Read Waray Samarenyo Meaning Based Jeremias 27 Bible Online

Jeremias 27 - Waray Samarenyo Meaning Based bible

Jeremias 27

¹Waray pag-iha tikang maghadi han Juda hi Sedequias nga anak ni Josias, ginsiring ako han GINOO

²hin paghimo hin kahoy nga yugo ngan hin mga paha nga anit, ngan hin pagsangat hini ha akon liog.

³Niyan ginsiring ako han GINOO hin pagpadara hin usa nga mensahe[31] ngadto han kahadian han Edumea, Moab, Amon, Tiro, ug Sidon pinaagi han ira mga tinaporan nga nagkaabot ngadto ha Jerusalem hin pakigkita kan Hadi Sedequias.

⁴Ginsiring ako han GINOO nga Labi Kamakagarahum, nga Dyos han Israel, nga sugoon ko hira hin pagsumat han ira mga hadi nga nagsiring an GINOO:

⁵“Pinaagi han akon dako nga gahom ug kusog ginhimo ko an kalibutan, an mga tawo, ngan an ngatanan nga kamanampan nga nag-uokoy ha tuna; ngan iginhahatag ko ini kan bisan hin-o nga akon pagpilion.

⁶Amo ako an nagbutang hini ngatanan nga mga nasod ha ilarom han gahom han akon surugoon nga hi Hadi Nabucodonosor han Babilonia, ngan ginpaalagad ko ha iya bisan an magpintas nga kamanampan.

⁷Mag-aalagad ha iya han iya anak, ngan han iya apo an ngatanan nga kanasoran ngan mag-aalagad ini ngada han panahon han kapukan han iya kalugaringon nga nasod. Niyan mag-aalagad an iya nasod hin gamhanan nga kanasoran ngan bantogan nga kahadian.

⁸“Kundi kon diri magpasakop han iya pagkahadi in bisan ano nga nasod o ginhadian, pagkakastigohon ko ito nga nasod pinaagi hin araway, gutom, ug sakit tubtob nga puohon ko ini pinaagi kan Nabucodonosor.

⁹Ayaw kamo pamati han iyo mga manaragna, o kan bisan hin-o nga magsusumat ha iyo nga makakatigo hiya han tidaraon pinaagi hin mga inop, o makakasangpit hiya han mga espiritu han mga patay, o makakahimo hiya hin salamangka. Pagdidid-an kamo nira hin pagpasakop han hadi han Babilonia.

¹⁰Pagbibinuwan kamo nira, ngan amo ini an makakapahirayo ha iyo tikang han iyo tuna. Paiiwason ko kamo ngan mapupuo kamo.

¹¹Kundi kon magpasakop han hadi han Babilonia in bisan ano nga nasod ngan mag-alagad ha iya, tutugotan ko ini hin pagpabilin dida han kalugaringon niya nga tuna, basi mag-uma hiya ngan mag-ukoy didto. Ako nga GINOO an nagyakan.”

¹²Amo gihapon nga butang an akon ginsiring kan Hadi Sedequias han Juda, “Pagpasakop ikaw han hadi han Babilonia. Pag-alagad ha iya ngan han iya mga tawo, ngan mabubuhi ka.

¹³Kay ano nga mapatay ka ngan an imo mga tawo pinaagi hin araway, o hin gutom, o hin sakit? Amo ito an iginsiring han GINOO nga mahinanabo hin bisan ano nga nasod nga nadiri hin pagpasakop han hadi han Babilonia.

¹⁴Ayaw pamati han mga manaragna nga nagsiring ha imo nga kinahanglan diri ka umampo ha iya. Ginbibinuwaan ka la nira.

¹⁵An GINOO ngahaw an nagsiring nga waray hiya magsugo ha ira, ngan nagbibinuwa la hira ha imo ha ngaran han GINOO. Sanglit paiiwason ka niya ngan papatayon ka, ikaw ngan an mga manaragna nga nagbibinuwa ha imo.”

¹⁶Niyan ginsumatan ko an kapadian ngan an mga tawo nga nagsiring an GINOO, “Ayaw kamo pamati han mga manaragna nga nasiring nga diri na maiha mahibabalik tikang ha Babilonia an mga manggad han Templo. Nagbibinuwa la hira ha iyo.

¹⁷Ayaw kamo pamati ha ira! Pagpasakop kamo han hadi han Babilonia ngan mabubuhi kamo! Kay ano nga paghihimoon ini nga syudad nga usa nga tambak hin mga rinuba?

¹⁸Kon matuod hira nga mga manaragna ngan kon aada ha ira an akon mensahe, pahangyoa hira ha akon, an GINOO nga Labi Kamakagarahum, nga diri unta itugot nga pagdad-on ngadto ha Babilonia an mga manggad nga nahibibilin didto han Templo ngan didto han hadianon nga palasyo.” (

¹⁹Han pagbihaga ni Hadi Nabucodonosor ngadto ha Babilonia han hadi han Juda nga hi Joaquin nga anak ni Joakim ngan han dumagko nga mga tawo han Juda ug Jerusalem, ginbilin niya an mga harigi, an bronse nga tangke, an mga karomata, ngan an iba pa nga mga manggad han Templo.)

²¹“Pamatii niyo an igyayakan ko, an GINOO nga Labi Kamakagarahum, nga Dyos han Israel, hiunong han mga manggad nga nahibilin didto han Templo ngan didto han hadianon nga palasyo ha Jerusalem:

²²Pagdadad-on ini ngadto ha Babilonia ngan magpapabilin ini didto ngada han paghinumdomi ko na liwat hini. Niyan igbabalik ngan igpapahiuli ko ini ngada hini nga dapit. Ako nga GINOO an nagyakan.”