Read Waray Samarenyo Meaning Based Jeremias 36 Bible Online

Jeremias 36 - Waray Samarenyo Meaning Based bible

Jeremias 36

¹Dida han ikaupat ka tuig nga pagkahadi han Juda ni Joakim nga anak ni Josias, nagsiring ha akon an GINOO,

²“Kuha hin usa nga linikid nga basahan ngan igsurat dida hini an ngatanan nga iginsumat ko ha imo mahitungod han Israel ug Juda, ngan han ngatanan nga mga nasod. Igsurat an ngatanan nga iginsumat ko ha imo tikang han syahan nga paghimangraw ko ha imo, han hadi pa hi Josias, ngada yana.

³Bangin bayaan han mga tawo han Juda an ira magraot nga mga panggawi kon hibatian nira an ngatanan nga karat-an nga akon ipadadara ha ira. Niyan pasasayloon ko an ira pagkamaraot ngan an ira mga sala.”

⁴Sanglit gintawag ko hi Baruc nga anak ni Nerias ngan iginpasurat ko ha iya an ngatanan nga iginsiring ha akon han GINOO. Ngan iginsurat ni Baruc ini ngatanan dida han linikid nga basahan.

⁵Niyan iginhatag ko kan Baruc inin masunod nga mga tugon: “Diri na ako tinutugotan hin pagsulod han Templo.

⁶Kundi karuyag ko nga kumadto ka didto ha sunod nga higayon nga nagpupuasa an mga tawo. Pagbabasahon mo hin dako nga tingog an linikid nga basahan, basi hibatian nira an ngatanan nga iginsiring ha akon han GINOO, ngan akon iginpasurat ha imo. Buhata ini ha usa nga dapit nga makakabati ha imo an ngatanan, upod an mga tawo han Juda nga nagkaabot tikang han ira mga bungto.

⁷Bangin mag-ampo hira ngadto han GINOO ngan bumaya han ira magraot nga mga ginawian, kay gintarhog han GINOO ini nga mga tawo pinaagi han iya makalilisang nga kasina ug kapungot.”

⁸Sanglit ginbasa ni Baruc didto ha Templo an mga pulong han GINOO, sumala han akon iginsiring ha iya.

⁹Dida han ikasiyam nga bulan han ikalima ka tuig nga pagkahadi han Juda ni Joakim nga anak ni Josias, nagpuasa an mga tawo ha pagpahalipay han GINOO. Ginbuhat an pagpuasa han ngatanan nga nag-uokoy didto ha Jerusalem ngan han ngatanan nga napasingadto tikang han mga bungto han Juda.

¹⁰Niyan, samtang namamati an ngatanan nga mga tawo, ginbasa ni Baruc dida han linikid nga basahan an ngatanan nga akon iginsiring. Ginbasa ini niya didto ha Templo, didto han kwarto ni Gemarias nga anak ni Safan, nga sekretaryo han palasyo. Nakadto an iya kwarto ha uruigbaw nga bungsaran nga hirani han aragian han Bag-o nga Ganghaan han Templo.

¹¹Hinbatian ni Micaias nga anak ni Gemarias ngan apo ni Safan, an iginsiring han GINOO nga ginbasa ni Baruc didto han linikid nga basahan.

¹²Niyan kinmadto hiya han hadianon nga palasyo, ngadto han kwarto han sekretaryo han palasyo, nga ginkakatitirokan han ngatanan nga mga opisyal. Nakadto hira Elisama nga sekretaryo han palasyo, Delaias nga anak ni Semaias, Elnatan nga anak ni Acbor, Gemarias nga anak ni Safan, Sedequias nga anak ni Ananias, ngan an ngatanan nga iba pa nga mga opisyal.

¹³Ginsumatan hira ni Micaias han ngatanan nga hinbatian niya nga ginbasa ni Baruc ngadto han mga tawo.

¹⁴Niyan ginsugo han mga opisyal hi Jehudi (nga anak ni Netanias ngan apo ni Selemias, ngan apo han anak ni Cusi), hin pagsumat kan Baruc nga pagdad-on ngada ha ira an linikid nga basahan nga iya ginbasa ngadto han mga tawo. Gindara ngadto ha ira ni Baruc an linikid nga basahan.

