ngan gamhanan an imo ngaran.

⁷Hin-o an diri magpapasidungog ha imo nga hadi han ngatanan nga kanasoran? Angay ka pagpasidunggan. Waray usa nga sugad ha imo dida han ngatanan nga mga makinaadmananon han kanasoran, o dida hin bisan hin-o han ira kahadian.

⁸Mga tuyaw ngan lurong hira ngatanan. Ano an ira hibabaroan tikang hin kahoy nga mga diyosdiyos?[10]

⁹Pinutos an ira mga diyosdiyos hin salapi nga tikang ha Espania, ngan hin bulawan nga tikang ha Ufas, nga hinimo ngatanan hin batid gud nga mga panday; binadoan ini hin diubi ngan pula nga dugnit nga hinablon hin batid nga mga parahablon.

¹⁰Kundi ikaw, O GINOO, amo an matuod nga Dyos, ikaw amo an buhi nga Dyos, ngan an hadi nga waray kataposan. Kon nasisina ka nangungurog an kalibutan; ngan waray nasod nga diri nahahadlok kon nasisina ka. (

¹¹Kamo nga mga tawo kinahanglan magsumat ha ira nga pagbubungkagon an kadiyosan nga waray maghimo han tuna ug han langit. Maaanaw na ini hira dinhe ha tuna.)

¹²Ginhimo han GINOO an tuna pinaagi han iya gahom; ginpahimutang niya an kalibutan pinaagi han iya kinaadman, ngan ginbitad niya an kalangitan.

¹³Ha iya pagsugo nagngungurob an katubigan han igbaw han langit;[11] gindadara niya in mga dampog tikang han mga sidsid han tuna. Ginpapakikidlat niya dida han uran, ngan ginpapagawas an hangin tikang han iya kwarto nga hirimosan.

¹⁴Ha pagtan-aw nira hini, nakakasabot an mga tawo han ira kalurong ngan kawaray buot; nagtuturaw adton mga naghihimo hin mga diyosdiyos, kay mga buwa ngan waray kinabuhi an kadiyosan nga ira ginhihimo.

¹⁵Waray mga pulos ini ngan angay pagtamayon: pagbubungkagon ini kon umabot na an GINOO hin pagsirot ha ira.

¹⁶Diri sugad hini an Dyos ni Jacob; hiya amo an naghimo han ngatanan nga mga butang, ngan ginpili niya an Israel nga iya kalugaringon nga mga tawo. An GINOO nga Labi Kamakagarahum amo an iya ngaran.

¹⁷Mga tawo han Jerusalem, ginsusulong kamo! Paniroka niyo an iyo mga gintatag-iya!

¹⁸Paiiwason na kamo han GINOO ngadto ha gawas hini nga tuna; pakukurian kamo niya tubtob nga mawaray bisan usa nga mahisalin ha iyo. An GINOO an nagyakan.

¹⁹Nanangis an mga tawo han Jerusalem, “Masakit kaupay ini para ha amon! Diri nag-uupay an amon kasamdan. Ngan diri na ini namon maaantos!

²⁰Mga ruba na an amon mga tulda; narugtas na an mga pisi nga higot han mga tulda. Binayaan kami han amon mga anak; waray na nahisalin hin pagtaod liwat han amon mga tulda; waray na magbubutang han mga biray hini.”

²¹Binmaton ako, “Mga lurong an aton mga pangulo; diri hira nahangyo han GINOO hin pakibulig. Sanglit napakyas an ira mga buhat, ngan nagsarang an aton mga tawo.

²²Pamati! Inmabot na in sumat! May dako nga kasamok didto hin usa nga nasod ha amihanan; hihimoon han kasondalohan hini nga nasod nga kamingawan an mga syudad han Juda, nga usa nga dapit nga urokyan hin mga lubo.”

²³GINOO, maaram ako nga waray tawo nga magburuot han iya kabubwason; waray tawo nga makakagbuot han iya kalugaringon nga kinabuhi.

²⁴Sawaya an imo mga tawo, O GINOO, kundi ayaw kami pagpakurii hin duro, o pagkastigoha kon nasisina ka; basi diri kami maubos hin kamatay.

²⁵Ihuwad an imo kasina ngadto han mga nasod nga diri nagsisingba ha imo, ngan ngadto han mga tawo nga nagsisikway ha imo. Pinanmatay nira an imo mga tawo; ginpuo kami nira, ngan binayaan nga ruba an amon nasod.