Read Waray Samarenyo Meaning Based Jeremias 13 Bible Online

Jeremias 13 - Waray Samarenyo Meaning Based bible

Jeremias 13

¹Ginpapalit ako han GINOO hin lino nga karsonsilyo ngan ginpasul-ot ini ha akon; kundi gintugon ako niya nga diri ko ini hulson ha tubig.

²Sanglit pinmalit ako hini ngan ginsul-ot ko.

³Niyan naghimangraw na liwat ha akon an GINOO ngan nagsiring,

⁴“Pakadto ha Salog Eufrates ngan tagoa an karsonsilyo didto hin usa nga buho ha kababtoan.”

⁵Sanglit kinmadto ako ngan gintago ko ini ha hirani han Eufrates.

⁶Paglabay hin panahon ginpabalik ako han GINOO ngadto ha Eufrates hin pagkuha han karsonsilyo.

⁷Sanglit binmalik ako, ngan han paghiagii ko han dapit nga gintagoan ko han karsonsilyo, hinkit-an ko nga dumog na ini ngan waray na gud gamit.

⁸Niyan naghimangraw na liwat ha akon an GINOO. Nagsiring hiya,

⁹“Amo ini an paagi nga gagamiton ko hin pagbungkag han kaparayawnon han Juda ngan han hitaas nga kaparayawnon han Jerusalem.

¹⁰Dinmiri hin pagsugot ha akon ini nga magraogdaog nga mga tawo. Magtig-a an ira mga ulo ngan magraogdaog la hira gihapon sugad han hadto anay, ngan nagsingba ngan nag-alagad hira hin iba nga kadiyosan. Sanglit masusugad hira hini nga karsonsilyo nga waray na gud gamit.

¹¹Sugad nga nahuot ha hawak in usa nga karsonsilyo, gintalinguha ko man nga kumopkop gud ha akon an ngatanan nga mga tawo han Israel ug Juda. Ginbuhat ko ini basi magin akon hira mga tawo, ngan magdayaw ngan magpasidungog hira han akon ngaran; kundi waray gud hira magsugot ha akon.”

¹²Nagsiring ha akon an GINOO nga Dyos, “Jeremias, sidnga an mga tawo han Israel nga kinahanglan sudlan nira hin bino an kada tibod hin bino. Mabaton hira nga maaram hira nga kinahanglan sudlan hin bino an kada tibod hin bino.

¹³Niyan sidnga hira nga ako nga GINOO amo an magsusulod hin bino han mga tawo dinhe hini nga tuna tubtob han pagkahuhubog nira: an kahadian nga mga tulin ni David, an kapadian, an mga manaragna, ngan an ngatanan nga mga tawo han Jerusalem.

¹⁴Niyan pagbubungkagon ko hira sugad hin pagkairintok hin mga tibod, an kalagasan ngan mga batan-on. Waray pagkalooy o pagpaid nga makakahawid ha akon hin pagpatay ha ira.”

¹⁵Mga tawo han Israel, nagyakan an GINOO! Pagpaubos kamo ngan pamati ha iya.

¹⁶Pasidunggi an GINOO, nga iyo Dyos, ha diri pa hiya magdadara hin kasisidman, ngan mahipakdol kamo ha kabukiran; ha diri pa niya hihimoon nga duro hin kamasirom an kapawa nga iyo ginlaoman.

¹⁷Kon diri kamo mamati, magtatangis ako hin hilom tungod han iyo kamapahitas-on. Magtatangis ako hin mapait nga mananabigis an akon mga luha, kay ginhalin nga mga bihag an mga tawo han GINOO.

¹⁸Nagsiring ha akon an GINOO, “Sidnga an hadi ngan an iroy niya nga lumusad hira han ira mga trono, kay nahulog tikang han ira mga ulo[15] an ira maanyag nga mga korona.

¹⁹Ginsusulong an mga bungto ha timogan han Juda; waray na tawo nga nakakaagi ngadto ha ira. Ginhalin nga mga bihag an ngatanan nga mga tawo han Juda.”

²⁰Tan-awa, Jerusalem! Nagkakaabot tikang ha amihanan an imo mga kaaway! Hain na man an mga tawo nga ginpamangnoan ha imo, an imo mga tawo nga imo gud ipinaparayaw?

²¹Ano an imo isisiring kon pirdehon ngan paghadian ka hin mga tawo nga ginhunahuna mo nga imo kasangkayan?[16] Sasakitan ka sugad hin usa nga babaye nga nag-aanak.

²²Kon pumakiana ka kon kay ano nga nahinabo ha imo ini ngatanan—kay ano nga ginriksi an imo panapton ngan ginlugos ka—tungod ini kay makalilisang gud an imo sala.

²³Makakahimo ba in usa nga Etiopianhon hin pagliwan han iya maitom nga panit, o makakahimo ba in usa nga leyopardo hin pagpara han iya mga kabang? Kon makakahimo hira, mahibabaro man hin pagbuhat hin matadong ikaw nga dayuday nagbubuhat hin maraot.

²⁴Igpapasarang ka han GINOO sugad hin uhot nga iginpapalid han hangin ha kamingawan.

²⁵Nagsiring hiya nga amo ini an imo kapalaran. Amo ini an ginlarang niya nga pagbubuhaton ha imo, kay hinngalimtan mo hiya ngan sinmarig ka hin diri matuod nga kadiyosan.

²⁶An GINOO ngahaw an maglulubas ha imo ngan ipapakita ka ha kadam-an basi ka kaalohan.

²⁷Hinkit-an ka niya nga nagbubuhat han mga butang nga iya napupungtan. Hinkit-an ka niya nga nagsusunod han pagano nga kadiyosan didto han kapungtoran ngan didto han kaumhan, sugad hin usa nga lalake nga naiipa han asawa han iya amyaw o sugad hin usa nga lalaki nga kabayo nga naikarasta hin usa nga babayi nga kabayo. Mga tawo han Jerusalem, maghihikaraot kamo! San-o pa kamo pagbabalhin han iyo maraot nga binuhatan?