¹⁵Nagsiring hira, “Lingkod ngan basaha ha amon an linikid nga basahan.” Sanglit ginbasa ni Baruc.

¹⁶Katapos niya pagbasa hini, naggipasirosiplat hira ha kahadlok, ngan ginsiring hi Baruc, “Kinahanglan pagsumatan ta hini an hadi.”

¹⁷Niyan nagpakiana hira ha iya, “Sumati kami yana, gin-unan-o mo hin pagsurat hini ngatanan? Igindikta ba ini ha imo ni Jeremias?”

¹⁸Binmaton hi Baruc, “Igindikta ha akon ni Jeremias an kada pulong hini, ngan iginsurat ko ini hin tinta dida hini nga basahan.”

¹⁹Niyan ira ginsiring hiya, “Kinahanglan lumakat ngan tumago ka ngan hi Jeremias. Kinahanglan waray makasabot kon hain kamo.”

²⁰Ginbutang han mga opisyal an linikid nga basahan didto han kwarto ni Elisama nga sekretaryo han palasyo, ngan kinmadto hira han bungsaran han hadi, diin ira ginsumatan an hadi bahin han ngatanan.

²¹Niyan ginsugo han hadi hi Jehudi hin pagkuha han linikid nga basahan. Ginkuha ini niya didto han kwarto ni Elisama ngan ginbasa ini ngadto han hadi ngan han ngatanan nga mga opisyal nga natukdaw ha palibot niya.

²²Panahon adto han kathagkot ngan nalingkod an hadi ha atubangan han kalayo didto han iya palasyo nga para han kathagkot.

²³Kada pakakabasa ni Jehudi hin tulo o upat ka rumbay, tinatabas ini han hadi pinaagi hin gutiay nga kutsilyo ngan ilinalabog ini ngadto han kalayo. Ginbuhat ini niya ngada gud han kaubos kasunog han bug-os nga linikid nga basahan.

²⁴Kundi waray gud mahadlok o magpakita hin bisan ano nga tigaman hin kabido an hadi o bisan hin-o han iya mga opisyal nga nakabati hini ngatanan.

²⁵Bisan kon ginhangyo nira Elnatan, Delaias, ug Gemarias an hadi nga diri niya pagsunogon an linikid nga basahan, waray gudla hiya pamati ha ira.

²⁶Niyan ginsugo han hadi hi Prinsipe Jerameel, upod hira Seraias nga anak ni Azriel ug Selemias nga anak ni Abdeel, hin pagdakop ha akon ngan kan Baruc nga akon sekretaryo. Kundi gintago kami han GINOO.

²⁷Katapos pagsunoga ni Hadi Joakim an linikid nga basahan nga akon iginpasurat kan Baruc, ginsugo ako han GINOO

²⁸hin pagkuha hin lain nga linikid nga basahan ngan pagsurat dida hini han ngatanan nga nahisurat didto han syahan nga basahan.

²⁹Ginsiring ako han GINOO nga sidngon ko an hadi, “Ginsunog mo an linikid nga basahan, ngan ginpakianhan mo hi Jeremias kon kay-ano nga nagsurat hiya nga makanhi an hadi han Babilonia ngan pagbubungkagon ini nga tuna ngan pamamatayon an mga tawo ngan an kamanampan han tuna.

³⁰Sanglit yana, ako nga GINOO nasiring ha imo, Hadi Joakim, nga waray gud tulin nimo nga maghahadi han ginhadian ni David. Iglalabog ha gawas an imo patay nga lawas nga sisirakan ini kon adlaw ngan pagtutun-ogan ini kon gab-i.

³¹Pagkakastigohon ko ikaw, an imo mga tulin, ngan an imo mga opisyal, tungod han mga sala nga ginbubuhat niyo ngatanan. Waray gud mamati han akon mga pahimatngon ikaw, o an mga tawo han Jerusalem ug han Juda, sanglit ipadadara ko ha iyo ngatanan an karat-an nga akon igintarhog.”

³²Niyan kinmuha ako hin lain nga linikid nga basahan ngan iginhatag ko ini kan Baruc nga akon sekretaryo, ngan ginsurat niya an ngatanan nga akon igindikta. Ginsurat niya an ngatanan nga nahisurat didto han syahan nga linikid nga basahan, ngan hin sugad nga mga mensahe nga akon igindikta ha iya.