Read Waray Samarenyo Meaning Based Jeremias 35 Bible Online

Jeremias 35 - Waray Samarenyo Meaning Based bible

Jeremias 35

¹Han hadi pa han Juda hi Joakim nga anak ni Josias, nagsiring ha akon an GINOO,

²“Pakadto han mga sakop han banay han mga Recabita ngan pakighimangraw ha ira. Niyan dad-a hira ngadto hin usa han mga kwarto didto han Templo ngan tagayi hira hin bino.”

³Sanglit ginkuha ko an bug-os nga banay han mga Recabita—hira Jaasanias (nga anak hin lain nga Jeremias nga anak ni Habasinias) ngan an ngatanan niya nga kabugtoan ngan mga anak nga kalalaken-an—

⁴ngan gindara ko hira ngadto han Templo. Gindara ko hira ngadto han kwarto han mga tinun-an ni Hanan nga manaragna, nga anak ni Igdalias. Igbaw ini nga kwarto han kwarto ni Maasias nga anak ni Salum, nga usa nga importante nga opisyal han Templo, ngan hirani han mga kwarto han iba nga mga opisyal.

⁵Niyan iginbutang ko in mga kopa ug mga makaong nga puno hin bino ha atubangan han mga Recabita, ngan ginsiring ko hira, “Inom kamo hin bino.”

⁶Kundi binmaton hira, “Diri kami nainom hin bino. Gintugon kami ni Jonadab nga amon ginikanan, nga anak ni Recab, nga diri gud kami ngan an amon mga tulin uminom hin bino.

⁷Gintugon liwat kami niya nga diri magbalay o mag-uma, ngan diri magtanom hin mga urubasan o pumalit hin mga ubas. Ginsugo kami niya nga mag-ukoy la kami ha mga tulda, basi magpabilin kami dinhe hini nga tuna nga amon gin-uokyan sugad hin mga diri kinikilala nga mga tawo.

⁸Ginsugot namon an ngatanan nga mga tugon nga iginhatag ha amon ni Jonadab. Diri gud kami nainom hin bino, sugad man an amon mga asawa ngan an amon mga anak nga kalalaken-an ngan kababayen-an.

⁹Diri kami nagbabalay hin amon mga urokyan—nag-uokoy kami ha mga tulda—ngan waray namon kalugaringon nga mga urubasan, mga uma, o mga pagkaon. Gintuman gud namon an ngatanan nga iginsugo ha amon ni Jonadab nga amon ginikanan.

¹¹Kundi han pagsulonga ni Hadi Nabucodonosor han nasod, nagkasarabot kami hin pagkanhi ha Jerusalem basi makalikay han kasondalohan han Babilonia ug Siria. Sanglit nag-uokoy kami yana dinhe ha Jerusalem.”

¹²Niyan ginpakadto ako han GINOO nga Labi Kamakagarahum, nga Dyos han Israel, hin pagsiring ha mga tawo han Juda ug Jerusalem, “Napakiana ako nga GINOO kon kay-ano nga nadiri kamo pamati ha akon ngan pagsugot han akon mga tugon?

¹⁴Ginsugot han mga tulin ni Jonadab an iya sugo hin diri pag-inom hin bino, ngan ngada yana gud nga adlaw waray ha ira nainom hin bino. Kundi ginhinimangrawan ko kamo, ngan waray kamo magsugot ha akon.

¹⁵Nagpadayon ako hin pagpadara ngada ha iyo han ngatanan ko nga mga surugoon nga mga manaragna, ngan ginsiring kamo nira hin pagbaya han iyo magraot nga mga panggawi ngan hin pagbuhat han matadong. Ginpahimatngon kamo nira hin diri pagsingba ngan pag-alagad hin iba nga kadiyosan, basi makagpadayon kamo hin pag-ukoy didto han tuna nga iginhatag ko ha iyo ngan ha iyo kaapoy-apoyan. Kundi waray gud kamo mamati o bumali ha akon.

¹⁶Ginsugot han mga tulin ni Jonadab an sugo nga iginhatag ha ira han ira ginikanan, kundi waray gud kamo nga mga tawo magsugot ha akon.

¹⁷Sanglit yana, ipadadara ko, an GINOO nga Labi Kamakagarahum, nga Dyos han Israel, ngada ha iyo nga mga tawo han Juda ngan han Jerusalem an ngatanan nga karat-an nga akon iginsaad. Pagbubuhaton ko ini kay waray kamo mamati han akon mga himangraw ha iyo, ngan waray kamo bumaton han akon pagtawaga ha iyo.”

¹⁸Niyan ginsumatan ko an Recabita nga banay nga nagsiring an GINOO nga Labi Kamakagarahum, nga Dyos han Israel, “Ginsugot niyo an iginsugo ha iyo ni Jonadab nga iyo ginikanan; ginsunod niyo an ngatanan niya nga mga tugon, ngan ginbuhat niyo an ngatanan nga iginsugo niya ha iyo.

¹⁹Sanglit nagsasaad ako nga GINOO nga Labi Kamakagarahum, nga Dyos han Israel, nga hi Jonadab nga anak ni Recab dayuday magkakamay-ada usa nga tulin nga lalake nga mag-aalagad ha akon.”