Read Waray Samarenyo Meaning Based Jeremias 21 Bible Online

Jeremias 21 - Waray Samarenyo Meaning Based bible

Jeremias 21

¹Ginpakanhi ha akon ni Hadi Sedequias han Juda hira Pasur nga anak ni Malquias ug padi Sofonias nga anak ni Maasias, dara ini nga hangyo:

²“Pakighimangraw gad han GINOO tungod ha amon, kay ginsusulong an syudad nira Hadi Nabucodonosor han Babilonia ngan han iya kasondalohan. Manggad pa pagbuhaton para ha amon han GINOO in usa han iya mga milagro ngan piriton hin pag-isol hi Nabucodonosor.”

³Niyan naghimangraw ha akon an GINOO ngan gintugon ko an mga tawo nga ginpakanhi ha akon

⁴hin pagsumat kan Sedequias mahitungod han siring han GINOO nga Dyos han Israel, “Sedequias, pagpipirdehon ko an imo kasondalohan nga nakikig-away han hadi han Babilonia ngan han iya kasondalohan. Pagtatambakon ko an mga hinganiban han imo mga sondalo didto ha butnga han syudad.

⁵Makikig-away ako ha imo ha bug-os ko nga kusog, ha akon kasina, akon kapungot, ngan akon kapintas.

⁶Pamamatayon ko an ngatanan nga nag-uokoy dinhe hini nga syudad; magkakamatay an mga tawo ug kamanampan pinaagi hin makalilisang nga sakit.

⁷Kundi mahitungod ha imo, han imo mga opisyal, ngan han mga tawo nga mahisalin han araway, han gutom, ngan han sakit—ipapabihag ko kamo ngatanan kan Hadi Nabucodonosor ngan han iyo mga kaaway nga karuyag magpatay ha iyo. Pamamatayon kamo ni Nabucodonosor. Waray niya isasalin o kalolooyan hin bisan hin-o ha iyo. Ako nga GINOO an nagyakan.”

⁸Niyan ginsugo ako han GINOO hin pagsiring ngadto han mga tawo, “Pamati! Pinapagpili kamo nakon, an GINOO, han dalan nga tipakadto ha kinabuhi ngan han dalan nga tipakadto ha kamatayon.

⁹An bisan hin-o nga magpabilin dinhe han syudad mapatay pinaagi hin araway, gutom o hin sakit. Kundi an bisan hin-o nga gumawas han syudad ngan umampo han mga taga-Babilonia nga nasulong han syudad, diri pagpapatayon; bangin pa makakalagiw hiya nga buhi.

¹⁰Ginlarang ko na hin diri pagtalwas hini nga syudad, kundi hin pagbungkag hini. Igtutubyan ini ngadto han hadi han Babilonia ngan pagsusunogon ini niya. Ako nga GINOO an nagyakan.”

¹¹Ginsugo ako han GINOO hin paghatag hini nga mensahe ngadto han hadianon nga panimalay han Juda nga mga tulin ni David: “Pamati han igyayakan ko nga GINOO. Talinguhaa an pagbuhaton han katadongan ha kada adlaw. Panalipdi an tawo nga ginlilimbongan hadton karuyag maglimbong ha iya. Kon diri niyo ini pagbuhaton, makakapalaga han akon kasina an magraot nga iyo ginbubuhat sugad hin usa nga kalayo nga diri napaparong.

¹³Nalingkod ka, Jerusalem,[23] ha bawbaw han mga kahamub-an, sugad hin usa nga bato nga natindog ha kapatagan. Kundi aawayon ko ikaw. Nasiring ka nga waray makakasulong ha imo o makakasulod han imo mga panalipdanan.

¹⁴Kundi pagkakastigohon ko ikaw tungod han imo ginbuhat. Pagsusuritan ko an imo palasyo ngan pagtutuboron han kalayo an ngatanan ha palibot han palasyo. Ako nga GINOO an nagyakan.”