Read Waray Samarenyo Meaning Based Jeremias 12 Bible Online

Jeremias 12 - Waray Samarenyo Meaning Based bible

Jeremias 12

¹“GINOO, kon makiglantugi ako ha imo hiunong han akon sumbong, diri ka magsasayop kay matadong ka. Kundi kinahanglan pakianhan ko ikaw mahitungod han katadongan. Kay ano nga mainuswagon man an magraot nga mga tawo? Kay ano nga naghihingaupay man an maglimbong nga mga tawo?

²Gintatanom mo hira ngan nanggagamot; natubo ngan nanmumunga hira. Dayuday naghihimangraw hira hin maupay hiunong ha imo, kundi diri gud kinasingkasing an ira pagtagad ha imo.

³Kundi, O GINOO, nakilala ka ha akon; nakita ka han akon binubuhat, ngan han akon paghigugma ha imo. Danasa ini nga magraot nga mga tawo sugad hin karnero nga irihawon; bantayi hira tubtob han pag-ihawa ha ira.

⁴Ngada san-o ini nga pagmara han amon tuna, ngan an pagkalaya han kabanwaan ha tagsa nga uma? Nagkakamatay an kamanampan ngan katamsihan tungod han pagkamaraogdaog han amon mga tawo, mga tawo nga nasiring, ‘Diri nakita an Dyos han amon ginbubuhat.’”[14]

⁵Nagsiring an GINOO, “Jeremias, kon ginugul-an ka hin pakigrumba hin mga tawo, uunanhon mo hin pakigrumba hin mga kabayo? Kon diri ka ngani nakakatindog ha mahawan nga tuna, uunanhon mo hin pakatindog didto ha kagurangan ha ligid han Jordan?

⁶Ginlingo ka ngani han imo kabugtoan nga kalalaken-an nga mga sakop han kalugaringon mo nga panimalay; naapi hira han mga pagpakaraot ha imo. Ayaw pagtapod ha ira, bisan kon maghihimangraw hira hin pakigsangkay ha imo.”

⁷Nasiring an GINOO, “Ginbayaan ko na an Israel; ginsalikway ko na an akon pinili nga nasod. Igintubyan ko na an mga tawo nga akon hinihigugma, ngadto ha gahom han ira mga kaaway.

⁸Inmato ha akon an akon pinili nga mga tawo; sugad hin usa nga liyon ha kagurangan nagngurob hira ha akon, sanglit napupungot ako ha ira.

⁹Sugad hin usa nga tamsi an akon pinili nga mga tawo, nga ginburubligan hin mga banog. Tawga an ihalas nga kamanampan ngan padaopa hira hin pagtampo han sasaro!

¹⁰Ginbungkag an akon urubasan hin damo nga langyaw nga mga punoan; ginhimo nira nga usa nga kamingawan an akon matahom nga tuna.

¹¹Ginhimo ini nira nga waray gamit nga tuna; mamingaw ini nga tuna ha akon atubangan. Nahimo nga usa nga kamingawan an bug-os nga tuna, ngan waray tawo nga naninimangno.

¹²Dida han ngatanan nga higtaas nga mga dapit han kamingawan inmabot in mga tawo hin panikas. Ginpadara ko in araway basi mapukan an bug-os nga tuna; waray na tawo nga makakag-ukoy dida ha kalinaw.

¹³Nagtanom hin trigo an akon mga tawo, kundi nag-ani hira hin mga banwa; nagkabudlay hira hin duro, kundi waray gud nira nakuha. Tungod han akon mapintas nga kasina, nakawang la an ira mga abot.”

¹⁴Nasiring an GINOO, “May-ada ako igyayakan mahitungod han mga kahigrani han Israel nga nagbungkag han tuna nga akon iginhatag ngadto han akon nasod nga Israel. Paiiwason ko tikang han ira mga nasod ito nga magraot nga mga tawo sugad hin gin-abot nga tanom, ngan tatalwason ko an Juda tikang ha ira.

¹⁵Kundi katapos ko pagpaiwasa ha ira, kalolooyan ko hira; ibabalik ko an tagsa nga nasod ngadto han kalugaringon niya nga tuna ngan ngadto han kalugaringon niya nga nasod.

¹⁶Kon karawton nira hin kinasingkasing an tuluohan han akon mga tawo ngan magsumpa hira hin pagsiring, ‘Sugad nga buhi an GINOO’—sumala han igintutdo nira hadto han akon mga tawo hin pagsumpa kan Baal—niyan magigin bahin liwat hira han akon mga tawo, ngan magmamainuswagon hira.

¹⁷Kundi kon diri magsugot in bisan ano nga nasod, gagaboton ngan pupuohon ko gud ito nga nasod. Ako nga GINOO an nagyakan.”